Kedenbrook

Vun Wikipedia
Zur Navigation springen Zur Suche springen
Wapen/Flagg Koort

Wapen vun Kedenbrook

Kedenbrook
Laag vun Kedenbrook in Düütschland
Basisdaten
Bundsland: Neddersassen
Landkreis: Cuxhoben
Samtgemeen: Land Hadeln
Gemeen: Belen
Inwahners:
Postleettall: 21785
Vörwahl: 04752
Geograafsche Laag:
Koordinaten:53° 47′ N, 8° 59′ O
53° 47′ N, 8° 59′ O

Luftbild von Kedenbrook (2012)
Statue vör de ole Smeed

Kedenbrook (hoochdüütsch Kehdingbruch) is en Oort in de Gemeen Belen (Samtgemeen Land Hadeln) in’n Landkreis Cuxhoben, Neddersassen.

Geografie[ännern | Bornkood ännern]

Kedenbrook liggt in de Masch an dat linke Över von de Elv, so üm un bi fiev Kilometer af von’n Stroom. An Kedenbrook langs löppt de Haadler Kanaal.

De Naveröörd sünd Bahrdörp un Belen in’n Noorden, Neehuus in’n Noordoosten, Westercaadwisch un Au in’n Süüdoosten, dat Noorderenn von Bülkau in’n Süden un Oosterbrook in’n Westen.

Historie[ännern | Bornkood ännern]

Kedenbrook kummt 1404 toeerst in de Oorkunnen vör, as de Kapell en ne’e Klock kregen hett.

Kedenbrook weer vör 1885 in’t Amt Oterndörp un na 1885 in’n Kreis Neehuus. 1932 is dat an’n Landkreis Land Hadeln kamen un 1977 denn an’n Landkreis Cuxhoben.

In’n Düütschen Krieg 1866 is een Soldaat ut Kedenbrook fullen, in’n Eersten Weltkrieg sünd 20 Soldaten fullen oder vermisst un in’n Tweten 37[1].

An’n 1. Juli 1972 is de Gemeen Kedenbrook Deel von de Gemeen Belen worrn.

Inwahnertall[ännern | Bornkood ännern]

Johr Inwahners
1824-00-001824[2] 75 Füürsteden
1848-00-001848[3] 407 Lüüd. 65 Hüüs
1858-00-001858[4] 405
1910-12-011. Dezember 1910[5] 351
1925-00-001925[6] 382
1933-00-001933[6] 363
1939-00-001939[6] 333

Religion[ännern | Bornkood ännern]

St.-Jürgen-Kark
Örgel

Kedenbrook is evangeelsch-luthersch präägt un billt mit de St.-Jürgen-Kark en egen Kaspel. De Kark is 1744 boot worrn. De Örgel mit I/P-Manual un 16 Registers hett Johann Georg Wilhelm Wilhelmy 1816 bet 1818 maakt un is 1959 von Alfred Führer un 2003 von Bartelt Immer restaureert worrn.

För de Kathoolschen is de Hillig-Krüüz-Kark in Oterndörp tostännig.

Wapen[ännern | Bornkood ännern]

Dat Wapen wiest op roden Grund twee krüüzte Peerköpp in Sülver, achter de twee sülvern Kleverbläder rutkiekt.

De Peerköpp sünd Sinnbild för Neddersassen un de Kleverbläder staht för de Weidenweertschop.

Dat Wapen hett de Heraldiker Gustav Völker utklamüsert un is 1954 von de Behörden genehmigt worrn.

Kultur[ännern | Bornkood ännern]

Op’n Karkhoff in Kedenbrook gifft dat en Denkmaal för de Fullenen ut den Düütschen Krieg un ut de twee Weltkrieg’.

De ole Smeed in Kedenbrook dükert 1717 as Besitt von Claus Follmer toeerst in de Oorkunnen op un bet 1988 in Familienbesitt bleven, as de letztwe Dörpsmidd, Richard Stüven, doodbleven is. De Smeed, de al siet 1986 ünner Denkmaalschutz stünn un noch kumplett mit de olen Smeed-Warktüüg inricht weer, is denn von de Familie van Gemmeren köfft worrn. Vondaag is dat en Warksteed, in de Möbel restaureert un na ole Vörbiller nee maakt warrt.

Verenen[ännern | Bornkood ännern]

De Schützenvereen is 1780 grünnt worrn un fiert sien Schützenfest an’n eersten Sünndag in’n Juni. De Freewillige Füürwehr is an’n 25. Januar 1934 grünnt. Dat hüdige Füürwehrhuus is 1988 boot worrn.

Weertschop un Infrastruktur[ännern | Bornkood ännern]

Verkehr[ännern | Bornkood ännern]

Kedenbrook liggt an de Landsstraat 144, de in’n Süden na Bülkau löppt un in Kedenbrook sülvs na Oosten afböögt un na Neehuus an de Bundsstraat 73 rangeiht. Na Westen geiht en Straat na Oosterbrook.

De nächste Autobahn is de Autobahn 27 (Afsnidd CuxhobenBremerhoben). De Opfohrt 1 Cuxhoben liggt so 22 Kilometer in’n Noordwesten von Kedenbrook an de B 73.

De nächste Bahnhoff is de Bahnhoff Kumbarg an de Nedderelvbahn, de acht Kilometer in’n Süüdoosten liggt. De Bahnlien löppt ok nich wied an Kedenbrook langs. Bet 1991 harr noch de Bahnhoff Neehuus apen, de blots twee Kilometer weg weer.

Weblenken[ännern | Bornkood ännern]

Commons-logo.svg Kedenbrook. Mehr Biller, Videos oder Audiodateien to’t Thema gifft dat bi Wikimedia Commons.

Footnoten[ännern | Bornkood ännern]

  1. http://www.denkmalprojekt.org/dkm_deutschland/kehdingbruch_nsachs.htm
  2. C. H. Jansen: Statistisches Handbuch des Königreichs Hannover. 1824, Sied 328: http://books.google.de/books?id=tG0AAAAAcAAJ&pg=PA328
  3. Friedrich W. Harseim, C. Schlüter: Statistisches Handbuch für das Königreich Hannover. 1848, Sied 137: http://books.google.de/books?id=eOI-AAAAcAAJ&pg=PA137
  4. Franz Heinrich Ungewitter: Neueste Erdbeschreibung und Staatenkunde. 1858, Sied 420: http://books.google.de/books?id=ZkoNAQAAIAAJ&pg=PA420
  5. http://www.gemeindeverzeichnis.de/gem1900/gem1900.htm?hannover/neuhaus.htm
  6. a b c http://www.verwaltungsgeschichte.de/hadeln.html