Jose Coye
Jose Coye oder Joe Coye (* 1942) is en Politiker ut Belize (PUP).
Coye is 1942 boren. He weer Tollbeamten, bevör he in de Politik gahn is.
He weer von 1995 bet 1998 Börgermeester von Belize-Stadt.
Bi de Parlamentswahl in Belize 1993 weer he Kannedaat för de PUP in’n Wahlkreis Karibische Küst un hett de Wahl mit 49,2 % von de Stimmen gegen Manuel Esquivel von de UDP verloren. Esquivel is denn Premierminister worrn.
Bi de Wahl 1998 is Coye in’n sülven Wahlkreis antreden un kunn sik mit 55,62 % von de Stimmen gegen Premierminister Esquivel dörsetten, de so nich wedder in dat Repräsentantenhuus intehn kunn. Bi de Wahl 2003 hett Coye 52,28 % von de Stimmen haalt un dormit gegen Oscar Ayuso von de UDP wunnen. Bi de Wahl 2008 hett he blots noch 33,81 % von de Stimmen kregen un so gegen Carlos Perdomo von de UDP verloren.
To de Wahl 2012 wull Coye wedder antreden, kunn sik bi de PUP-interne Vörwahl an’n 10. April 2011 aver nich gegen Anthony Mahler dörsetten (377 to 784 Stimmen).[1] Nadem ok Mahler de Kannedatur wedder afgeven hett, is David Hoy PUP-Kannedaat in’n Wahlkreis Karibische Küst worrn.
Dormit weer Coye von’n 27. August 1998 bet 7. Februar 2008 Afornten von dat Repräsentantenhuus von Belize. He is 1998 ünner Premierminister Said Musa Minister för Hannel, Industrie, Apentlichen Deenst un Arbeid in dat Kabinett Musa I worrn.[2]
An’n 5. Oktober 1999 is Coye tosätzlich Minister för Gesundheit (övernahmen von Servulo Baeza) un Zivilsellschop worrn, hett aver de Tostännigkeit för Industrie an Johnny Briceño afgeven.[3] De Tostännigkeit för Arbeid hett Coye in’n Dezember 1999 an Valdemar Castillo afgeven.
In dat ne’e Kabinett Musa II 2003 is Coye denn blots noch Minister för Gesundheit ween.[4]
An’n 5. Januar 2004 hett he den Posten as Minister för Gesundheit afgeven un is dorför Minister för Apentliche Arbeiden worrn.[5] Dormit hett he also de Posten mit Juan Vildo Marin tuuscht.
In’n August 2004 keem dat to ene Regerungskries, as rutkamen is, dat Finanzminister Ralph Fonseca Geller ut’n Soziaalversekerungsfonds bruukt hett, üm Kredite von private Ünnernehmens aftosekern.[6] Coye un söss annere Ministers hebbt Musa opfeddert, Fonseca ut dat Kabinett ruttosmieten.[6] As Musa dat nich daan hett, wullen de söven Ministers (de Grupp is von de Medien in Belize „G7“ döfft worrn) all gemeensaam jemehr Ämter afgeven.[6] Musa kunn den Rüggtridd afwennen, hett aver dat Kabinett ümbillt: Coye hett de Opgaav as Staatsminister in dat Ministerium för Finanzen kregen, üm Said Musa as Finanzminister to ünnerstütten, wat he bet to’n 29. Dezember 2004 bleven is.[7] An’n 29. Dezember 2004 hett he ok dat Ministerium för Verkehr un för Apentlichen Deenst to sien Portfolio tokregen.
An’n 14. Juli 2005 hett he de Tostännigkeit för Apentlichen Deenst afgeven, aver de Tostännigkeit för Kommunikatschoon tokregen.[8]
An’n 12. April 2006 is dat Kabinett wedder ümbillt worrn un Coye hett dat Ministerium för Apentliche Arbeiden afgeven, üm de Ministerien för Gesundheit un Lokale Verwaltung to övernehmen.[9] He is bet an dat Enn von de Legislaturperiood 2008 Minister bleven.
Footnoten
[ännern | Bornkood ännern]- ↑ Anthony Mahler, new standard bearer for Caribbean Shores, Channel 5 Belize an’n 11. April 2011
- ↑ Musa names 16 member Cabinet, Channel 5 Belize an’n 31. August 1998
- ↑ A new Attorney General as the Cabinet gets an adjustment, Channel 5 Belize an’n 5. Oktober 1999
- ↑ Janelle Chanona: New 13 member Cabinet sworn in, Channel 5 Belize an’n 7. März 2003
- ↑ Cabinet has new look for 2004, Channel 5 Belize an’n 5. Januar 2004
- ↑ a b c Seven GOB ministers resign!, San Pedro Sun an’n 19. August 2004
- ↑ 7 return, 3 added to new cabinet, Channel 5 Belize an’n 18. August 2004
- ↑ Latest Cabinet shuffle reduces number of ministries, Channel 5 Belize an’n 14. Juli 2005
- ↑ Courtenay is new foreign minister in latest Cabinet shuffle, Channel 5 Belize an’n 12. April 2006
1963–1979: C. L. B. Rogers | 1979–1984: Assad Shoman | 1984–1986: Elodio Aragon Senior | 1986–1989: Israel Alpuche | 1989–1993: Theodore Aranda | 1993–1997: Ruben Campos | 1997–1998: Salvador Fernandez | 1998–1999: Servulo Baeza | 1999–2004: Jose Coye | 2004–2006: Juan Vildo Marin | 2006–2008: Jose Coye | 2008–2020: Pablo Marin | 2020–: Michel Chebat