Scheperhundmaand

Vun Wikipedia
Bi’n Saturn deent Pandora (links) un Prometheus as Schepermaanden för den F-Ring

As Scheperhundmaanden (ok Schepermaand, Wachtermaand oder Hardermaand) warrt in de Astronomie lütte natürliche Maanden vun de Gasplaneten in’t Sünnsystem betekent, de de Ümloopbahnen vun de Partikels in jemehr Ringsystemen in enkelte Ringen scheedt. De Naam speelt op dat Tohopenhollen vun de „Hood“ vun Ringpartikels an, as dat en Scheperhund oder en Harder bi de Deerten maakt.

Schepermaanden künnt dör jemehr Gravitatschoonswirken de lütten Ringpartikels antrecken un dör Bahnstören vun jemehr anfänglich Bahn aflenken btw. dör Bahnresonanzen nee orden. Dordör kamt de Ünnerbreken in de Ringsystemen tostannen, as t. B. de düüdliche Cassinische Delen bi’n Saturn. Se sorgt ok för de charakteristische Bännerbilln oder föhrt to egenordig „verdreihte“ Verformen vun de Ringen.

Da komplizeerte System vun’n Saturn hett mehrere vun solke Hardermaanden. Bi dree Maanden is dat mehr oder weniger eendüdig, dat se Scheperhundmaanden sünd. Dat sünd Atlas för den A-Ring un Prometheus un Pandora för den F-Ring. Ok as Schepermaanden ansehn warrt de annern veer binneren Maanden Daphnis, Pan, Janus un Epimetheus.

Jupiter hett ünner sien velen Maanden ok eenige Wachtermaanden, un bi Uranus sünd mit Cordelia un Ophelia twee Schepermaanden op de beiden Sieten vun den ε-Ring bekannt.

Kiek ok[ännern | Bornkood ännern]