Johnny Briceño

Vun Wikipedia
(wiederwiest vun John Briceno)
Zur Navigation springen Zur Suche springen
Johnny Briceño 2018

Johnny Briceño (Juan Antonio Briceño, John Briceño; * 17. Juli 1960 in Orange Walk) is en Politiker ut Belize (PUP). He is siet November 2020 Premierminister von Belize.

Briceño is 1960 as Söhn von Elijio Briceño boren. Leopoldo Briceño is sien Unkel. He güng op dat St. John’s College in Belize-Stadt un denn op de Universität von Texas in Austin.

He is Maat von de People’s United Party (PUP). He is 1994 in’n Stadtraad von Orange Walk wählt worrn un harr dor twee Legislaturperioden lang bet 2001 en Mandaat.

1996 is he as Viez-Parteibaas von de PUP wählt worrn, wat he bet 2008 bleven is.

Bi de Parlamentswahl in Belize 1993 weer he Kannedaat för de PUP in’n Wahlkreis Orange Walk Zentraal un hett de Wahl mit 55,7 % von de Stimmen gegen Leliz Carballo von de UDP wunnen. Ok bi de Wahlen 1998 (66,41 % von de Stimmen gegen Ruben Campos, UDP), 2003 (61,57 % gegen Miguel Urbina, UDP), 2008 (52,16 % gegen Rosendo Urbina, UDP, un Alvaro Espejo Jr., NRP), 2012 (57,91 % gegen Denni Grijalva, UDP) un 2015 (52,12 % gegen Denny Grijalva Cruz, UDP, un Phillip De La Fuente, BPP) kunn he sik in’n sülven Wahlkreis wedder dörsetten.

Dormit is he siet 1993 Afornten von dat Repräsentantenhuus von Belize.

De eersten fiev Johr hett he mit de PUP in de Oppositschoon seten. 1998 is he ünner Premierminister Said Musa Minister för Natürliche Ressourcen un Ümwelt in dat Kabinett Musa I worrn. Gliektiedig weer he Viez-Premierminister. Ok in dat Kabinett Musa II hett he 2003 düsse Ämter behollen un tosätzlich dat Amt as Minister för Hannel un Industrie övernahmen.

An’n 5. Januar 2004 hett em Juan Vildo Marin as Ümweltminister aflööst. Tosätzlich weer Briceño von’n 18. August 2004 bet 28. Dezember 2004 tohoop mit Joe Coye Staatsminister in dat Ministerium för Finanzen ünner Minister Said Musa.[1]

Al an’n 28. Dezember 2004 hett Briceño dat Amt as Minister för Ümwelt wedder övernahmen. An’n 14. Juli 2005 hett he tosätzlich dat Ministerium för Lokale Verwaltung övernahmen, wat he aver al an’n 12. April 2006 wedder an Joe Coye afgeven müss.[2][3]

Minister för Natürliche Ressourcen un Ümwelt is Briceño noch bet to’n 5. Juni 2007 bleven. An’n sülven Dag hett he ok as Viez-Premierminister ophollen. De Ministerposten hett Florencio Marin Sr. övernahmen un as Viez-Premierminister Juan Vildo Marin.

Na de verloren Wahlen von 2008 hett Briceño dat Amt as Parteibaas von de PUP von Said Musa övernahmen. He is bet 2011 Parteibaas bleven, as Francis Fonseca övernahmen hett. 2016 hett Fonseca düt Amt wedder an Briceño afgeven. In düsse Tied (2008 bet 2011 un siet 2016) weer he ok Oppositschoonsföhrer in dat Repräsentantenhuus.

Bi de Parlamentswahl 2020 is Briceño wedder in’n Wahlkreis Orange Walk Zentraal antreden un kunn sik mit 56,27 % von de Stimmen gegen Denni Grijalva von de UDP dörsetten. He is denn Premierminister von Belize worrn.

Footnoten[ännern | Bornkood ännern]

  1. 7 return, 3 added to new cabinet, Channel 5 Belize an’n 18. August 2004
  2. Latest Cabinet shuffle reduces number of ministries, Channel 5 Belize an’n 14. Juli 2005
  3. Courtenay is new foreign minister in latest Cabinet shuffle, Channel 5 Belize an’n 12. April 2006