Leessem (Stroom)

Vun Wikipedia
(wiederwiest vun Lesum (Stroom))
Zur Navigation springen Zur Suche springen
Leessem
Laag Bremen
Stroomsystem Werser
Läng 10 km
Born flütt tohoop ut Wümm un Hamm (op 2 m över NN)
Münn bi Vesack in de Werser (op 0 m över NN)
Afströömrebeed 2.188 km²
Water je Sekunn 23 m³/s
linke Blangenströöm Maschinenfleet
rechte Blangenströöm Ihl
schippbor 9.85
De Münn von de Leessem
Brügg von de A 27 över de Leessem un Münn von dat Maschinenfleet
Leessem bi Borgleessem

De Leessem (hoochdüütsch Lesum) is en teihn Kilometer langen Stroom in’n Noorden von Bremen, de von rechts rin’e Werser flütt.

De Leessem fangt an de Steed an, an de Hamm (bet dorhen 48 Kilometer lang) un Wümm (118 Kilometer) tohoopfleten doot. Dat is twischen Hu’e un Waterhorst an de Landsgrenz na Neddersassen. Na so annerthalv Kilometer flütt von links de Maschinenfleet rin’e Leessem un kort later geiht de Brügg von de A 27 över den Stroom. Na noch wedder annerthalv Kilometer gaht de Iesenbahnlienen na Bremerhoben un Vesack un de Börger Heerstraat mit Brüggen över de Leessem. Denn noch een Kilometer wieder münnt von rechts de Ihl in de Leessem.

Twee Kilometer vör de Münn liggt dat Leessem-Sparrwark, dat von 1971 bet 1974 boot worrn is un dat Achterland vör Stormfloden schuult. De Münn sülvs liggt bi Vesack.

De Leessem flütt dicht bi de Süüdkant von de Oosterholter Geest langs. In’n Süden von’n Stroom liggt Maschland, dat in’n Westen von Grambk as Werderland betekent warrt.

An’n 10. Mai 1669 is en Dwargwaal-Seken verbiestert un in de Leessem rinswummen. Dor is dat denn schaten worrn. De Nordische Mercurius hett dor von bericht: Es ist gestern / nahe bei hiesiger Stadt / in einem Flusse / Lessum genannt / welcher ein Arm aus der Weser ist / ein Wallfisch / dessen Länge 29 Fuß ist / geschossen / und heute vor diese Stadt gebracht worden / Alles Stadtvolk läuft dahin / selbigen zu sehen.

De Bremers sind dor över mit de Sweden in Stried kamen, de de Landsherrn över Bremen-Veern ween sünd. De Bremers hebbt sik aver dörsett un dröffen den Waal verarbeiden. Dat Skelett hängt vondaag in dat Överseemuseum. De Bremer Raad hett bi Franz Wulfhagen en Bild von’n Waal in Opdrag geven, dat nu in de Raadhuushall hängt.

Üm den Övergang över de Leessem to schulen hett dat bi Grambk en Borg geven, de 1277 toeerst in de Oorkunnen vörkeem. 1388 hett de Stadt Bremen von dor en Straat mit Damm un Brügg över de Lessem hen na de Geest op de anner Sied boon laten. Na’n Dörtigjohrigen Krieg weren Borg un Övergang strategisch wichtig in’n Kunflikt twischen Bremen un de Sweden, de dat Arzbisdom Bremen besett harrn. Dorbi is de Borg an’n 14. Juli 1653 dalmaakt worrn. In’n Eerst Breemsch-Sweedschen Krieg hebbt Bremer un Sweden denn hart üm de Börger Schanz fuchten un de Schanz hett en poor Maal den Besitter wesselt.

Bet to’n 1. November 1939 weer de Leessem Grenzstroom twischen Bremen un dat Königriek Hannover un later de prüüßsche Provinz Hannover. Mit de Veerte Verordnung över den Neeopbo von dat Riek is dat Rebeed in’n Noorden von de Leessem ok Deel von Bremen worrn.

De Leessem hett op de vulle Längd Tiden un is Bundswaterstraat („Ls“)[1] mit de Waterstratenklass III, op de de Seeschippfohrtsstraten-Ordnung gellt; tostännig is dat Water- un Schippfohrtsamt Bremen. Op de Leessem köönt gröttere Binnenscheep un bet na de Iesenbahnbrüg bi Borg Küstenmotorscheep föhren. De Afsnidd twischen Sparrwark un Stratenbrügg is för de Beroopsschippfohrt von ring Bedüden un warrt vör allen as Sporthaven bruukt. En Barg Bootssteeg liggt hier. Twischen Sparrwark un Münn liggt de Grohner Jachthaven.

Footnoten[ännern | Bornkood ännern]

  1. Verzeichnis E, Lfd.Nr. 29 der Chronik, Wasser- und Schifffahrtsverwaltung des Bundes

Weblenken[ännern | Bornkood ännern]

Commons-logo.svg Leessem (Stroom). Mehr Biller, Videos oder Audiodateien to’t Thema gifft dat bi Wikimedia Commons.


Koordinaten:53° 10′ N, 8° 38′ O