Eamon Courtenay
Eamon Harrison Courtenay (* 11. Juni 1960[1]) is en Avkaat un Politiker ut Belize (PUP).
Courtenay is 1960 as Söhn von Audrey Courtenay (1931/1932–2012) un den Politiker Vernon Harrison Courtenay (1932–15. August 2009) boren. He hett von 1981 bet 1984 an de University of Texas in Austin latienamerikaansche Studien studeert un dat Studium mit en Bachelor of Arts afslaten.[2][3] Von 1984 bet 1986 hett he an de University of the West Indies in Cave Hill (Bachelor of Laws) un von 1986 bet 1988 an de Norman Manley Law School in Kingston (Legal Education Certificate) Juristeree studeert.[2][3] He is 1988 as Avkaat tolaten worrn.[2] Von 1988 bet 1999 hett he in de Kanzlie W. H. Courtenay & Co. arbeidt, de sien Grootvader Woldrich Harrison Courtenay grünnt un later sien Vader föhrt hett.[2] Siet 2007 praktizeert he tohoop mit Christopher Coye in de Kanzlie Courtenay Coye LLP in Belize-Stadt.[2]
Von 1999 bet 2002 weer he Geschäftsföhrer von’n Belize Trade & Investment Development Service (BELTRAIDE). Siet 1999 höört he ok to dat Verhandlungsteam, dat in’n Grenzkunflikt twüschen Belize un Guatemala mit Guatemala verhannelt.
Ünner Premierminister Said Musa is he 1998 in’n Senaat beropen worrn un weer in dat Kabinett Musa II von 2003 af an denn ok Minister för Investment un Butenhannel.[4] An’n 5. Januar 2004 is he tosätzlich Generaalstaatsanwalt von Belize worrn, nadem Godfrey Smith düt Amt opgeven müss.[5] Dorbi müss he aver dat Themenfeld Investment an Mark Espat afgeven.[5]
He hett sienen Posten as Generaalstaatsanwalt an’n 18. August 2004 na ene Regerungskries afgeven, as rutkamen is, dat Finanzminister Ralph Fonseca Geller ut’n Soziaalversekerungsfonds bruukt hett, üm Kredite von private Ünnernehmens aftosekern.[6] Courtenay un söss annere Ministers hebbt Musa opfeddert, Fonseca ut dat Kabinett ruttosmieten.[6] As Musa dat nich daan hett, wullen de söven Ministers (de Grupp is von de Medien in Belize „G7“ döfft worrn) all gemeensaam jemehr Ämter afgeven.[6] Musa kunn den Rüggtridd afwennen un Courtenay is tominnst Minister för Investment un Butenhannel bleven. An’n 29. Dezember 2004 hett Courtenay denn aver in en Naklapp to de Regerungskries ok düt Amt afgeven. Ok ut’n Senaat is he rut.
Von 2004 bet 2006 weer Courtenay Viez-Vörsitter von de Belize Bank.
Von’n 12. April 2006 bet 5. Juni 2007 weer he för de Regerungspartei PUP en tweet Maal Senater un as Butenminister Maat von dat Kabinett von Said Musa.
In’n November 2007 is he as Maat in de Stännige Kummission von de Internatschonale Roodkrüüz- un Roodhalvmaand-Bewegung wählt worrn.[7]
In’n März 2016 is he von de Oppositschoonspartei PUP as Senater beropen worrn.[8] Düt Amt hett he an’n 11. Juni 2019 wedder afgeven. För em is Michel Chebat narückt.[9]
Courtenay is verheiraadt mit Denise Courtenay, borene Mitchell. De beiden hebbt twee Kinner.[3]
Footnoten
[ännern | Bornkood ännern]- ↑ Indrag op rulers.org
- ↑ a b c d e Indrag to Courtenay bi Courtenay Coye LLP
- ↑ a b c Bio of New Minister of Foreign, Wikileaks
- ↑ New 13 member Cabinet sworn in, Channel 5 Belize an’n 7. März 2003
- ↑ a b Cabinet has new look for 2004, Channel 5 Belize an’n 5. Januar 2004
- ↑ a b c Seven GOB ministers resign!, San Pedro Sun an’n 19. August 2004
- ↑ Indrag to Courtenay, Websteed von de PUP
- ↑ New PUP senators to be installed in time for budget debate, Amandala an’n 5. März 2016
- ↑ Aaron Humes: Eamon Courtenay resigns as Senator, Breaking Belize News an’n 21. Juni 2019
1981–1984: Said Musa | 1984: Vernon Harrison Courtenay | 1984–1986: Hubert Elrington | 1986–1989: Dean Barrow | 1989–1993: Glenn Godfrey | 1993–1998: Dean Barrow | 1998–1999: Richard Bradley | 1999–2003: Godfrey Smith | 2003–2004: Eamon Courtenay | 2004–2008: Francis Fonseca | 2008–2010: Wilfred Elrington | 2010–2012: Bernard Q. Pitts | 2012–2015: Wilfred Elrington | 2015–2017: Vanessa Retreage | 2017–2020: Michael Peyrefitte | 2020–: Magali Marin-Young
1981–1983: George Cadle Price | 1983–1984: Vernon Harrison Courtenay | 1984–1989: Dean Barrow | 1989–1993: Said Musa | 1993–1998: Dean Barrow | 1998–2002: Said Musa | 2002–2003: Assad Shoman | 2003–2006: Godfrey Smith | 2006–2007: Eamon Courtenay | 2007–2008: Lisa Shoman | 2008–2020: Wilfred Elrington | 2020–: Eamon Courtenay