Neefeld (Land Wusten)

Vun Wikipedia
Zur Navigation springen Zur Suche springen

Dat Neefeld is en Stück Land an de Westküst von Land Wusten, dat in dat 17. Johrhunnert indiekt worrn is.

Geografie[ännern | Bornkood ännern]

Dat Neefeld reckt langs de Noordsee von Solthörn bi Misselwarden bet na Berensch (an de fröhere Grenz von Wusten na dat Amt Ritzbüttel). Dat is en Striepen Land, de 15 Kilometer lang is un maximal twee Kilometer breed.

En Stück wieder binnen in’t Land doot de Kaspeelöörd Misselwarden, Padingbüddel, Dorum, Cappel un Spiek liggen. De Hüüs, de direkt an de ole Dieklien liggen doot, billt egene lüttje Öörd. Dat sünd: Misselwardener Olendiek, Padingbüddler Olendiek, Dorumer Olendiek, Cappler Olendiek un Spieker Olendiek.

De Öörd, de na dat Indieken in dat Neefeld anleggt worrn sünd, hebbt de Naams Dorumer Neefeld, Cappler Neefeld un Spieker Neefeld kregen. De Oort Padingbüddler Neendiek bestünn blots ut en poor Hüüs, de vondaag nich mehr staht.

Historie[ännern | Bornkood ännern]

De Wusters hebbt 1635 en Verdrag mit de dree Dieksannehmers Berend Schinkel, Jan Warners un Jan Berend Bulder ut Emden slaten.[1] De Verdrag hett vörsehn, dat de Dieksannehmers den ne’en Diek in dat Johr 1636 kumplett trech hebben un 41 Rieksdaler för jede Rood Diek kriegen schöölt.[1] De Diek is ok würklich in een Johr trech worrn.[1] He weer 1270 Roden lang un de Dieksannehmers schullen dorüm 52.070 Rieksdaler kriegen, in dree Raten 1637, 1638 un 1639.[1]

Dat kunnen de Wusters aver nich opbringen.[1] Dorüm is en Deel von dat Neefeld 1643 an de dree Dieksannehmers fullen.[1] Jan Berend Bulder is 1645 doodbleven, aver sien Söhn hett denn de Andelen von de annern beiden Partners övernahmen.[1] Bulder siene Grootdochter hett den Besitt denn 1706 an den Oberamtmann von dat Amt Arzen, Jobst Heinrich Voigt, verköfft.[1] Nadem Voigt sien Söhn Otto Ludwig Voigt 1736 ok doodbleven is, hebbt de Arven dat Rebeed an de Domänenkamer Hannover verköfft. De Kamer hett denn 1739 ok noch den Liether Hoff von de Familie von der Lieth köfft.[1] Ut disse Rebeden is dat Amt Noordholt billt worrn.[1]

Dat Noorderneefeld harr üm dat Johr 1790 1770 Jück Land.[1] Op dit Land legen veer Pachthööv (Schöönoort, Halvmaand, Pompdamm un de Liether Hoff) un 85 Huusmannssteden.[1] Süderneefeld harr 605 Jück Land un 14 Hüüs.[1]

Footnoten[ännern | Bornkood ännern]

  1. a b c d e f g h i j k l m Annalen der Braunschweig-Lüneburgischen Churlande. Bänn 3-4, Pockwitz 1790, Sieden 914ff


Koordinaten:53° 45′ N, 8° 32′ O