Szenenbillner

Szenenbillner is en Beroopsbeteken för en Person, de bi de Filmindustrie oder bi’t Feernsehn för den allgemeenen optischen Indruck vun Filmopnahmen, also för dat Szenenbild, tostännig is. Dat künnt Feernsehsennen wesen, Filmen, Warfspots oder Musikvideos. In’t engelsche Spraakrebeet warrt de Szenenbillner as production designer betekent. Dat Gegenstück bi’t Theater warrt as Bühnenbillner betekent.

Översicht

Szenenbillners spellt en bedüdene Rull in de Produkschoon vun Speelfilmen un bi’t Feernsehn. Se arbeit direkt tohopen mit den Filmproduzent un mit den Speelbaas un wählt de Tosamensetten un den Stil vun’t Szenenbild so ut, üm optisch de Geschicht vun den Film oder de Sennen to transporteeren. De engelsche Begreep production designer weer vun William Cameron Menzies opbröcht, as he an den Film Gone with the Wind arbeiden de. In de USA weern Lüüd mit de glieken Opgaven un mit de glieke Verantwortung vörher un faken ok later noch as art directors betekent.

Opgaven

Vun de Vörprodukschoon an arbeit de Szenenbillner tosamen mit den Speelbaas un mit den Kameramann üm dat visuelle Geföhl un den ästhetischen Ansprook vun dat Projekt uttoklamüstern. He snackt ok mit de Lüüd ut annere Afdelen vun de Film- oder Feernsehprodukschoon af, woans allns uttosehn hett, to’n Bispeel de Kledaasch, de Hoorfrisuren, dat Make-up oder ok de Trickeffekten, dat de Film opletzt en eenheitlichen Indruck maken deit.

Disse „künstlerischen Afdelen“ vun de Filmkru (eng.: art department; Szenenbild, Maskenbild, Trickeffekten, Kledaasch) ümfaat en Grupp vun Lüüd, de tohopen mit un ünner dat Seggen vun den Szenenbillner dat szeenische Element vun dat Filmwark tohopenstellt. De Szenenbildhelpsmann (eng.: art director) wacht över den Opbo un de Farvgestalten vun’t Set un passt op de Ännern op, de an echte Öörd vörnahmen warrt (richtige Schiller, ne’e Möbel usw.) He koordineert de Arbeit vun en grote Tall vun Spezialisten, de för den Opbo vun’t Szenenbild sorgen doot. Woans en Szenenbild utsehn schall, warrt vörher faken vun en Illustrater optekent. För de Utwahl vun egente Dreihöörd staht den Szenenbilnner Öördsökers (eng.: location scout) an de Siet.

De Szenenutstatter is faken een, de sik mit Binnenutstatten utkennt, is tostännig för de Dekoratschoon. Dorto höört Möbel, Tapeten, Belüchten un all de lütten Saken, de Leven in en Ruum bringt. Na Ümfang vun den Film künnt de Opgaven ok opdeelt warrn. Eenige Lüüd mööt de Saken köpen, annere stellt de Dekoratschoon tohopen un wedder annere sorgt dorför, dat de Schauspelers allns in de Hand kriegt, wat se för de Szeen bruken doot: Zigaretten, Daagblööd, Wapens oder wat jüst bruukt warrt.

Utbilln

In Düütschland gifft dat siet 1991 akademische Studiengäng an Hoochscholen för’t Utbilln to en Szenenbillner. De Düütsche Fackverband gifft eenige Steden to’n Utbilln an. Bito gifft dat de Mööglichkeit to’n Wieterbilln. To’n Bispeel gifft dat den Lehrgang Szenebild/Kostümbild, de as qualifizeeren Grundlaag för vergliekbore Rebeden as Show, Event-Utstatten oder Musical-Utstatten gelln doot.

Blangen en afslaten Eerstutbilln sünd för dat Rebeet Szenenbild tosätzliche Insichten nafraagt, neemlich nawieste Insichten as Bühnenbillner oder Helpsmann in’t Theater oder en nawiest Studium vun de Architektur oder Binnenarchitektur.

Kiek ok

• Oscar/Best Szenenbild

Borns

<references >/

Weblenken

• www.sfk-verband.de – Verband vun de düütschen Szenenbillners, Filmarchitekten un Kledaaschmakers
• Art Directors Guild, IATSE Local 800 Verband vun de Szenenbillner in de USA
  • ADG Art Direction Wiki Online Community un Wetensplattform, de mit Szenenbilln to doon hett
• British Film Designers Guild Verband vun de Szenenbillner in Grootbritannien