Oterndörp

Vun Wikipedia
(wiederwiest vun Otterndörp)
Wapen/Flagg Koort

Wapen vun Oterndörp

Oterndörp
Laag vun Oterndörp in Düütschland
Basisdaten
Bundsland: Neddersassen
Landkreis: Cuxhoben
Samtgemeen: Land Hadeln
Gemeen: Oterndörp
Inwahners:
Hööchd: 2 m över NN
Postleettall: 21751
Vörwahl: 21762
Geograafsche Laag:
Koordinaten:53° 48′ N, 8° 54′ O
53° 48′ N, 8° 54′ O

Karte

Luftbild von Oterndörp (2012)
De Otterborn vör dat Raadhuus
Huus von Johann Heinrich Voss

Oterndörp (hoochdüütsch Otterndorf) is en Stadt in de Gemeen Oterndörp in’n Landkreis Cuxhoben, Neddersassen. Dat liggt in Hadeln.

Geografie[ännern | Bornkood ännern]

Oterndörp liggt an de Medem, in de Masch von de Elv, von de de Oort so bi een Kilometer von af is. De Haadler Kanaal münnt bi Oterndörp in de Elv.

De Naveröörd sünd Nackenbüttel un Belen in’n Noordoosten, Oosterbrook un Kedenbrook in’n Süüdoosten, Neenkarken in’n Süden, Süderwisch in’n Süüdwesten, Aßel in’n Westen un Müggendörp in’n Noordwesten.

Historie[ännern | Bornkood ännern]

De Oort kummt 1261 toeerst in de Oorkunnen vör. Dor warrt von en Keerl snackt, de Godefridus, plebanus in Otterentorpe (plebanus heet Preester) heten hett. Oterndörp hett 1400 von Hertog Erik IV. de Stadtrechten kregen.

In de Tied von’n Groten Noorschen Krieg (mit de Belagerung von Stood 1712) is in’n Harvst 1713 de Pest in Hadeln utbraken. In Oterndörp mit Oosterenn Oterndörp sünd 350 Minschen doodbleven.[1]

In’n Eersten Weltkrieg sünd 19 Soldaten ut Oterndörp fullen oder vermisst un in’n Tweten Weltkrieg 34[2].

Verwaltungsgeschicht[ännern | Bornkood ännern]

Vör 1852 hett Oterndörp to dat Land Hadeln höört un is denn as egenstännig Stadt von’n Rest von Hadeln aftrennt worrn, de denn dat Amt Oterndörp billt hett. 1885 is Oterndörp wedder mit dat Amt Oterndörp tohoopgahn un hett den Kreis Hadeln billt. 1932 is dat denn Deel von’n Landkreis Land Hadeln worrn un 1977 von’n Landkreis Cuxhoben.

1929 is de Stadt mit de twee vörher egenstännigen Gemenen Oosterenn Oterndörp un Westerenn Oterndörp tohoopgahn un hett dormit de hüdige Gemeen Oterndörp billt. Von 1970 af an hett Oterndörp to de Samtgemeen Hadeln höört, de an’n 1. Januar 2011 tohoop mit de Samtgemeen Sietland de ne’e Samtgemeen Land Hadeln billt hett.

Inwahnertall[ännern | Bornkood ännern]

Johr Inwahners
1824-00-001824[3] 345 Füürsteden
1848-00-001848[4] 1.829 Lüüd, 380 Hüüs
1910-12-011. Dezember 1910[5] 1.937
1925-00-001925[6] 1.902
1933-00-001933[6] 3.869
1939-00-001939[6] 4.062

Religion[ännern | Bornkood ännern]

Severikark

Oterndörp is evangeelsch-luthersch präägt un billt mit de Severikark, de as Buurdoom gellt, en egen Kaspel. För de Kathoolschen is de Hillig-Krüüz-Kark tostännig. Ans gifft dat noch de Neeapostoolsche Kark Oterndörp, de 1993 boot worrn is.

Wapen[ännern | Bornkood ännern]

Dat Wapen von Oterndörp wiest links teihn swarte un gollen Striepen mit en schraag bagen grönen Rutenkranz dor op un rechts en gollen Otter op blauen Grund un grönen Schildfoot.

De linke Deel is dat Sassen-Wapen, de rechte Deel steiht as Symbol för den Naam von’n Oort.

Kultur[ännern | Bornkood ännern]

In Oterndörp gifft dat en Denkmaal för de Fullenen ut de twee Weltkrieg’.

Dat Ooldstadtfest in Oterndörp is toeerst 1977 fiert worrn. Dat is jümmer an dat letzte Wekenenn in’n Juli.

Verenen[ännern | Bornkood ännern]

De Freewillige Füürwehr is an’n 1. Dezember 1880 grünnt worrn un dat Schützencorps 1863.

Weertschop un Infrastruktur[ännern | Bornkood ännern]

Oterndörp gellt na dat Regionale Ruumordnungsprogramm as Grundzentrum mit middelzentrale Deelfunkschonen för de Öörd in de Ümgegend.

För de Weertschop is ünner annern de Tourismus wichtig. Mit dat Krankenhuus Land Hadeln hett de Stadt ehr egen Krankenhuus.

Verkehr[ännern | Bornkood ännern]

Oterndörp liggt an de Bundsstraat 73, de in’n Oosten na Belen, Neehuus un Kumbarg geiht un in’n Westen na Olenbrook un Cuxhoben. Üm Oterndörp rüm geiht nu de B 73n as Ümgehungsstraat, disse Straat is 2009 trech worrn. Vörher güng de B 73 merrn dör dat Zentrum. In’n Noordwesten löppt de Kreisstraat 4 över Müggendörp un Wehldörp na Olenbrook. De Landsstraat 118 löppt in’n Süden na Ne’enkarken un denn na de Lee un Wannen. De Kreisstraat 16 geiht in’n Süüdoosten na Oosterbrook.

Bevör de Ümgehungsstraat keem, sünd in de Reichenstraat in’t Zentrum von 1954 bet 1968 en ganze Reeg Hüüs afreten worrn, üm mehr Platz för de B 73 to maken.[7] De ole Mehmbrügg, de to small weer, is in’n Harvst 1974 afreten worrn. Vörher is an de Goethestraat/Alfred-Paulsen-Straat en ne’e Brügg boot worrn, dat de Verkehr över düsse Brugg ümleidt warrn kunn, wieldes de ne’e Mehmbrügg boot warrt. Ümleidung un ne’e Brügg hebbt tohoop 2,9 Milljonen Mark köst.[7] An’t Enn von dat Johr 1975 weer de ne’e Brügg trech.

In’n Oort liggt de Bahnhoff Oterndörp an de Nedderelvbahn von Cuxhoben na Hamborg, de 1881 apenmaakt hett.

Scholen[ännern | Bornkood ännern]

In Oterndörp gifft dat de Grundschool Oterndörp. Na Gymnasium gaht de Schölers op dat Gymnasium Oterndörp, na Realschool op de Johann-Heinrich-Voß-School un na Hauptschool op de Hauptschool Oterndörp.

An’n 13. September 1968 hett de Kinnergoorn in Oterndörp apenmaakt, de vondaag in en Kita ümwannelt is. De Kinnergoorn harr toeerst Platz för 60 Kinner, is aver mehrmaals utboot worrn un hett 1987 en tosätzliche Etaasch kregen, so dat nu 200 Kinner betreut warrn köönt. Bedreven warrt de Kita von dat DRK.

Medien[ännern | Bornkood ännern]

Funktoorn Oterndörp

In Oterndörp sitt de Niederelbe-Zeitung.

De Noorddüütsche Rundfunk hett in Oterndörp en Korrespondentenbüro.

In’n Westen liggt de Funktoorn Oterndörp, de 95 m hoog is.

Ünnernehmens[ännern | Bornkood ännern]

In de Wallstraat hett de Volksbank Stood-Cuxhoben en Filiaal.

Ver- un Entsorgung[ännern | Bornkood ännern]

Dat Oterndörper Afwater is fröher in dat egene Klärwark Oterndörp klärt worrn. Nadem dat Klärwark Oterndörp 2003 dichtmaakt hett, warrt dat Afwater von Oterndörp ut dör en Druckröhr na dat Klärwark Cuxhoben pumpt.

Lüüd[ännern | Bornkood ännern]

Johann Heinrich Voss weer von 1778 bet 1782 Rekter von de Latienschool in Oterndörp. De Snittjer Jürgen Heydtmann hett in Oterndörp sien Warksteed hatt. De NS-Funkschonäär Helmuth Friedrichs is 1899 in Oterndörp boren.

De Politiker un Börgermeester von de Gemeen Oterndörp, Claus Johannßen, is ok in Oterndörp boren un grootworrn.

Ehrenbörgers[ännern | Bornkood ännern]

Ehrenbörgers von Oterndörp sünd:

Literatur[ännern | Bornkood ännern]

  • Rudolf Lembcke: Otterndorf. Hamborg 1978
  • Axel Behne (Rutgever): Otterndorf. 600 Jahre Stadtgeschichte. Cuxhoben 2000

Footnoten[ännern | Bornkood ännern]

  1. Heiko Völker: Gesundheitspolizei vor 300 Jahren (in de Rubrik Achteran), Niederelbe-Zeitung an’n 11. April 2020, Sied 36
  2. http://www.denkmalprojekt.org/2011/otterndorf_wk1u2_ns.html
  3. C. H. Jansen: Statistisches Handbuch des Königreichs Hannover. 1824, Sied 476: http://books.google.de/books?id=tG0AAAAAcAAJ&pg=PA476
  4. Friedrich W. Harseim, C. Schlüter: Statistisches Handbuch für das Königreich Hannover. 1848, Sied 155: http://books.google.de/books?id=eOI-AAAAcAAJ&pg=PA155
  5. http://www.gemeindeverzeichnis.de/gem1900/gem1900.htm?hannover/hadeln.htm
  6. a b c http://www.verwaltungsgeschichte.de/hadeln.html
  7. a b Rudolf Lembcke: Kreis Land Hadeln. Geschichte und Gegenwart. Rutgever: Landkreis Land Hadeln. Bookdruckeree Günter Hottendorff, Oterndörp 1976, Sied 154

Weblenken[ännern | Bornkood ännern]

Oterndörp. Mehr Biller, Videos oder Audiodateien to’t Thema gifft dat bi Wikimedia Commons.