Schmomöhlen

Wapen/Flagg	Koort
Basisdaten
Bundsland: Neddersassen Landkreis: Veern Gemeen: Kerklinneln
Inwahners:
Postleettall:	27308
Vörwahl:	04237
Geograafsche Laag:	52° 57′ N, 9° 23′ O

Windmöhl in Schmomöhlen

Möllerhuus bi de Möhl

Schmomöhlen (hoochdüütsch Schmomühlen) is en lütten Oort in de Gemeen Kerklinneln in’n Landkreis Veern, Neddersassen. Binnen de Gemeen Kerklinneln höört de Oort to de polietsche Oortschop Brouk.

Geografie

De Oort liggt op de Linnelner Geest dicht an’n Schmobeek, de later in’n Gohbeek münnt.

De Naveröörd sünd Lüttjen Zähln un Groten Zähln in’n Noordoosten, Brouk un Bennbössel in’n Oosten, Huxhaal un Kohlenföör in’n Süüdoosten, Ramels un Kerklinneln in’n Süüdwesten, Lüttjen Linneln in’n Westen un Brammer un Kreepm in’n Noordwesten.

Historie

De Oort geiht trügg op en Watermöhl an’n Schmobeek ut de Tied üm 1500. Nadem de Schmobeek bilütten weniger Water föhren dee, is 1843 bet 1845 von’n Möller Heinrich Badenhoop in de Neegd en Windmöhl boot worrn (1848 kumplett trech worrn). 1904 hett Heinrich Bremer den Galeriehollanner för 12.000 Goldmark köfft. In de Johren 1930 hett en Warvelwind de Flögels von de Möhl afreten. Von 1945 bet 1988 is denn elektrisch mahlt worrn, aver vör allen blots noch för den Egenbedarf. Von 1990 bet 1993 is de Möhl von’n Landkreis Veern saneert worrn un dat Gebüüd warrt nu för Veranstaltungen un Utstellungen bruukt.

Verwaltungsgeschicht

In de Franzosentied von 1810 bet 1814 hett de Oort to de Mairie Kerklinneln in’n Kanton Veern höört. Dat Rebeed hett in disse Tied 1810 to dat Königriek Westfalen un von 1811 bet 1814 to dat Franzöösche Kaiserriek ünner Napoleon höört.

De Oort hett vör 1885 to de Vaagdie Kerklinneln in dat Amt Veern tohöört. Na 1885 weer dat in’n Kreis Veern, de 1932 mit’n Kreis Achem to’n ne’en un grötteren Kreis Veern tohoopgahn is.

De Oort höört von öllers bi de Gemeen Brouk mit bi, de an’n 1. Juli 1972 mit de Gemeenreform in Neddersassen Deel von de Gemeen Kerklinneln worrn is. Sietdem höört dat to de Oortschop Brouk.

Inwahnertall

Johr	Inwahners
1791-00-001791	1 Füürsteed
1812-00-001812	9
1824-00-001824	1 Füürsteed
1848-00-001848	4 Lüüd, 1 Huus
1871-12-011. Dezember 1871	6 Lüüd, 1 Huus
1885-12-011. Dezember 1885	16 Lüüd, 2 Hüüs
1905-12-011. Dezember 1905	9 Lüüd, 2 Hüüs

Religion

Schmomöhlen is evangeelsch-luthersch präägt un höört to dat Kaspel von de Petrus-Kark in Kerklinneln.

För de Kathoolschen is de St.-Josef-Kark in Veern tostännig.

Kultur

Verenen

Sport warrt in’n TSV Brouk bedreven un Schüttensport in’n Schüttenvereen Lüttjen Linneln.

Weertschop un Infrastruktur

För Schmomöhlen is de freewillige Füürwehr Zähln mit tostännig. Bet 2000 weer dat noch de Freewillige Füürwehr Brouk, de denn aver oplööst worrn is.

Verkehr

Schmomöhlen liggt an en Siedenstraat von de Kreisstraat 22, de in’n Süüdwesten in Lüttjen Linneln an de Landsstraat 171 ran geiht un in’n Süüdoosten över Brouk un Bennbössel ok an L 171 ran. De L 171 föhrt in’n Westen na Kerklinneln un Veern un in’n Noordoosten över Jeddingen na Visselhöövd. En lüttjere Straat löppt von Schmomöhlen in’n Noordoosten na Groten Zähln un Lüttjen Zähln.

De nächste Autobahn is de Autobahn 27 (Afsnidd Bremen–Wasra). De Opfohrt 26 Veern-Oost is söven Kilometer wied weg in’n Süüdwesten von Schmomöhlen an de L 171.

De nächste Bahnhoff is so bi ölven Kilometer in’n Süüdwesten de Bahnhoff Veern an de Bahnlien Wunsdörp–Bremen. Disse Bahnhoff is ok inbunnen in dat Nett von de Regio-S-Bahn Bremen/Neddersassen. De Bahnhoff Bennbössel an de Bahnlien Ülzen–Langwedel (inricht 1873) weer dree Kilometer in’n Oosten, is aver 1987 dichtmaakt worrn.

Scholen

De Kinner ut Schmomöhlen sünd fröher in Lüttjen Zähln na de Volksschool gahn. Nadem de School dichtmaakt hett, gaht se vondaag op de Lintler Geest-School in Bennbössel.

Literatur

• Robert Kienzle: Chronik der Gemeinde Brunsbrock: Ortsteile, Brunsbrock, Klein-Linteln, Schmomühlen, Huxhall, Kohlenförde. 1956