Petrus-Kark (Mulsen)

Vun Wikipedia
De Kark
De Karkhoff

De Petrus-Kark is en evangeelsch-luthersche Kark in Mulsen. De Kark höört to’n Karkenkreis Buxthu in’t Sprengel Stood von de Landskark Hannover.

Karkenhuus[ännern | Bornkood ännern]

De eerste Kark in Mulsen weer en lüttje Dööpkapell, de 786 von Willehad anleggt worrn is. Üm 1100 rüm is Mulsen denn en egen Kaspel worrn.

Dat hüdige Karkenschipp is eerst 1801 boot worrn un in Feldsteen utföhrt. De Karkentoorn is 1782 för 2000 Rieksdaler nee boot worrn, nadem de ole instört weer.

Örgel[ännern | Bornkood ännern]

De Örgel is 1869/1870 von Johann Hinrich Röver op de Westempore opboot worrn. 1989/1090 hett Martin Haspelmath ehr renoveert.


Dispositschoon
I Manuaal C–f3
Bordun 16′
Prinzipal 8′
Hollflööt 8′
Octaav 4′
Octaav 2′
Mixtur IV
Trumpeet 8′
II Manuaal C–f3
Traversflööt 8′
Gedact 8′
Gedactflööt 4′
Flööt 2′
Pedaal C–d1
Subbass 16′
Prinzipaalbass 8′
Gedactbass 8′
Oktaav 8′
Posaun 16′
  • Koppeln: II/I, I/P (II/P koppelt dör)

Binnen[ännern | Bornkood ännern]

De Altar mit Altarschranken wiest Jesus Christus, as he starvt. To’n Altar höört en Altarbibel ut dat Johr 1702 von Casper Holwein ut Stood. De Kanzel is över’n Altar un driggt Hilligenfigurn.

In’n Toorn gifft dat veer Klocken ut Bronz, de ut de Johren 1960 stammen doot. Vörher harr de Kark Stahlklocken ut dat Johr 1925.

Buten[ännern | Bornkood ännern]

Fröher sünd de Doden rund üm de Kark begraven worrn. Dat güng bet 1874 as de Karkhoff Mulsen an de Schierler Straat anleggt worrn is.

Kaspel[ännern | Bornkood ännern]

To dat Kaspel Mulsen höört de Öörd Mulsen, Kutenhult, Swing, Eßel, Soors, Aasp, Lütt Aasp, Tinst, Tinsterholt, Bullenholt, Hemelingbossel, Hogenoher Forth un de Kutenhulter Deel von Hogenmoor to.

De Naverkaspels sünd Olendörp in’n Noorden, de Markus- un Johannis-Kark in Stood in’n Noordoosten, Freenbeek in’n Westen, Bargst in’n Süüdoosten, Sürsen in’n Süden, Heesdörp in’n Süüdwesten, Bremervöör in’n Westen un Öölm in’n Noordwesten.

Bet in dat 14. Johrhunnert hebbt ok Ohlers, Bevern un Hagen noch mit bi dat Kaspel Mulsen höört.

In dat Vörder Register sünd üm 1500 de Öörd Mulsen, Eßel, Heesdörp, Swing, Groot Freenbeek, Lüttjen Freenbeek, Wehl, Aasp un Hemelingbossel (Mulsum, Etzell, Heßedorpe, Swynge, Groten Vredenbeck, Lütken Vredenbeck, Wedell, Aspe un Heymenkenbostel) as Deel von dat Kaspel Mulsen angeven.

De Oort Heesdörp is 1759 von dat Kaspel Mulsen in dat Kaspel Bevern wesselt, wat dichter bi weer (vondaag hett Heesdörp mit de Fredenskark sogor en egen Kark).

Freenbeek hett in de Johren 1950 mit de Martin-Luther-Kark sien egen Kark kregen un ok de Dörper ümto sünd in düt Kaspel wesselt. De Öörd Öölmerheid, Schierel un de Öölmer Deel von Hogenmoor hebbt fröher ok to dat Kaspel Mulsen höört, sünd aver an dat Kaspel von de Paul-Gerhardt-Kark in Öölm gahn, as düt Kaspel 1992 egenstännig worrn is.

Dat Kaspel Mulsen weer fröher Deel von dat Bisdom Bremen un leeg an de Grenz na dat Bisdom Veern. De Otter in’n Süden weer de Grenz twüschen dat Bremer Kaspel Mulsen un dat Veerner Kaspel Sürsen.

Pastoorn[ännern | Bornkood ännern]

  • 2015–2020: Keno Eisbein

Weblenken[ännern | Bornkood ännern]

Petrus-Kark (Mulsen). Mehr Biller, Videos oder Audiodateien to’t Thema gifft dat bi Wikimedia Commons.


Koordinaten:53° 31′ N, 9° 18′ O