Michael Finnegan (Politiker)

Michael Kwame Finnegan (boren as Michael Myvett; * 18. Januar 1950) is en Politiker ut Belize (UDP).

Michael Myvett is 1950 boren un in Belize-Stadt opwussen. Siene Süster, Frances Imeon Myvett, hett mit Dean Barrow den Söhn Jamal Michael Barrow (bekannt as Rapper Shyne).

As jungen Mann weer Myvett in dat Ad Hoc Committee for the Truth About Vietnam aktiv un hett sik gegen den Vietnamkrieg insett. 1970 is he Maat von de United Black Association for Development (UBAD) worrn. He hett sien Naam op Michael Kwame Finnegan ännert. Al 1972 hett he sik von de UBAD un ehren Anföhrer Evan X Hyde wedder afwennt.

As sik denn 1973 de United Democratic Party (UDP) grünnt hett, is Finnegan dor Maat worrn. He weer denn lange Tied Wahlkämpfer för de UDP un Redaktör bi dat UDP-Parteibladd The Beacon.

Twüschen 1984 un 1989 weer he för de UDP as Regerungspartei Maat von’n Senaat von Belize.

Bi de Parlamentswahl in Belize 1993 weer he Kannedaat för de UDP in’n Wahlkreis Mesopotamia un hett de Wahl mit 58,0 % von de Stimmen gegen Steve Latchman von de PUP wunnen. Ok bi de Wahlen 1998 (56,58 % von de Stimmen gegen Gilbert Ray Lightburn, PUP), 2003 (66,92 % gegen Philip Brackett, PUP), 2008 (76,92 % gegen Austin Waight, PUP), 2012 (81,60 % gegen Philip Palacio, PUP) un 2015 (76,88 % gegen Dorla Vaughan, PUP) kunn he sik in’n sülven Wahlkreis ok wedder dörsetten.

Dormit is he siet 30. Juni 1993 Afornten von dat Repräsentantenhuus von Belize. Twüschen 1993 un 1998 weer he ünner Premierminister Manuel Esquivel Staatsminister in dat Ministerium för Huusbo, Stadtentwicklung un Kooperativen. Von 1998 bet 2008 hett he mit de UDP in de Oppositschoon seten.

He is siet 11. Februar 2008 ünner Premierminister Dean Barrow Minister för Huusbo un Stadtentwicklung (Kabinett Barrow I, II un III).

Ehren

2010 is en ne’e Markthall in Belize-Stadt na em Michael Finnegan Market nöömt worrn.