Shyne

Vun Wikipedia
Shyne 2010

Shyne oder Jamal Michael Barrow (Moses Michael Levi Barrow; * 8. November 1978 in Belize-Stadt) is en Rapper un Politiker ut Belize (UDP).

Leven[ännern | Bornkood ännern]

Barrow is 1978 in Belize-Stadt as Söhn von Frances Imeon Myvett un Dean Barrow (* 1951, later Premierminister von Belize) boren. Sien tweten Vörnaam Michael hett he von sien Unkel Michael Finnegan af. Barrow sien Öllern weren nich verheiraadt. Sien Vader hett sien juristische un polietsche Karjeer in Belize vörandreven. De eersten dree Johr hett siene Moder dat Kind in Belize alleen groottagen. Denn is se na Brooklyn (New York City) tagen un dat Kind is bi’n Vader bleven. Von wegen dat de Vader dör de Arbeid bunnen weer, is Jamal Barrow veel mit sien Unkel Michael Finnegan un siene Tante Denise Barrow grootworrn. As he acht Johr oold weer, hett siene Moder em na Brooklyn haalt, wo he in East Flatbush opwussen is. He hett aver ok jümmer wedder Tied in Belize verbröcht.

Musik[ännern | Bornkood ännern]

As jungen Keerl weer Barrow 1998 in’n Laden von en Balbeer as Freestyle-Rapper togang, as em de Hip-Hop-Produzent DJ Clark Kent sehn hett. Barrow is denn as Shyne von Sean Combs sien Label Bad Boy Records ünner Verdrag nahmen worrn.

He harr 1998 un 1999 Gastoptreed in Opnahmen von verscheden Interpreten, de bi Bad Boy Records ünner Verdrag weren. An’n 26. September 2000 keem mit Shyne dat eerste Album von em rut. Von düt Album sünd an’n 27. Mai 2000 mit Bad Boyz, an’n 10. Oktober 2000 mit That’s Gangsta un 2001 mit Bonnie & Shyne ok dree Singles rutbröcht worrn.

An’n 27. Dezember 1999 keem dat bi en Clubbesöök in’n Club New York tohoop mit Sean Combs un Jennifer Lopez, de to de Tied Combs sien Fründin weer, in Manhattan to en Scheteree, bi de dree Lüüd verletzt worrn sünd. Shyne is versöchten Moord un Körperverletzung vörhollen worrn. Ok Combs is verhaft worrn, aver wieldes Combs freespraken worrn is, keem dat bi Shyne to en Prozess, de an’n 1. Juni 2001 mit en Schuldspröök toenn güng. He is to teihn Johr Haft veroordeelt worrn un keem in de Clinton Correctional Facility in Dannemora. Dat weer ok dat Enn von sien Verdrag bi Bad Boy Records.

An’n 10. August 2004 keem mit Godfather Buried Alive bi Def Jam Recordings dat twete Album rut. Dat Album bestünn to’n gröttsten Deel ut Opnahmen, de al vör de Haft opnahmen worrn sünd. Blots een Leed weer över Telefon direkt ut dat Fängnis insungen.

2009 harr Shyne sien Avkaat en Andrag stellt, dat Shyne vör de Tied ut de Haft rutlaten warrn kann (parole). In de Tied von düssen Andrag hett he op Rikers Island inseten. An’n 6. Oktober 2009 hett en Richter in New York City den Andrag genehmigt. Shyne is an’n 6. Oktober von de Behörden von’n Bundsstaat New York an de natschonalen Bundsbehörden övergeven worrn un keem in de Woodbourne Correctional Facility. Shyne harr Status as en Permanent Resident, aver weer keen Börger von de USA. Dorüm is he an’n 28. Oktober 2009 von dat Immigration and Customs Enforcement direkt na Belize afschaven worrn.

Shyne hett de Thora studeert un to dat Jodendom övergahn. Dorbi hett he 2006 den Naam Moses Michael Levi Barrow annahmen. Na de Haft hett he en Tied lang in Jerusalem leevt.

Politik[ännern | Bornkood ännern]

Bi de Parlamentswahl in Belize 2020 weer he Kannedaat för de United Democratic Party (UDP) in’n Wahlkreis Mesopotamia. He hett 53,06 % von de Stimmen kregen un kunn sik dormit gegen Candice Pitts von de PUP dörsetten. Dormit is he siet November 2020 Maat von dat Repräsentantenhuus von Belize.

Weblenken[ännern | Bornkood ännern]

Commons-logo.svg Shyne. Mehr Biller, Videos oder Audiodateien to’t Thema gifft dat bi Wikimedia Commons.