Hintzendörp

Wapen/Flagg	Koort
Basisdaten
Bundsland: Neddersassen Landkreis: Veern Gemeen: Otterbarg
Inwahners:
Postleettall:	28870
Vörwahl:	04297
Geograafsche Laag:	53° 2′ N, 9° 11′ O

Hintzendörp (hoochdüütsch Hintzendorf) is en Dörp in de Gemeen Otterbarg in’n Landkreis Veern, Neddersassen. Binnen de Gemeen Otterbarg höört de Oort to de polietsche Oortschop Posthusen.

Geografie

De Oort liggt in dat Hellweger Moor. Dat Water ut dat Rebeed warrt över Gravens na de Wümm hen afföhrt.

De Naveröörd sünd Wümmingen un Postdörp in’n Noorden, Stell un Hellweeg in’n Noordoosten, Stellsfellen in’n Oosten, Allerdörp in’n Süüdoosten, Langwedelermoor in’n Süden, Grasdörp, Giersdörp un Schanzendörp in’n Westen un Middeldörp un Rootlook in’n Noordwesten.

Historie

Hintzendörp is 1793 as Moorkolonie in dat Hellweger Moor grünnt worrn. Nöömt is de Oort na’n Verwaltungsbeamten Johann August Hintze, de to de Tied för de Moorkolonien tostännig weer.

Dat Dörp leeg op de Westsied von de Straat, de vondaag de Landsstraat 155 billt. Een Johr vörher is op de Oostsied von de Straat al de Kolonie Stellsfellen anleggt worrn.

In’n Eersten Weltkrieg sünd 21 Soldaten ut Hintzendörp un Stellsfellen fullen oder vermisst un in’n Tweten Weltkrieg 33.

Verwaltungsgeschicht

In de Franzosentied von 1810 bet 1814 hett de Oort to de Mairie Karkwals in’n Kanton Rodenborg höört. Dat Rebeed hett in disse Tied 1810 to dat Königriek Westfalen un von 1811 bet 1814 to dat Franzöösche Kaiserriek ünner Napoleon höört.

De Oort hett vör 1852 to de Amtsvaagdie Ahusen (Ünnervaagdie Hintzendörp) in dat Amt Rodenborg tohöört un denn von 1852 bet 1885 to dat Amt Achem. Na 1885 weer dat in’n Kreis Achem. 1932 is dat Deel von’n Kreis Veern worrn.

De Oort hett tohoop mit Stellsfellen de Buurschop un later de Gemeen Hintzendörp-Stellsfellen billt, bet sik Allerdörp un Hintzendörp-Stellsfellen an’n 1. September 1960 to de Gemeen Hintzendörp tohoopslaten hebbt. Düsse Gemeen hett sik an’n 1. Juli 1968 denn wedder mit dree annere Gemenen to de Gemeen Posthusen tohoopslaten. Mit de Gemeenreform in Neddersassen an’n 1. Juli 1972 is de Gemeen Posthusen Deel von de Gemeen Otterbarg worrn. Sietdem billt Posthusen binnen de Gemeen Otterbarg en Oortschop.

Inwahnertall

Johr	Inwahners
1812-00-001812	156
1824-00-001824	26 Füürsteden
1848-00-001848	216 Lüüd, 30 Hüüs
1871-12-011. Dezember 1871	225 Lüüd, 33 Hüüs
1885-12-011. Dezember 1885	223 Lüüd, 35 Hüüs
1905-12-011. Dezember 1905	196 Lüüd, 32 Hüüs

Religion

Hintzendörp is evangeelsch-luthersch präägt un höört to dat Kaspel von de Lukas-Kark in Postdörp. Düsse Kark is 1852 nee boot worrn. Vörher hett de Oort to dat Kaspel von de Marien-Kark in Ahusen tohöört.

För de Kathoolschen is de St.-Matthias-Kark in Achem tostännig.

Kultur

En Denkmaal för de Fullenen ut de twee Weltkrieg’ steiht in Postdörp bi de Kark.

Weertschop un Infrastruktur

För Hintzendörp is de freewillige Füürwehr Posthusen mit tostännig.

Verkehr

Dör Hintzendörp löppt de Landsstraat 155, de in’n Noordwesten över Postdörp un Wümmingen na Otterbarg an de L 168 ran geiht un in’n Süüdoosten över Allerdörp na Völkersen un Nindörp an de L 158. Von de L 155 geiht na Süüdwesten de Kreisstraat 7 af över Grasdörp un Steenbarg na Ädelsen an de L 158.

De nächste Autobahn is de Autobahn 1 (Afsnidd Hamborg–Bremen). De Opfohrt 51 Posthusen liggt so bi fiev Kilometer in’n Noordwesten von Hintzendörp an de L 155. De Opfohrt 24b Langwedel op de Autobahn 27 liggt so bi söss Kilometer in’n Süden an de K 9.

De nächste Bahnhoff is so bi söven Kilometer wied weg in’n Noordwesten de Bahnhoff Otterbarg an de Bahnlien Hamborg–Bremen. De Bahnhoff Langwedel an de Bahnlienen Wunsdörp–Bremen un Ülzen–Langwedel liggt üm un bi teihn Kilometer in’n Süden. Disse Bahnhoff is ok inbunnen in dat Nett von de Regio-S-Bahn Bremen/Neddersassen.

Scholen

De Kinner ut Hintzendörp gaht na de Grundschool Posthusen. Na de 4. Klass wesselt se in de Regel op de Oberschool Wümmschool in Otterbarg oder op dat Gymnasium Otterbarg.