Dreihbook

Vun Wikipedia

En Dreihbook is en Geschicht, de so opschreven warrt, dat en Speelbaas dorna en Film maken kann. In dat Dreihbook steiht also sotoseggen en Film in schriftlich Form.

Inholt[ännern | Bornkood ännern]

In dat Dreihbook warrt nich eenfach en Geschicht vertellt, wi dat in Romanen oder annere Böker is. In dat Dreihbook mööt twee Saken tohopenkamen, dat dorut en Film warrn kann: Dat eerste is de Dialoog, also dat, wat de Dorstellers in jehmer Rullen toenanner seggen un mitenanner snacken doot. Dat Tweete is de Hanneln, also dat, wat en dör de Biller un den Aflop von Akschonen sehn deit. In dat Dreihbook mutt also beschreven warrn, wat de Lüüd seggt und wat de Kamera bito to wiesen hett, woans de Öört uttosehn hebbt un – wenn dat för de Geschicht vun Bedüden is – ok wat se vun Kledaasch drägen doot.

Entwickeln vun en Dreihbook[ännern | Bornkood ännern]

To Anfang vun en Dreihbook steiht faken man blots en fixen Infall, de denn eerstmol to en vullstännige Geschicht mit en afslaten Hanneln utarbeit warrn mutt. So en vörlöpig Geschicht warrt as Exposé betekend. Dorin sünd denn de wichtigsten Rullen oder Figuren in beschreven un groff ok de Afloop vun de Geschicht. Mitünner arbeit ok de Speelbaas, de an’n End dat Seggen hett, wenn de Film denn dreiht warrn schall, woans dat all to lopen hett bi de Entwickeln vun dat Dreihbook mit. Na un na warrt de Geschicht denn akkerater maakt un de Figuren nipp un nau utarbeit.

Bit ut en Dreihbook en Film warrt, warrt dor faken un veel an ännert. Dorbi speelt en Rull, of de Vörstellen, de en Dreihbookschriever för de Szenen hett, ok in de Wirklichkeit ümsett warrn künnt, woveel Geld för de Produkschoon praat steiht un of de Geschicht, so as se schreven is ok för de Tokiekers interessant is. Versteiht sik vun sülvst, dat dorbi ok dorop Acht geven warrt, dat de Geschicht Sinn maakt un nich an een Steed wat steiht, wat nich to den Rest passt oder sogor en Insaag dorstellt.

Opletzt hett bi dat Maken vun den Film denn aver de Speelbaas dat Seggen, woans nipp un nau de Geschicht in dat Dreihbook ümsett warrt.

Bruuk un Bornen[ännern | Bornkood ännern]

Dreihböker warrt bi’n Fernsehen jüst so bruukt as bi’n Kinofilm. Dreihböker warrt to’n Deel ok as Opdragsarbeit schreven. Sünners bi Fernsehserien warrt dat so maakt. Man, dat gifft ok Dreihbookschrievers, de jehmern Infall eerstmol schrievt un denn dormit na en Filmsellschop gaht un jem dat Book anbeedt. Mehrst all Filmen hebbt ok en Dreihbook, wat as Grundlaag för den Film deent hett, aver nich vun jedet Dreihbook, wat schreven warrt, warrt ok tatsächlich en Film maakt.

Nicht wenige Dreihböker hebbt en Vörlaag hatt. Faken hett dat toeerst ein Roman geven, de sik villicht goot verköfft hett un bi de Lesers goot ankamen is, de denn vun en Dreihbookschriever as Dreihbook för en Film ümsett warrt. Annere Vörlagen künnt ok överleverte Begevnissen ut de Historie, Theaterstückens oder sogors ok annere Filmen wesen. In so en Fall snackt man ok vun Neeverfilmen (engl.: „Remake“).