Prospero (Maand)

Prospero (ok S/1999 U3 oder Uranus XVIII) is en vun de lütten buteren Maanden vun den Planeten Uranus.

Opdecken un Naam

De Maand weer an’n 18. Juli 1999 vun de Astronomen Matthew J. Holman, John J. Kavelaars, Brett J. Gladman, Jean-Marc Petit un Hans Scholl opdeckt un hett toeerst sien vörlöpig Beteken kregen, as dat na de Internatschonale Astronoomsche Union (IAU) begäng is. Traditschonell warrt de Maanden vun’n Uranus all na Figuren ut de Warken vun William Shakespeare oder Alexander Pope nöömt. Prospero is en Töverer ut Shakespeares Kummedie The Tempest (dt.: Der Sturm).

Ümloopbahn

Prospero hett en Bahn wieter buten üm den Uranus. He bruukt 1977 Daag un 7 Stünnen, üm eenmol üm den Planeten rümtokamen. De middlere Afstand vun’n Uranus is 16.418.000 km. De Bahn is aver nich kreisrund, man se hett en teemlich grode Exzentrizität vun ungefähr 0,4431. Bito is de Bahn üm 151,966° gegen den Uranus-Äquater kippt. Dordör löpt de Maand retrograd, also gegen den Dreihsinn vun de Rotatschoon vun’n Uranus.

Opbo un Egenschoppen

De Dörmeter vun Prospero liggt bi üm un bi 30 km. As ok de meisten anneren lütten Maanden, hett Propero en middlere Dicht vun 1,5 g/cm³. Dat is nich sünnerlich veel, worüm man dorvun utgeiht, dat de Maand to’n groden Deel ut Wateries un Silikat-Steen tohopensett is. Butendem höört Prospero ok to de düsteren Maanden. Siene Albedo is blots 0,07 – de Bavenflach strahlt also vun dat ankamen Licht blots 7% wedder torüch.

Maanden vun den Planeten Uranus

Kiek ok na bi: List vun de Uranusmaanden