Cordelia (Maand)

Vun Wikipedia
Wesseln na: Navigatschoon, Söök

Cordelia (ok: Uranus VI oder S/1986 U 7) is en vun de lütten Maanden vun den Planeten Uranus. Dat is de innerste vun de Uranusmaanden. De hebbt all Naams vun Figuren ut dat Wark von William Shakespeare oder Alexander Pope; Cordelia is de jüngste Dochter vun’n König ut Shakespeares Tragödie King Lear (dt.: „König Lear“).

Opdecken[ännern | Bornkood ännern]

De Maand is an’n 20. Januar 1986 vun den Astronomen Richard John Terrile op Biller vun de Ruumsond Voyager 2 opdeckt worrn. He hett toeerst de vörlöpig Beteken S/1986 U 7 kregen.

Ümlopbahn[ännern | Bornkood ännern]

Cordelia bruukt ungefähr 8 Stünnen för een Ümloop üm Uranus. Dorbi hett he en middler’n Afstand vun 49.800 km. De Maandbahn hett en ganz lütte Exzentrizität vun blots 0,00047 un is dormit meist kreisrund. De Bahn is üm un bi 0,09° gegen den Äquater vun’n Uranus kippt. De Maand bewegt sik jüst so binnen den ε-Ring vun den Planeten un övt mit sien Gravitatschoon Influss op de Pratikels in den Ring ut. Cordelia warrt dorüm as en Scheperhundmaand vun den ε-Ring ankeken, so as Ophelia op de anneren Siet.

Opbo[ännern | Bornkood ännern]

De Dörmeter vun den Maand liggt in’n Dörsnitt bi ungefähr 40 km. Mit 1,3 g/cm³ liggt de Dicht düütlich ünner de vun de Eer. De Wetenschopplers gaht dorvun ut, dat de Maand to’n gröttsten Deel ut Wateries besteiht. De Bavenflach vun Cordelia is teemlich düster mit en Albedo vun 0,07. Dat heet, dat 7 % vun dat Licht, dat op den Maand ankummt, wedder afstrahlt warrt – so as bi de meisten Maanden. An de Bavenflach warkt en Sworversnellen vun 0,0074 m/s². Mehr is över den Maand nich bekannt, wiel de Opnahmen ut groten Afstand maakt weern un nich sünners scharp sünd.