Filmkru

Vun Wikipedia
Lüüd vun de Filmkru bi de Arbeit

De Filmkru sett sik ut all Lüüd tohopen, de an Filmprodukschoon bedeeligt sünd, aver nich vör de Kamera staht – Schauspelers, Komparsen un Stuntmen tellt also nich mit dorto. Normalerwies warrt de Filmkru an’t Enn vun Film in de so nöömten Credits (op platt so veel as Wöördigen) oplist.

Bi en Filmprodukschoon verdeelt sik de Filmkru op verschedene Afdeelen (Departments), de jede en Reeg vun Opgaven to bearbeiten hebbt. Disse Opgaven mööt in de Vörbereiten vun de Produkschoon, wiel de Dreiharbeiten an’n Filmset un achteran in de Nabereiten dorföhrt warrn. Över dat Filmgewarf rut an bekanntesten sünd Afdeelen as de Regie, Toon, Kamera, Maskenbild, Szenenbild, Kledaasch un annere.

Rebeden un Beropen[ännern | Bornkood ännern]

Dat gifft en grote Tall vun Beropen, de mit da Filmgewarf verbunnen sünd. Dordör, dat sik de Filmtechnik un dat Medium Film jümmers wieterentwickelt, kamt aver jümmer ok ne’e Opgaven dorto, de wedder ne’e Beropen (de engelsche Begreep steiht jümmer in Klammern dorbi) nödig maakt. De nafolgen Översicht tellt de wichtigsten Arbeitsfeller op un is nich vullstännig.

Produkschoon[ännern | Bornkood ännern]

De Filmprodukschoon is dat Afdeel, dat en Filmprojekt entwickelt un dorföhrt. In de Veantwoorten vun dit Afdeel liggt ünner annern de Organisatschoon vun dat Filmprojekt un de Gewarfsföhren.

To de Produkschoon höört vör allen de Produzenten un Managers. Dat gifft hier den Filmproduzent (producer), den Gewarfsföhren Produzent (executive producer), den Line Producer, de Filmherstellensregeer un de Filmgewarfsföhren (production accountant), de alltohopen de Arbeiten vör un na den Dreih to kriegen hebbt. Dorto kamt de Filmprodukschoonsbaas (prdouction manager) un sien Helpsmann (production assistant), de ok wiel de Dreiharbeiten sülvst Opgaven to maken hebbt.

De Opnahmföhren (production coordinator/unit production management) hebbt in de Vörbereiten un wiel de Dreiharbeiten to doon, wiel de Setopnahmföhren (location manager/unit manager), de Setspringer (set runner) un de Produkschoonsfohrer (driver) blots wiel de Dreiharbeiten mit de Produkschhon to kriegen hebbt.

Regie un Stoffentwickeln[ännern | Bornkood ännern]

In dit Afdeel is dat künstlerische Regeer vun en Filmprojekt tosamenfaat, de sik ü.a. mit den Inholt vun en Film, mit de Adapschoon vun’t Dreihbook för de Opnahm un mit dat Anwiesen vun de Schauspelers uteneentosetten hebbt.

De Speelbaas (director) hett dat Seggen un is de hele Tiet vun de Vörbereiten bit to’t Enn vun de Produkschoon mit den Film befaat. Ünnerstütt warrt sien Arbeit bi de Vörbereiten un de Dreiharbeiten vun den Helpsmann (assistant director). De Dreihbookschriever (screenplay/screenwriter), de Dramaturg (dramturg/script doctor), de fackliche Berader (consultant) in dat Casting sünd mit jemehr Arbeit fardig, wenn de Dreiharbeiten anfangt. Denn kamt de Opgaven för den Script Supervisor un de Skript-Wieterföhren (script/continuity)

Szenenbild / Effekten / Kledaasch / Maskenbild[ännern | Bornkood ännern]

In disse Afdeelen geiht dat üm dat Ümsetten un Utgestalten vun dat Skript in all sien Enkeltheiten un dat Utklamüsternun Tohopensetten vun en in sik logische Filmwelt.

Vun’t Planen bit to de Nabereiten is de Szenenbillner (production designer) mit de Produkschoon to Gang. In fröhere Tieten weer de künstlerische Leider (Artdirector) dorför tostännig, man de Beteken hebbt in’t engelsche mitünner ok verscheden Bedüden. De Öördsöker (location scout) dorgegen slutt sien Arbeit in de Vörbereitensphaas af. In de Vörbereiten un an’n Set gifft dat Opgaven för vele verschedene Gruppen, as den Szenenbildhelpsmann (art director oder assistant art director – na Opgaav un Ümfang vun’t Projekt), de Maskenbillner (make-up artist) oder de Trickeffekten (special effects). För den Opbo vun’t Szenenbild is de Bühnenbomeester (leadman oder construciton manager) tostännig as ok de Bobühne (Set builder mit de swing gang, de an’t Set praat steiht). De Szenenutstatters sorgt sik üm de beweglichen Deelen: de „Butenutstatter“ (set decorator, prop master oder prop buyer – na Opgaav un Ümfang vun’t Projekt) plaant, organiseert un köfft in, wiel de „Binnenutstatter“ (standby prop) för den richtigen Insatz vun de Requisiten sorgt. Ünnerstütt warrt de Arbeit dör den Requisitenfohrer (prop driver). Butendem mutt de passen Kledaasch för den Film utklamüstert warrn. Dat maakt de Kledaaschmaker (costume designer) mit sien Helpslüüd (costume designer assistant). An’n Set gifft dat bito de Gardroov (wardrobe).

Kamera[ännern | Bornkood ännern]

In dit Afdeel fallt de Bildgestalten, dat Aflichten vun de Geschicht in de Filmwelt un de Sorg üm dat Filmmaterial.

De hele Tiet dorbi sünd de Kameramann (director of photography/cinematographer) mit sien 2. Kamerahelpsmann (2. assistant camera/clapper, film-loader), wiel de 1. Helpsmann (1. assistant camera, focus-puller) nix mehr mit de Nabereiten to doon hett. De Arbeit warrt ünnerstütt vun den Kamerafohrer (camera operator), de ok al bi’t Planen mit dorbi is. De Standfotograaf (still photographer) un de Farvkorrektur oder Colorist (color timer/colour grader, 'colourist') hebbt jemehr Opgaven bi’t Dreihn un bi’t Nabereiten. De wieteren Opgaven fallt blots bi de Dreiharbeiten an, as de Steadicam oder de Kamerabühne (dolly grip). Wichtig is ok dat Licht. Dat Seggen hett de Böverbelüchter (key grip, gaffer), de sien Belüchters (electrician) un den eersten Lichttechniker (best boy electrician) an de Siet hett.

Toon un Musik[ännern | Bornkood ännern]

In dit Rebeet fallt de Opnahm un Verarbeiten vun de Filmmusik, de Geräuschkulisse un Tooneffekten.

De meisten Arbeiten fallt erst na Afsluss vun de Dreiharbeiten an. An’n Set sünd blots de Toonmeester (sound mixer) un sien Helpsmann (boom operator) dorbi. Naarbeit warrt de Opnahmen vun den Mischtoonmeester (ReRecording mixer) mit de Toontechnikers (sound editor), Toongestalters (sound designer) un den Geräuschmaker (foley artist). De Filmmusik warrt vun den Filmkomponist (composer original music) bistüert.

Snitt[ännern | Bornkood ännern]

Bi den Snitt geiht dat dorüm, de Bildopnahmen mit de richtige Szenenläng in de richtige Reeg to bringen. Disse Arbeiten fallt natürlich eerst in de Nabreiten an, wenn de Szenen dreiht worrn sünd. Verantwoortlich is de Snittmeester (editor) de vun en Helpsmann ünnerstütt warrt.

Annere[ännern | Bornkood ännern]

Dat gifft noch wietere Opgavenfeller, de vun de Oort un de Grött vun’t Projekt afhangt. Dorto höört en Tweete Opnahmnahmgrupp (second unit), de Set-Fotograaf un de Animater, de bi Animatschoonsfilmen un animeerte Bestanddeelen bruukt warrt, as ok de visuellen Effekten (visual effects, VFX), de in’n Gegensatz to de Trickeffekten eerst nadrääglich an’n Reekner tüügt warrt.

To de Phaas vun’t Nabereiten höört opletzt ok de Synchroonsnacker, de to’n een bruukt warrt wenn de Film in en annere Spraak överdragen warrn mutt, aver ok, wenn en Schauspeler de Originalspraak vun’n Film nich go’e noog snackt. En Nasynchroniseeren is ok nödig, wenn de Toon bi’t Dreihn wegen ümgeven Larm nich mit de nödige Gööd opnahmen warrn kann.

Literatur[ännern | Bornkood ännern]

  • Katz, Ephraim: The Film Encyclopedia, 5. Oplaag, Collins, 2005, ISBN 0-06-074214-3
  • Knox, Dave: Strike the Baby and Kill the Blonde: An Insider’s Guide to Film Slang, Three Rivers Press, 2005, ISBN 1-4000-9759-2}}
  • Levy, Frederick: Hollywood 101: The Film Industry, Renaissance Books, 2000, ISBN 1-58063-123-1