Ohlers

Vun Wikipedia
Zur Navigation springen Zur Suche springen
Wapen/Flagg Koort

Wapen vun Ohlers

Ohlers
Laag vun Ohlers in Düütschland
Basisdaten
Bundsland: Neddersassen
Landkreis: Stood
Samtgemeen: Harsfeld
Gemeen: Ohlers
Inwahners:
Postleettall: 21702
Vörwahl: 04166
Geograafsche Laag:
Koordinaten:53° 24′ N, 9° 27′ O
53° 24′ N, 9° 27′ O
Luftbild von Ohlers 2013

Ohlers (hoochdüütsch Ahlerstedt) is de Hauptoort von de Gemeen Ohlers in de Samtgemeen Harsfeld in’n Landkreis Stood.

Geografie[ännern | Bornkood ännern]

De Oort liggt op de Stoder Geest. Dat Water ut dat Rebeed flütt över de Au af, de in en groten Bagen in’n Süden üm Ohlers rüm flütt. Dat Rebeed in’n Noordoosten steiht as Braken, Harslah, Kahl un Wild Moor ünner Naturschuul.

De Naveröörd sünd Hollenbeek in’n Noorden, Harsfeld un Griemshorst in’n Noordoosten, Ohrensmoor-Noord in’n Oosten, Ohrensmoor-West un -Oost in’n Süüdoosten, Ohrenswohl un Bokel in’n Süden, Klethen un Ottendörp in’n Süüdwesten, Örsdörp in’n Westen un Bookholt un Kokerbeek in’n Noordwesten.

Historie[ännern | Bornkood ännern]

Dat eerste Mool is Ohlers 1095 in en Uurkunn beneumt worrn.

1825 is von Ohlers ut in dat Moor in’n Süüdoosten de Anbo Lütt Ohlers anleggt worrn. 1955 hett Ohlers düssen Oort aver an Ohrensmoor afgeven.

In’n Eersten Weltkrieg sünd 33 Soldaten ut Ohlers fullen oder vermisst un in’n Tweten Weltkrieg 60.[1]

Verwaltungsgeschicht[ännern | Bornkood ännern]

In de Franzosentied hett de Oort toeerst 1810 bet 1811 binnen dat Königriek Westfalen to de Mairie Ohlers in’n Kanton Harsfeld höört un denn von 1811 bet 1814 to dat Franzöösche Kaiserriek ünner Napoleon un dor to de Mairie Ohlers in’n Kanton Hornborg.

Vör 1885 weer dat Dörp in de Böörd Ohlers binnen dat Amt Harsfeld. Na 1885 hett dat denn to’n Kreis Stood höört un von 1932 af an to’n hüdigen Landkreis Stood.

Von 1967 bet to’n 1. Juli 1972 weer de Oort Liddmaat von de Samtgemeen Ohlers. Mit de Gemeenreform in Neddersassen an’n 1. Juli 1972 is Ohlers mit de Gemenen Ohrensmoor, Ohrenswohl, Bokel, Kokerbeek, Örsdörp, Ottendörp un Wangersen to de ne’e, veel gröttere Gemeen Ohlers tohoopslaten worrn. De Samtgemeen Ohlers hett sik dorbi oplööst un Ohlers is nu Deel von de Samtgemeen Harsfeld.

Inwahnertall[ännern | Bornkood ännern]

Johr Inwahners
1791-00-00 1791[2] 32 Füürsteden
1824-00-00 1824[3] 36 Füürsteden
1848-00-00 1848[4] 421 Lüüd. 73 Hüüs
1871-12-011. Dezember 1871[5] 448 Lüüd. 77 Hüüs
1885-12-011. Dezember 1885[6] 427 Lüüd. 83 Hüüs
1905-12-011. Dezember 1905[7] 473 Lüüd. 87 Hüüs
1910-12-011. Dezember 1910[8] 604
1925-00-00 1925[9] 737
1933-00-00 1933[9] 750
1939-00-00 1939[9] 746

Religion[ännern | Bornkood ännern]

Kark Ohlers

Ohlers is evangeelsch-luthersch präägt un billt mit de Kark Ohlers en egen Kaspel. De hüdige Kark is von 1865.

För de Kathoolschen is de St.-Michaels-Kark in Harsfeld tostännig, de siet 1. September 2010 to de Karkengemeen Mariä Himmelfohrt in Buxthu höört.

De ort hett en egen Karkhoff an de Kokerbeker Straat.

Kultur un wat to bekieken is[ännern | Bornkood ännern]

En Denkmaal för de Fullenen ut de twee Weltkrieg’ steiht in Ohlers an de Hauptstraat. Dat Denkmaal is ok för de 21 Fullenen dor, de ehr Verwandte an’t Enn von’n Tweten Weltkrieg as Verdrevene na Ohlers kamen sünd.

In Ohlers warrt jümmer an’n eersten Advent bi de Kark Wiehnachtsmarkt fiert.

Theater[ännern | Bornkood ännern]

De plattdüütsche Theotergrupp "De Auetaler" wiest jedet Johr een Stück in'n Schützenhoff Ohlers.

Verenen[ännern | Bornkood ännern]

In Ohlers gifft dat mit den SV Ohlers/Ottendörp en Footballvereen, de bi de Froonslüüd in de Regionalliga Noord un bi de Mannslüüd in de Landsliga Lümborg speelt. De Schüttenvereen Ohlers is 1925 grünnt worrn.

Weertschop un Infrastruktur[ännern | Bornkood ännern]

Ohlers gellt na dat Regionale Ruumordnungsprogramm as Grundzentrum för de Öörd in de Ümgegend.

De Oort hett en egene freewillige Füürwehr, de an’n 2. Februar 1888 grünnt worrn is. Aver ok vörher hett dat in Ohlers för den Brandfall en Handdrucksprütt geven. Düsse freewillige Füürwehr is 1902 aver in en Plichtfüürwehr ümwannelt worrn. Eerst an’n 20. Februar 1935 is dor wedder en freewillige Füürwehr von worrn.

De Kreisspoorkass Stood hett in Ohlers in de Stoder Straat 9 en Filiaal.

Verkehr[ännern | Bornkood ännern]

Dör Ohlers löppt de Landsstraat 124, de in’n Süüdwesten över Wangersen na Heeßel un Zeven an de Bundsstraat 71 föhrt un in’n Noorden na Harsfeld un Stood. De Kreisstraat 74 geiht in’n Noordwesten na Kokerbeek, de K 75 in’n Oosten na Ohrensmoor-Noord an de L 127 (von dor na Obbens un Buxthu), de K 54 in’n Süüdoosten na Ohrenswohl un de K 54 in’n Süüdwesten na Klethen un Ottendörp.

De nächste Autobahn is de Autobahn 1 (Afsnidd HamborgBremen). De Opfohrt 47 Zittens liggt so 14 Kilometer in’n Süden von Ohlers an de L 130.

De nächste Bahnhoff is so bi söven Kilometer wied weg in’n Noordoosten de Bahnhoff Harsfeld an de Bahnlien Bremerhoben–Buxthu.

Scholen[ännern | Bornkood ännern]

In Ohlers gifft dat de Grundschool Ohlers un de Oberschool Ohlers.

Ver- un Entsorgung[ännern | Bornkood ännern]

Dat Afwater ut Ohlers warrt över dat Kanaalnett na dat Klärwark Bookholt afföhrt un dor reinigt.

Bekannte Lüde ut Ohlers[ännern | Bornkood ännern]

De plattdüütsche Schriever Heinrich Behnken is 1880 in Ohlers boren un de Anatomin Elke Lütjen-Drecoll 1944. De Archäoloog Willi Wegewitz hett in Ohlers as Schoolmeester arbeidt.

Footnoten[ännern | Bornkood ännern]

  1. Onlineprojekt Gefallenendenkmäler
  2. Christoph Barthold Scharf: Statistisch-Topographische Samlungen zur genaueren Kentnis aller das Churfürstenthum Braunschweig-Lüneburg ausmachenden Provinzen. Meier, Bremen 1791, Sied 5
  3. Curt Heinrich Conrad Friedrich Jansen: Statistisches Handbuch des Königreichs Hannover. Hannover 1824, Sied 8
  4. Friedrich Wilhelm Harseim, Carl Schlüter: Statistisches Handbuch für das Königreich Hannover. Schlütersche Hoffbookdruckeree, Hannover 1848, Sied 133
  5. Die Gemeinden und Gutsbezirke des Preussischen Staates und ihre Bevölkerung. Berlin 1873, Sied 140
  6. Gemeindelexikon für das Königreich Preußen. Auf Grund der Materialien der Volkszählung vom 1. Dezember 1885. Verlag des Königlichen statistischen Bureaus, Berlin 1888, Sied 148
  7. Gemeindelexikon für das Königreich Preußen. Auf Grund der Materialien der Volkszählung vom 1. Dezember 1905. Verlag des Königlichen statistischen Landesamtes, Berlin 1908, Sied 158
  8. Inwahnertallen op gemeindeverzeichnis.de
  9. 9,0 9,1 9,2 Inwahnertallen op verwaltungsgeschichte.de