Puck (Maand)

Vun Wikipedia
Zur Navigation springen Zur Suche springen
Opnahm vun Puck dör Voyager 2.

Puck höhrt to de lütteren Maanden vun den Uranus. Puck is an’n 30. Dezember 1985 von den US-amerikaanschen Astronom Stephen P. Synnott opdeckt worrn, as he Opnahmen vun de Ruumsond Voyager 2 bekeken harr. Toerst weer Puck as S/1985 U1 betekend worrn, later hett he denn dissen Naam kregen. Na de Tradition hebbt de Uranus-Maanden na en Idee von John Herschel all Naamen ut de Warken von William Shakespeare oder Alexander Pope. In dissen Fall is de Naam vun en plietschen Geist ut A Midsummer Night's Dream (dt.: Ein Sommernachtstraum) afleidt.

Ümloop[ännern | Bornkood ännern]

Puck hett vun’n Uranus en middleren Afstand vun 86.004 km un bruukt ungefäähr 18 Stünnen un 17 Minuuten, üm eenmal üm em rümtolopen. De Bahn vun den Maand is meist kreisrund un hett en ganz lütte Exzentrizität vun blots 0,00005. Se is üm 0,32 ° gegen den Äquater von den Planeten kippt.

Egenschoppen un Opbo[ännern | Bornkood ännern]

De Maand Puck hett en Dörmeter vun 162 km bi en middlere Dicht vun 1,3 g/cm³, wat düdlich weniger is as de Eer hett. Dat künn dorop hendüden, dat de Maand to’n gröttsten Deel ut Wateries besteiht. Vun de Bavenflach warrt blots 7 % vun dat infallend Licht wedder torüchstrahlt, d.h. de Albedo is blots 0,07. Dat is nu wedder bannig düster, so dat de Bavenflach woll teemlich smuddelig is. De Sworversnellen is baven üm un bi 0,029 m/s², wat 0,3 % vun dat op de Eer is.

Doröver rut weet man noch nich veel över den Maand Puck. De Biller, de Voyager 2 maakt hett, weern all ut groten Afstand maakt un sünd dorüm nich goot oplöst.