Mairie Eestbrügg
De Mairie Eestbrügg weer in de Franzosentied (1810 bet 1813) een von de veer Mairien, in de de Kanton Buxthu indeelt weer. De Seet weer in Eestbrügg. Se harr 3297 Inwahners.[1]
Historie[ännern | Bornkood ännern]
De Ümgegend von Eestbrügg hett vör de Franzosentied to dat Grevengericht Oolland un de Gerichten Rübk un Hoov-Leeswig in dat Hartogdom Bremen höört, wat in dat Kurförstendom Hannover leeg. Dat Kurförstendom Hannover weer in de Tied von de Koalitschoonskriege siet 1801 von Franzosen un Prüßen besett. To’n 1. März 1810 is dat Rebeed denn Deel von dat Königriek Westfalen worrn, wat en Satellitenstaat von Frankriek weer.
Binnen Westfalen weer de Mairie Eestbrügg een von de twee Mairien in’n Kanton Buxthu von’n Distrikt Horborg, Departement von de Nedderelv.[2] Man al to’n 1. Januar 1811 harr dat wedder en Enn. Dat Königriek Westfalen müss dat Departement direkt an dat Franzöösche Kaiserriek afgeven. De Mairie Eestbrügg weer nu een von de veer Mairien in’n Kanton Buxthu, Distrikt Lümborg, Departement von de Elvmünnen. De Mairie hett sik von’n Ümfang düüdlich ännert. Dor sünd Öörd in tohoopfaat worrn, de vörher in Westfalen to veer Mairien höört harrn: de Mairie Eestbrügg ut’n Kanton Buxthu un de Mairien Cranz, Königriek un Moorenn-Westsied ut’n Kanton Jörk. Von de Mairie Cranz is blots de Westdeel an de Mairie Eestbrügg fullen. De annere Deel keem an de Mairie Hasselwarder. En Deel von ehr oold Rebeed mit de Öörd Hasselwarder, Nincop, Seehoff un Francop müss de westfäälsche Mairie Eestbrügg an de Mairie Hasselwarder afgeven.
1813/1814 hebbt de Russen de Franzosen slahn un dat Rebeed befreet. Dat Kurförstendom Hannover is denn wedder herstellt worrn un de ole Stand von vör 1810 wedder dor. Mit’n Wiener Kungress is 1815 ut dat Kurförstendom dat Königriek Hannover worrn.
Öörd[ännern | Bornkood ännern]
Dor hebbt düsse Öörd tohöört:
- Königriek Westfalen:[2]
- Eestbrügg, Moorenn-Oostsied, Finkenriek, Rübk, Königriek-Oostsied, Groot Hoov, Lütt Hoov, Hasselwarder, Nincop, Seehoff, Francop
- Kaiserriek Frankriek:[1]
Vondaag sünd düsse Öörd Deel von de Gemenen Jörk un Vosshusen un de Stadt Hamborg.
Footnoten[ännern | Bornkood ännern]
- ↑ a b Albrecht Friedrich Ludolph Lasius: Der französische Kayser-Staat unter der Regierung des Kaysers Napoleon des Großen, im Jahre 1812, Band 1. Kißling 1813, Sied 57
- ↑ a b Bulletin des lois du Royaume de Westphalie. Königliche Bookdruckeree, Kassel 1810, Sied 45