Albedo

Middlere Albedowerten in’t Sünnsystem
Planet	Geometrisch Albedo	Sphäärsche Albedo
Merkur	0,106	0,119
Venus	0,65	0,76
Eer	0,367	0,39
Mars	0,15	0,16
Jupiter	0,52	0,7
Saturn	0,47	0,74
Uranus	0,51	0,81
Neptun	0,41	0,29
Pluto	0,6	0,5
Albedowerten von ünnerscheedlich Bavenflachen
Material	Albedo
Frisch Snee	0,80 – 0,90
Ole Snee	0,45 – 0,90
Wulken	0,60 – 0,90
Asphalt	0,15
Waterflach (Neegwinkel > 45°)	0,05
Waterflach (Neegwinkel > 30°)	0,08
Waterflach (Neegwinkel > 20°)	0,12
Waterflach (Neegwinkel > 10°)	0,22

De Albedo (lat.: „Wittheit“, v. albus = witt) is en Maat för dat Vermögen von diffus reflekteernd (ok reemittierend nöömt) Bavenflachen, dat Licht trüchtostrahlen. För spegelnd Bavenflachen speelt dorto noch de Snelliussche Reflekschoon en Rull. För sülvst lüchende Bavenflachen gifft dat den Begreep nich.

Von Bedüden is de Albedo vör allem in de Meteorologie, wo se dormit to kriegen hett, woans sik de Luft över verscheeden Bavenflachen opwarmen deit. Butendem hett se en groot Bedüden för dat Weltklima, wieldat energieriek kottbülgsch Licht von de Eerdbavenflach reflekteert un dorbi in langbülgsch Licht ümwannelt warrt, dat denn op de Warms inwarken deit. Se warrt aver ok in de 3D-Reknergrafik anwennt. Dor is se en Maat för de diffuse Streikraft von ünnerscheedlich Materialen för’t Simuleeren von Volumenstreien.

Albedooorden

Man ünnerscheed twüschen en poor Oorden von Albedo

De geometrisch Albedo (ok as visuell geometrisch Albedo betekend) is de von en pielliek anlüchte Halfkugel diffus in den Halfruum trüchstreite Andeel von dat Licht, dat op de Halfkugel opdropen is. Un twor in Proportschoon to de Trüchstrahlen von en witt Halfkugel mit de lieken Grött un den lieken Afstand mit den Phasenwinkel 0° to’n Bekieker.

De sphäärsch Albedo (ok Bondsche Albedo nöömt) is de en all Richten trüchstreite Andeel von dat Licht in Proportschoon to de parallel instrahlte Lichtmengde.

De hemisphäärsch Albedo is de Andeel von dat opstrahlte Licht, de von de Bavenflach in Afhangigkeit von den Infallswinkel streit warrt.

De Albedo is also jümmers dat trüchstrahlte Licht in Proportschoon to dat instrahlte un kann dorüm Werten twüschen 0 nu 1 annehmen. Wat gröter de Andeel is, de reflekteert waart, wat heller schient de Bavenflach un wat grötter is ok de Albedo.

De sphäärsche Albedo is bi dat lieke Material tomeist en beten wat grötter as de geometrisch. De Tosamenhang twüschen de beiden warrt mathemaatsch dör dat so nöömte Phasenintegral herstellt. In de Astronomie warrt dör den Vergliek mit Albedowerten von bekannten Materialen op de Eer trüchsloten op de Tohopensetten von Bavenflachen von annere Himmelskörpers. Na de Definitschoon von de sphäärschen Albedo is dat parallel Infallen von’t Licht vörrutsett. Aver dör den groten Afstand von de Sünn von den reflekteerenden Himmelskörper, is dat ok so geven.

Inwarken op de Albedo

Wenn dör Strahlen Warms toföhrt warrt, de mehrstensdeels dör annere Vörgäng wedder afföhrt warrt, warmt sik düstere Bavenflachen (also mit lütte Albedo) mehr op – woans sik een an dat Bispeel Asphalt un Snee klor maken kann. Wenn de Warms mehrstendeels dör annere Vörgäng toföhrt warrt aver denn gröttstendeels dör Strahlen afgeven warrt, denn schafft Bavenflachen mit lütte Albedo deepere Temperaturen – dat is de Grund, worüm Köölkörpers bi elektroonsch Reedschoppen mehrstendeels swatt sünd.

Gladde Bavenflachen as Water, Sand oder Snee hebbt en teemlich groten Andeel von spegelnd Reflekschoon. Dorüm is bi jüm de Albedo afhangig von den Infallswinkel von de Sünnstrahlen (kiek ok in de Tabell).

Middlere Albedo in’t Sünnsystem

De Himmelskörpers in dat Sünnsystem hebbt ünnerscheedlich Albedo. De Venus hett mit 0,76 in Snitt en teemlich hooge Albedo. Uns Maand dorgegen hett mit 0,12 en teemlich lüttet Vermögen, Licht trüchtostrahlen. De Eer liggt dortwüschen mit 0,39. De höchste Weert (0,99) is an den Saturn-Maand Enceladus meten worrn. De lüttste Albedo (0,03) weer dorgegen bi den Kometen Borrelly meten.