Rootlook

Wapen/Flagg	Koort
Basisdaten
Bundsland: Neddersassen Landkreis: Veern Gemeen: Otterbarg
Inwahners:
Postleettall:	28870
Vörwahl:	04297
Geograafsche Laag:	53° 4′ N, 9° 10′ O

Rootlook (hoochdüütsch Rothlake) is en Dörp in de Gemeen Otterbarg in’n Landkreis Veern, Neddersassen. Binnen de Gemeen Otterbarg höört de Oort to de polietsche Oortschop Posthusen.

Geografie

De Oort liggt in dat Hellweger Moor. Dat Water ut dat Rebeed warrt över Gravens na de Wümm hen afföhrt. In’n Noorden liggt dat Naturschuulrebeed Otterbarger Moor.

De Naveröörd sünd Wümmingen in’n Noorden, Dodenbarg un Evernhusen in’n Noordoosten, Hellweeg in’n Oosten, Postdörp, Stellsfellen un Hintzendörp in’n Süüdoosten, Middeldörp in’n Süden, Schanzendörp un Tüchten in’n Süüdwesten, Kasshoop un Brammer in’n Westen un Hoffstall, Egypten un Nadah in’n Noordwesten.

Historie

De Oort is 1792 as Moorkolonie in dat Hellweger Moor grünnt worrn.

Verwaltungsgeschicht

In de Franzosentied von 1810 bet 1814 hett de Oort to de Mairie Karkwals in’n Kanton Rodenborg höört. Dat Rebeed hett in disse Tied 1810 to dat Königriek Westfalen un von 1811 bet 1814 to dat Franzöösche Kaiserriek ünner Napoleon höört.

De Oort hett vör 1852 to de Amtsvaagdie Ahusen (Ünnervaagdie Hintzendörp) in dat Amt Rodenborg tohöört un denn von 1852 bet 1885 to dat Amt Achem. Na 1885 weer dat in’n Kreis Achem. 1932 is dat Deel von’n Kreis Veern worrn.

De Oort hett fröher mit Middeldörp, Postdörp un Wümmingen de Gemeen Wümmingen billt, de sik an’n 1. Juli 1968 mit dree annere Gemenen to de Gemeen Posthusen tohoopslaten hett. De Gemeen Posthusen wedder is an’n 1. Juli 1972 mit de Gemeenreform in Neddersassen Deel von de Gemeen Otterbarg worrn. Sietdem billt Posthusen binnen de Gemeen Otterbarg en Oortschop.

Inwahnertall

Johr	Inwahners
1812-00-001812	48
1824-00-001824	8 Füürsteden
1848-00-001848	50 Lüüd, 8 Hüüs
1871-12-011. Dezember 1871	98 Lüüd, 14 Hüüs
1885-12-011. Dezember 1885	101 Lüüd, 16 Hüüs
1905-12-011. Dezember 1905	113 Lüüd, 16 Hüüs

Religion

Rootlook is evangeelsch-luthersch präägt un höört to dat Kaspel von de Lukas-Kark in Postdörp. Düsse Kark is 1852 nee boot worrn. Vörher hett de Oort to dat Kaspel von de Marien-Kark in Ahusen tohöört.

För de Kathoolschen is de St.-Matthias-Kark in Achem tostännig.

Kultur

Verenen

Bi’n Scheetsport maakt de Lüüd ut Rootlook bi’n Schüttenvereen Postdörp von 1921 mit.

Weertschop un Infrastruktur

För Rootlook is de freewillige Füürwehr Postdörp mit tostännig.

Verkehr

Rootlook liggt an’n Bremer Damm, de in’n Süüdwesten över Tüchten na Bassen geiht un in’n Oosten na de Landsstraat 155. De L 155 föhrt in’n Noordwesten över Wümmingen na Otterbarg an de L 168 un in’n Süüdoosten över de Dörper Postdörp, Hintzendörp, Stellsfellen un Allerdörp na Völkersen un Nindörp. In’n Oosten geiht de Kreisstraat 26 (in’n Landkreis Rodenborg as K 234) na Hellweeg un Ahusen.

De nächste Autobahn is de Autobahn 1 (Afsnidd Hamborg–Bremen). De Opfohrt 51 Posthusen liggt so annerthalv Kilometer in’n Noorden von Rootlook an de L 155.

De nächste Bahnhoff is so bi veer Kilometer wied weg in’n Noordwesten de Bahnhoff Otterbarg an de Bahnlien Hamborg–Bremen.

Scholen

Rotlook harr fröher en egen Volksschool. Vondaag gaht de Kinner op de Grundschool Posthusen. Na de 4. Klass wesselt se in de Regel op de Oberschool Wümmschool in Otterbarg oder op dat Gymnasium Otterbarg.