Robert Kienzle
Robert Kienzle (* 19. März 1918 in Gnadental; † 12. Januar 1993 in Veern) weer en düütschen Heimatforscher.[1]
Leven[ännern | Bornkood ännern]
Kienzle is 1918 as Söhn von de bessarabiendüütschen Buurnslüüd Maria, borene Deiß, un Eduard Kienzle in Gnadental in Bessarabien boren.[1] 1928 is de Familie na Kolatschowka ümtagen.[1] Kienzle weer von 1930 bet 1938 op dat Lehrerseminar in Sarata un hett dor de Eerste Lehrerprüfung maakt.[1] He weer denn Schoolmeester un Köster in Baimaklia un müss bet 1940 Militärdeenst för Rumänien maken.[1] Nadem an’n 28. Juni 1940 de Sowjetunion dat vörher rumäänsche Bessarabien besett harr, sünd de Bessarabiendüütschen in’n September 1940 in dat Düütsche Riek ümsiedelt worrn, so as dat de Düütsch-Sowjetsche Grenz- un Fründschopsverdrag vörsehn harr. Kienzle keem över Öösterriek na Westprüßen.[1] Dor hett he 1942 in Hohenlinden de Twete Lehrerprüfung maakt.[1] In dat sülve Johr is he as Soldaat in de Wehrmacht intagen worrn.[1] In’n Oktober 1943 keem he denn in Italien in Kriegsfungenschop.[1] In de Tied as Kriegsfungenen kunn he aver de Prüfung as Realschoollehrer maken.[1] In’n Februar 1947 keem he ut dat Lager in Grootbritannien wedder free un güng na Veern, wo siene Fro un siene Dochter ünnerkamen weren.[1]
He weer von 1947 bet 1950 Schoolmeester an de Volksschool Möhlendoor, 1950 bet 1963 an de Volksschool Brouk un von 1964 bet 1978 an de School Kerklinneln.[1] Dor weer he toletzt ok Rekter.[1] 1978 is he von wegen en Krankheit an’t Hart vör de Tied in Rohstand gahn.[1]
1964 hett he de Gemeenbökeree in Kerklinneln in’t Leven ropen. Von 1957 af an weer Kienzle ok Rutgever von’n Heimatkalender für den Kreis Verden (de eerste Johrgang weer för 1958) un hett dor en ganze Reeg Bidrääg för schreven.[1] De letzte Utgaav, de vör allen von em keem, weer de Johrgang 1989.[1] Ok den Heimatkalender — Jahrbuch der Deutschen aus Bessarabien hett he mit rutgeven.[1] 1962 hett he de Opgaav övernahmen, as Archivpleger en Kreisarchiv von’n Landkreis Veern optoboon.[1] He is bet 1988 Kreisarchivpleger bleven.[1]
An’n 31. Oktober 1980 hett Kienzle för sien Arbeid dat Verdeenstkrüüz an’t Band von’n Neddersassischen Verdeenstorden kregen.[1]
Kienzle hett an’n 9. September 1942 Elfriede Braun freet.[1] De beiden harrn twee Döchter.[1]
Warken[ännern | Bornkood ännern]
- Ortschronik Schaphusen. 1950
- Chronik der Gemeinde Brunsbrock: Ortsteile, Brunsbrock, Klein-Linteln, Schmomühlen, Huxhall, Kohlenförde. 1956
- Chronik Kirchlinteln. 1969
- Landkreis Verden — Heimat für 87.000. 1969