Amtsgericht Oosterholt-Scharmbeek

Dat Amtsgericht Oosterholt-Scharmbeek is een von de teihn Amtsgerichten in’n Landgerichtsbezirk Veern. Dat hett sien Seet in dat Gebüüd an’n Kloosterplatz 1 in Oosterholt-Scharmbeek in’n Landkreis Oosterholt.

Överornt Gerichten

Dat Amtsgericht Oosterholt-Scharmbeek sünd in’n Instanzentog dat Landgericht Veern, dat Oberlandsgericht Celle un de Bundsgerichtshoff in Karlsruhe överornt.

Den Gerichtsbezirk billt de Landkreis Oosterholt.

Siet 2005 is dat Amtsgericht Wasra för dat Hannels-, Genossenschafts- un Vereensregister in’n kumpletten Landgerichtsbezirk Veern tostännig. Dat Partnerschopsregister warrt siet 1. August 2005 zentraal bi dat Amtsgericht Hannover föhrt. För Insolvenzverfohren is dat Amtsgericht Veern tostännig.

Geschicht

Mit dat hannöversche Gerichtsverfatensgesett von’n 8. November 1850, dat an’n 1. Oktober 1852 in Kraft gahn is, sünd Verwaltung un Justiz kumplett trennt worrn un de Amtsgerichten sünd as ünnerst Gerichten inricht worrn. Dat Amtsgericht Oosterholt is dor denn blangen dat Amt Oosterholt nee schapen worrn. De Grenzen von Amt un Amtsgerichtsbezirk weren desülven.

1859 is dat Amtsgericht Beverst oplööst worrn. De Gemenen Steern, Paddewisch, Ollendörp, Giehl, Giehlermöhlen un Giehlermoor ut’n Amtsgerichtsbezirk Beverst sünd dorbi Deel von’n Bezirk von dat Amtsgericht Oosterholt worrn. Dör en Verordnung von’n 22. Juni 1859 sünd later ok noch de Öörd Ahrensdörp (von dat Amtsgericht Bremervöör) un Helljes (von dat Amtsgericht Leh) an dat Amtsgericht Oosterholt kamen.

Mit de Veerte Verordnung över den Neeopbo von dat Riek sünd an’n 1. November 1939 grote Delen von dat Rebeed noorden de Lesum Deel von Bremen worrn. Dor sünd denn ok de Amtsgerichtsbezirken bi afännert worrn. Dat Amtsgericht Oosterholt-Scharmbeek hett dorbi von dat Amtsgericht Leendaal de Gemeen Huttenbusch tokregen un von de Amtsgerichten Blomendal un Lesum, de nu an Bremen fullen weren, all Rebeden, de bi Prüßen bleven sünd.