Öös (Basdaal)

Vun Wikipedia
Zur Navigation springen Zur Suche springen
Wapen/Flagg Koort

Wapen vun Öös

Öös
Laag vun Öös in Düütschland
Basisdaten
Bundsland: Neddersassen
Landkreis: Rodenborg
Samtgemeen: Geestborn
Gemeen: Basdaal
Inwahners:
Postleettall: 27432
Vörwahl: 04766
Geograafsche Laag:
Koordinaten:53° 27′ N, 9° 2′ O
53° 27′ N, 9° 2′ O

Fackwarkhuus in Öös

Öös (hoochdüütsch Oese) is en Dörp in de Gemeen Basdaal (Samtgemeen Geestborn). Dat liggt in’n Landkreis Rodenborg in Neddersassen.

Geografie[ännern | Bornkood ännern]

De Oort liggt in’n Oosten von de Wersermünner Geest, nich wied af von dat Düvelsmoor. Dat Water ut dat Rebeed flütt över lüttjere Beken na’n Fohrendörper Kanaal hen af.

De Naveröörd sünd Nee-Öös, Poggmöhlen un Barchel in’n Noorden, Örel in’n Noordoosten, Sprekens in’n Oosten, Fohrendörp un Fohrendaal in’n Süüdoosten, Oosterweed in’n Süden, Brillit in’n Süüdwesten, Basdaal in’n Westen un Kluust in’n Noordwesten.

Historie[ännern | Bornkood ännern]

Gedenksteen to Uns Dörp hett Tokumst
Kriegerdenkmaal

Öös oder beter de Göder Öös un Poggmöhlen weer fröher Seet vun dat Geslecht vun Issendörp. Dat hüdige Good stammt vun 1586. Blangen dat Good steiht ok de Christopher-Kark ut Backsteen, de Christoph vun Issendörp 1577/1578 hett boon laten. Bi Kark un Good steiht denn ok noch de fröhere Volksschool, de hüüt as Freetiets- un Begegnungssteed bruukt warrt.

Dat Dörp weer 2003 un 2005 Kreiswinner bi Uns Dörp hett Tokumst.

Verwaltungsgeschicht[ännern | Bornkood ännern]

In de Franzosentied von 1810 bet 1814 hett de Oort to de Mairie Kuhs in’n Kanton Beverst höört. Dat Rebeed hett in disse Tied 1810 to dat Königriek Westfalen un von 1811 bet 1814 to dat Franzöösche Kaiserriek ünner Napoleon höört.

De Oort hett fröher to dat Patrimonialgericht Öös höört, dat later in dat Gericht Beverst opgahn is. 1851 is ut dat Gericht Beverst dat Amt Beverst billt worrn. Aver al 1852 is Öös denn in dat Amt Bremervöör wesselt. Na 1885 weer dat in’n Kreis Bremervöör. 1932 is dat Deel von’n ne’en, grötteren Kreis Bremervöör worrn un 1977 von’n Landkreis Rodenborg.

De Gemeen Öös is 1929 oplööst un mit de Gemeen Basdaal tohoopleggt worrn. To’n 1. Oktober 1949 is de Oort aver wedder en egenstännige Gemeen worrn.[1] Dat hett denn bet to’n 1. März 1974 duurt, bet mit de Gemeenreform in Neddersassen de Gemeen Öös wedder Deel von de Gemeen Basdaal worrn is.

Inwahnertall[ännern | Bornkood ännern]

Johr Inwahners
1791-00-001791[2] 15 Füürsteden
1812-00-001812[3] 132
1824-00-001824[4] 29 Füürsteden
1848-00-001848[5] 186 Lüüd. 32 Hüüs
1858-00-001858[6] 197
1871-12-011. Dezember 1871[7] 193 Lüüd. 39 Hüüs
1885-12-011. Dezember 1885[8] 157 Lüüd. 35 Hüüs
1905-12-011. Dezember 1905[9] 180 Lüüd. 33 Hüüs
1910-12-011. Dezember 1910[10] 178
1949-10-011. Oktober 1949[1] 443
De Tallen sünd tohoop mit dat Good Öös un Nee-Öös

Religion[ännern | Bornkood ännern]

Kark in Öös
Graffsteen an de Kark vun Öös (Familie von Brobargen)

Öös is evangeelsch-luthersch präägt un hett mit de Christophorus-Kark en egen Kark. De Kark mit ehre bunt bemaalte Deek hett en Altar ut dree Delen. Op den Altar sünd Motive op, bi de jümmer en Bibelvers op Plattdüütsch bisteiht. De söss Blee-Finstern wiest de Öser Passion mit Szenen ut de Passionsgeschicht.

För de Kathoolschen is de St.-Michaelskark in Bremervöör tostännig, de siet 1. September 2010 to de Karkengemeen Hillig Geist in Stood tohöört.

Wapen[ännern | Bornkood ännern]

Dat Wapen von Öös wiest op sülvern Grund en rode Kark mit blau Dack un en sülvern Wederhahn, de op en grönen Schildfoot steiht. Achter de Kark sünd veer gröne Bööm to sehn un op’n Schildfoot is en Wapenschild opleggt, dat dör Spitzensnidd deelt is, dat Feld baven rood un ünnen sülvern.

Weertschop un Infrastruktur[ännern | Bornkood ännern]

Öös hett en egene freewillige Füürwehr.

Verkehr[ännern | Bornkood ännern]

Öös liggt an kene grötteren Straten. Na Westen geiht de Kreisstraat 138, de in Basdaal an de Bundsstraat 71/74 rangeiht. Na Noorden to geiht en Straat na Barchel. Na Süden geiht en Weg na Oosterweed. Na Oosten to liggt dat fröhere Düvelsmoor, dor gifft dat gorkene Straten langs. De nächste Bahnhoff is de Bahnhoff Örel an de Bahnlien Bremerhoben–Buxthu, de so bi söven Kilometer in’n Noorden liggt.

Fröher harr ok Basdaal noch en Bahnhoff an de Bahnlien Bremervöör–Oosterholt, aver dor gifft dat nu keen Lienverkehr mehr.

De nächste Autobahn is de Autobahn 27. De Opfohrt 9 Wulsdörp liggt so 30 Kilometer in’n Westen von Öös.

Scholen[ännern | Bornkood ännern]

De Kinner ut Öös gaht na Grundschool op de Hermann-von-Issendörp-School in Basdaal. Na de 4. Klass wesselt se för de Oberschool op de School Geestborn in Örel oder op dat Gymnasium Bremervöör.

Literatur[ännern | Bornkood ännern]

  • Bernhard Suin de Boutemand: Oeser Passionen. Die Kirche zu Oese im Spiegel der 600jährigen Wirtschafts- und Sozialgeschichte der Dörfer Basdahl, Oese und Poggenmühlen. 1975
  • Martin Blanken, ‎Diedrich Hildebrandt: Basdahl mit Kluste, Oese, Poggemühlen und Volkmarst: die Geschichte der Dörfer, der Höfe und ihrer Familien. Volksbank Gnarrenborg, 1984

Footnoten[ännern | Bornkood ännern]

  1. a b Neues Archiv für Niedersachsen. Band 3, W. Dorn, 1949, Sied 871
  2. Christoph Barthold Scharf: Statistisch-Topographische Samlungen zur genaueren Kentnis aller das Churfürstenthum Braunschweig-Lüneburg ausmachenden Provinzen. Meier, Bremen 1791, Sied 172
  3. Albrecht Friedrich Ludolph Lasius: Der französische Kayser-Staat unter der Regierung des Kaysers Napoleon des Großen, im Jahre 1812, Band 1. Kißling, Ossenbrügge 1813, Sied 103
  4. Curt Heinrich Conrad Friedrich Jansen: Statistisches Handbuch des Königreichs Hannover. Hannover 1824, Sied 458
  5. Friedrich Wilhelm Harseim, Carl Schlüter: Statistisches Handbuch für das Königreich Hannover. Schlütersche Hoffbookdruckeree, Hannover 1848, Sied 149
  6. Franz Heinrich Ungewitter: Neueste Erdbeschreibung und Staatenkunde. 1858, Sied 420: http://books.google.de/books?id=ZkoNAQAAIAAJ&pg=PA420
  7. Die Gemeinden und Gutsbezirke des Preussischen Staates und ihre Bevölkerung. Berlin 1873, Sied 144
  8. Gemeindelexikon für das Königreich Preußen. Auf Grund der Materialien der Volkszählung vom 1. Dezember 1885. Verlag des Königlichen statistischen Bureaus, Berlin 1888, Sied 187
  9. Gemeindelexikon für das Königreich Preußen. Auf Grund der Materialien der Volkszählung vom 1. Dezember 1905. Verlag des Königlichen statistischen Landesamtes, Berlin 1908, Sied 22
  10. Inwahnertallen op gemeindeverzeichnis.de

Weblenken[ännern | Bornkood ännern]

Commons-logo.svg Öös (Basdaal). Mehr Biller, Videos oder Audiodateien to’t Thema gifft dat bi Wikimedia Commons.