Obergericht Veern

Dat Obergericht Veern weer en Obergericht in dat Königriek Hannover. Dat harr sien Seet in Veern.

Geschicht

Mit dat hannöversche Gerichtsverfatensgesett von’n 8. November 1850, dat an’n 1. Oktober 1852 in Kraft gahn is, sünd Verwaltung un Justiz kumplett trennt worrn un de Amtsgerichten sünd as ünnerst Gerichten inricht worrn. Över de Amtsgerichten weren Obergerichten sett.

To dat Obergericht Veern hebbt de teihn Amtsgerichten Achem, Blomendal, Leendaal, Lesum, Oosterholt, Otterbarg, Rodenborg, Snevern, Veern un Zeven tohöört.

As 1859 dat Obergericht Leh dichtmaakt worrn is, is dat Amtsgericht Oterndörp ut’n Bezirk von dat Obergericht Leh in’n Bezirk von dat Obergericht Stood wesselt. De Rest von’n Gerichtsbezirk is in’n Bezirk von dat Obergericht Veern wesselt. Gliektiedig hett dat Obergericht Veern dat Amtsgericht Zeven an den Bezirk von dat Obergericht Stood afgeven.

Na 1859 hebbt to dat Obergericht Veern de Amtsgerichten Achem, Blomendal, Dorum, Hagen, Leh, Leendaal, Oosterholt, Rodenborg un Veern tohöört.^[1]

Nadem Prüßen 1866 dat Königriek Hannover innahmen hett, is dat Obergericht Veern en prüüßsch Obergericht worrn. Mit de Rieksjustizgesetten 1877 sünd de Obergerichten 1879 denn ümwannelt worrn in Landgerichten. Dat Obergericht is övergahn in dat Landgericht Veern.