Moonraker (Film)

Vun Wikipedia
Wesseln na: Navigatschoon, Söök
Filmdaten
Plattdüütsch Titel:
Originaltitel: Moonraker
Düütsch Titel: Moonraker – streng geheim!
Produkschoonsland: Grootbritannien
Frankriek
Johr vun’t Rutkamen: 1979
Läng: 126 Minuten
Originalspraak: Engelsche Spraak
Öllersfreegaav in Düütschland: FSK 12
Filmkru
Speelbaas: Lewis Gilbert
Dreihbook: Christopher Wood
Produkschoon: Albert R. Broccoli
Musik: John Barry
Shirley Bassey (Titelleed)
Kamera: Jean Tournier
Snitt: John Glen
Szenenbild: Ken Adam
Kledaasch: Jacques Fonteray
Dorstellers

Moonraker (op plattdüütsch so veel as „Maandseil“; dt. Titel: Moonraker – streng geheim!) is de Titel vun en britisch-franzööschen Agentenfilm ut de James-Bond-Filmreeg. Dat is de veerte Film, in den Roger Moore in de Hööftrull to sehn weer. Lewis Gilbert weer de Speelbaas vun dissen Film, de 1979 in de Kinos kamen is.

Inholt[ännern | Bornkood ännern]

En Boeing 747 schall Huckepack en Moonraker-Space Shuttle na Grootbritannien bringen. Man de Ruumfähr warrt op’n Weg roovt, wobi de Transport-Fleger afstörten deit. An de Afstörtsteed gifft dat aver keen Spoor vun dat Shuttle, so dat James Bond den Opdrag kriggt, den Weg vun de Ruumfähr vun de Produkschoonssteed an natoforschen. He flüggt dorophen na Kalifornien na de Firma Drax Industries, de den Moonraker herstellt hett. He kann de Fabrik besichtigen un dröpt dorbi Dr. Holly Goodhead, de toeerst aver torüchhollern mit em ümgeiht. Se laadt em in, in de Zentrifuug en Testrunn to dreihn, warrt denn aver wegropen. En Mitarbeiter vun Drax versöcht em dorbi an de Siet to maken un dat as en Unfall utsehn to laten.

Dat Slott Vaux-le-Vicomte deent in’n Film as kalifornischen Sitt vun Hugo Drax

Bond reist wieter na Venedig, woneem Drax in en Glasblaseree Zylinders herstellen lett. Hier dröpt he ok Dr. Goodhead wedder, de in de Stadt en Vördrag geven deit. Bi en Fohrt mit en Gonnel warrt Bond verfolgt. Wedder versöcht een, em ümtobringen, man Bond kann utneihn. In de Nacht slickt he torüch in de Glaswarksteed un finnt dor en geheem Labor vör, ut dat he en Glasröhr mit en Giftgas mitnehmen deit. Wedder warrt he angrepen, kann den Macker vun Drax aver utschalten. He warrt ok gewohr, dat de Produkten ut de Fabrik na Rio de Janeiro utflagen warrn schüllt. Bi en Besöök bi Holly Goodhead finnt Bond bito noch rut, dat de in Wohrheit en Agentin vun’n CIA is. Ofschoonst se sik na un na neger kamen doot, sünd se sik noch nich vullstännig gröön.

Den annern Dag will Bond sien Basen dat Labor wiesen, fallt dormit aver op de Nees, vunwegen dat Drax över Nacht en Büro dorut maken laten hett. All Sporen vun dat Labor sünd wegmaakt worrn. Offiziell mutt M sien besten Mann vun den Fall aftehn. Liekers warrt he inoffiziell na Rio de Janeiro schickt. Dat Röhr mit den giftiges Stoff gifft he vörher to’n Ünnersöken af. In Rio stellt Bond fast, dat dat Lagerhuus utrüümt worrn is. Ok Holly finnt he dor wedder, de intwüschen den Flaaghaven beobacht un rutfunnen hett, dat in letzte Tiet tallrieke Frachtflegers vun de Drax Corporation afflagen sünd. Op’n Torüchweg vun’n Suckerhoot geiht Jaws („De Bieter“) op jem los, den Bond noch vun sien letzten Fall her kennt un de an de Steed vun den doden Macker vun Drax anhüert worrn is.

De Iguaçu-Waterfäll in’n brasiliaanschen Oorwoold sünd en Statschoon in’n Film

Bond kann Holly dat Leven redden, wiel de Bieter mitsams de Gonnel in de Daalstatschoon vun de Seelbahn kajoolt. Dor dröpt de Bieter Dolly, in de he sik op’n eersten Blick verkieken deit. Bond un Holly dorgegen warrt vun annere Mackers vun Drax opgrepen un fangen nahmen. Wedder kann sik Bond befre’en, Holly aver mutt he torüch laten. In Brasilien nimmt Bond Kuntakt to en Lager vun’n MI6 op. Dor kriggt he vertellt, wat dat Gift is, dat he ut dat geheeme Labot mitnahmen harr. Vunwegen dat dat Gift blots op Minschen wirkt, aver nich op Deerten, schall he sik nu in’t Rebeet vun’n Amazonas ümkieken, woneem de Plant herkummt, ut de dat Gift herstellt warrt. so finnt Bond opletzt en geheeme Anlaag, vun de ut Drax en Reeg vun Ruumfähren in’n Weltruum scheten will. Ok Holly warrt dor fangen hollen. As Drax sik sülvst op’n Weg in’n Weltruum maken deit, will he de beiden Agenten in’n Afgasstrahl verbrennen laten. Man wedder künnt sik de beiden redden un kriegt dat hen, sik as Astronauten verkleedt an Boord vun een vun de Ruumfähren to slieken.

De Reis geiht na en Ruumstatschoon, de vun’t Radar nich wohrnahmen warrn kann. An Boord warrt se wies, wat Drax plaant: Mit dat Giftgas will he de hele Minschheit utrotten un mit de Lüüd op sien Ruumstatschoon – all geistig un physisch överragen Minschen – de Eer nee bevölkern, natürlich mit em an de Spitz. De beiden Agenten künnt aver dat Radarstöörsystem utschalten un de Statschoon för de Eer sichtbor maken. De USA scheet dorophen na Afspraak mit de Sowjets sülvst en Ruumfähr in’t All. As Bond un Holly vun den Bieter an de Siet maakt warrn schall, fraagt Bond noch mol bi Drax na, wat wohrhaftig all Minschen doodmaakt warrn schüllt, de nich na sien Idealbild utseht un keikt dorbi den Bieter un den sien Fründin an – de bei teemlich ut de Oort slahn sünd. Dormit tütt Bond den Bieter un Dolly op sien Siet.

As de amerikaansche Ruumfähr meist ankamen is, saboteert Bond de künstliche Swoorkraft an Boord un en groot Kuddelmuddel brickt los. Twüschen de Ruum-Soldaten un Drax sien Lüüd kummt dat to’n Gefecht. De Ruumstatschoon kriggt dorbi ordig wat af un fangt an, an eenige Steden to exploderen. Ok Drax kann an’t Enn nich gegen Bond bestahn un warrt vun em in’n Weltruum rutblaast. De Soldaten teht sik in jemehr Ruumfähr torüch, wiel Bond un Holly de Ruumfähr vun Drax innehmen doot, üm de Giftgas-Bomben, de Drax al in Richt na de Eer afschaten hett, aftofangen. In’n letzten Ogenblick hebbt se dormit Spood.

Kritik[ännern | Bornkood ännern]

De Film hett na sien Publikatschoon vör allen go’e Kritiken kregen.

  • Vincent Canby meen in de New York Times, dat Moonraker en vun de lebennigsten Bondfilmen weer, bi den jede Bedeeligte in Hoochform wesen is, sogor Roger Moore[1].
  • In The Globe and Mail schreev Jay Scott, dat Moonraker de tweetbeste Bondfilm na Goldfinger weer. Al in de eersten poor Minuuten barg de Film mehr Nervenkeddel as de meisten Filmen in twee Stünnen[2].
  • Roger Ebert hett in de Chicago Sun-Times 3 vun 4 Steerns vergeven, weer aver ok kritisch. He fünn den Film so vullpackt mit exootsche Öörd un Science-Fiction-Trickeffekten, dat Bond sik ielen müss, üm in all Szenen rintokamen.[3]

In de lateren Johren is de Film teemlich ünnerscheedlich opfaat worrn. In de 1980er Johren keem Stimmen op, de den Film eher as een vun de slechtsten Bondfilmen beteken. Ut hüütige Sicht warrt Moonraker tomeist as ünner’n Dörsnitt ansehn.

Wiel de Filmwetenschoppler James Monaco em 1985 as en „lütt Meesterwark“ beteken un em as den besten Bond vun all Tieten utropen de[4], nööm de Kritiker Danny Peary em een Johr later den bit dorhen slechtsten Bond-Film[5]. In’t Johr 2012, also mehr as dörtig Johren na sien Premiere, hebbt de Besökers vun de James-Bond-Fansiet MI6-HQ.com den Film bi en Afstimmen över de besten Bond-Filmen op den letzten Platz wählt[6].

Utteken[ännern | Bornkood ännern]

De Film Moonraker weer för tosamen söss Filmpriesen vörslahn, ünner annern ok för den Oscar in de Kategorie Best Trickeffekt. Wunnen hett de Film aver blots een Pries, neemlich 1980 de Golden Lienwand.

Produkschoon[ännern | Bornkood ännern]

De Suckerhoot vun Rio de Janeiro weer een vun de Schauplätz in den Film

In’n Afspann vun den Vörgängerfilm The Spy Who Loved Me weer For Your Eyes Only as nächsten Film ankünnigt. Man denn geev dat mit 1977 Star Wars un Close Encounters of the Third Kind twee Science-Fiction-Filmen, de mit veel Spood in’t Kino lopen sünd. Dorophen hebbt sik de Produzenten överleggt, dat James Bond ok in’n Weltruum to doon hebben schüll. Also weer Moonraker as ne’en Titel utwählt un For Your Eyes Only eerstmol torüchstellt.[7] Bito weer fastleggt, dat man mit en franzöösche Produkschoonsfirma tosamenarbeiten wull. So is Moonraker de eerste Co-Produkschoon in de Filmreeg worrn.

As bi’t vörige mol schüll Tom Mankiewicz tosamen mit den Speelbaas Lewis Gilbert en Geschicht vör den Film utklamüstern. Dat hett he ok doon, wull aver nich mehr mit Naam mit de Bindreeg in Verbinnen bröcht warrn, vunwegen dat he an en unafhangige Loopbahn as Schriever un Produzent arbeiten de. As Titel weer Moonraker utsöcht, wat ok en Roman vun Ian Fleming. Vun dat Book is aver blots noch de Figur Hugo Drax överbleven. De Achtergrund is vullstönnig nee utdacht worrn. As de Geschicht stünn kreeg Christopher Wood den Opdrag dorut en Dreihbook to maken[7].

In den Film kriggt Bond mit Holly Goodhead en kloke un attraktive CIA-Agentin to Hülp, de vun Lois Chiles speelt warrt. De Figur gellt as eerst Bond-Girl, de mit Bond vullstännig op Ogenhööch mitholen kann. Jemehr Gegenspeler, Sir Hugo Drax, weer mit den franzööschen Schauspeler Michael Lonsdale besett, vunwegen dat sik dat püm en Co-Produkschoon hannel. Bernhard Lee weer in den Film dat letzte mol in sien Rull as M to sehn. He is kort na de Kinopremiere swoor krank worrn un 1981 kort vör Dreihanfang vun den nächsten Bond-Film doodbleven. En sünnerheit vun Moonraker is ok, dat Richard Kiel na The Spy Who Loved Me en tweet mol den legen Kerl Jaws spelen dröff. Sien Figur keem bi de Tokiekers so goot an, dat he ok hier wedder in de Geschicht inboet weer un sogor ok to’n tweeten mol överleevt.

De Dreiharbeiten güngen vun’n 14. August 1978 bit to’n 27. Februar 1979. En Deel vun de Kulissen un Requisiten weern ut de Feernsehreeg Space: 1999 övernahmen, de enige Johren vörher afdreiht worrn is. To’n Bispeel weern de Instrumentenkonsolen in’n Anti-Radar-Kontrollruum vun de Ruumstatschoon oorsprünglich as Stüerpulten in de Zentrale vun Alpha boet.

De Butenopnahmen weern an verschedene Öörd in Frankriek, Italien, de USA, Brasilien un Guatemala dreiht[8], dorünner Steden as dat Slott Vaux-le-Vicomte in Melun, de Markusplatz un de Canal Grande in Venedig, de Vandenberg Air Force Base, den Suckerhoot in Rio de Janeiro oder de Iguaçu-Waterfäll.

De Premiere vun den Film fünn an’n 26. Juni 1979 in’t Biwesen vun Prinz Philip in’n Odeon Leicester Square in London statt[9]. In de düütschen Kinos weer de Film to’n eersten mol an’n 31. August 1979 to sehn[10]. Mit en Inspeelresultat vun 210 Millionen US-Dollar[11] weer Moonraker weltwiet de spoodriekste Film vun dat Johr 1979[12].

Literatur[ännern | Bornkood ännern]

  • Ian Fleming: James Bond 007: Moonraker (Originaltitel: Moonraker). Düütsch vun M. F. Arnemann. (Vullstännig överarbeite Taschenbookutgaav.) Heyne, München 2003, 240 S., ISBN 3-453-87037-9
  • Christopher Wood: Moonraker streng geheim. 007 erobert den Weltraum (Originaltitel: James Bond and Moonraker). Goldmann-Filmbuch. Düütsch vun Tony Westermayr. Goldmann, München 1979, 223 S., ISBN 3-442-03888-X

Borns[ännern | Bornkood ännern]

  1. Kritik in de New York Times vun’n 29. Juni 1979; afropen an’n 9. Mai 2013
  2. Jay Scott: MOONRAKER:007 in space as good as ever. In: The Globe and Mail vun’n 30. Juni 1979, S. 29.
  3. Fikmkritik vun Roger Ebert in de Chicago Sun-Times; afropen an’n 9. Mai 2013.
  4. James Monaco: The Connoisseur’s Guide to the Movies. Facts on File, 1985, ISBN 978-0-87196-964-4.
  5. Danny Peary: Guide for the Film Fanatic, Simon & Schuster, 1986, S. 281.
  6. Best Bond Film Results. op mi6-hq.com (engelsch); afropen an’n 26. Dezember 2012.
  7. 7,0 7,1 Steve Rubin, Siegfried Tesche: Die Hintergrund-Story zu 25 Jahre Bond. Kino Verlag, Hamborg 1987, ISBN 3-89324-026-8, S. 155.
  8. Siegfried Tesche: Der große James Bond-Atlas. Wissen Media Verlag, Gütersloh/München 2008, ISBN 978-3-577-07305-9, S. 68/69
  9. Moonraker – Premiere & Press. Op mi6-hq.com (engelsch). Afropen an’n 8. Januar 2013
  10. Premierendaten. Op: imdb.de. Afropen an’n 8. Januar 2013
  11. Budget un Inspeelresultaten. op: imdb.de. Afropen an’n 8. Januar 2013.
  12. WorldwideBoxoffice. Op: worldwideboxoffice.com. Afropen an’n 19. März 2013.

Weblenken[ännern | Bornkood ännern]