Never Say Never Again

Filmdaten
Plattdüütsch Titel:	—
Originaltitel:	Never Say Never Again
Düütsch Titel:	Sag niemals nie
Produkschoonsland:	Grootbritannien; USA
Johr vun’t Rutkamen:	1983
Läng:	128 Minuten
Originalspraak:	Engelsch
Öllersfreegaav in Düütschland:	FSK 12
Filmkru
Speelbaas:	Irvin Kershner
Dreihbook:	Lorenzo Semple, Jr.
Produkschoon:	Kevin McClory; Jack Schwartzman
Musik:	Michel Legrand
Kamera:	Douglas Slocombe
Snitt:	Ian Crafford
Szenenbild:	Stephen B. Grimes; Philip Harrison
Kledaasch:	Charles Knode
Dorstellers
	Sean Connery: James Bond; Max von Sydow: Ernst Stavro Blofeld; Klaus Maria Brandauer: Maximilian Largo; Bernie Casey: Felix Leiter; Alec McCowen: Q; Edward Fox: M; Pamela Salem: Miss Moneypenny; Barbara Carrera: Fatima Blush; Kim Basinger: Domino Petachi; Gavan O’Herlihy: Jack Petachi; Rowan Atkinson: Nigel Small-Fawcett; Milow Kirek: Kovacs; Saskia Cohen Tanugi: Nicole;

Never Say Never Again (op plattdüütsch se veel as „Segg nie wedder nie“; dt. Titel: Sag niemals nie) is de Titel vun en britisch-amerikaanschen Agentenfilm ut dat Johr 1983. Dorbi hannelt sik dat üm en Remake vun den James-Bond-Film Thunderball ut dat Johr 1965. De Film is nich vun Eon Productions maakt worrn un tellt dormit nich to de offiziellen Bond-Filmreeg. Jüst so as bi dat Orignal hett Sean Connery – twölf Johren na sien Utstiegen ut de Filmreeg – de Hööftrull speelt.

Inholt

De Film fangt mit Trainigssimulatschoon vun en Insatz an, bi den Bond en Börgsche befre’en schall, de em aver mit’n Mess afsteken deit. Sien Baas M schickt em dorophen in en Sanatorium, woneem he sik sien ungesund Leven afwennen schall. Tofallig warrt he gewohr, dat de Krankensüster Fatima Blush, de offiziell den Suldat Jack Petachi vun de US Air Force plegen schall, ehrn Patient eerst tagelt un denn mit em en snaaksch „Kunststück“ öövt. Se schickt Bond den nächsten Dag en Möörder op’n Hals, den he mit Möh afwehren kann.

Achtergrund is, dat Blofeld mit sien Verbrekerorganisatschoon „SPECTRE“ twee Atomsprengköpp in jemehr Gewalt bringen wüllt, üm dormit veel Geld vun de Regeren to pressen. Üm an de Sprengköpp to kamen is Petachi vun SPECTRE süchtig na Heroin maakt worrn. Em is en naue Kopie vun dat Oog vun’n US-amerikaanschen Präsident inplanteert worrn. Dormit hett he Togang to en amerikaanschen NATO-Stüttpunkt in Grootbritannien un kann de Attrappen to’n Öven dör echte Sprengköpp uttuschen. De warrt in twee Marschflaagkörper inboet, de bi en Manöver vun den SPECTRE-Agent Maximilian Largo in de See ümlenkt warrt, vun wo he jem bargen un dorna an twee verschedene Öörd versteken lett. Petachi warrt vun Fatima doodmaakt, nadem he sien Opgaav doon hett.

Bond kriggt den Opdrag, de beiden Sprengköpp torüchtobringen. Eenzige Spoor is en Narichtenoffizeer, de ahn Verlööf vun sien Stüttpunkt verswunnen is. He finnt rut, dat dat en Tosamenhang gifft twüschen dat Verswinnen vun Petachi, sien Beobachten in’t Sanatorium un den Roov vun de beiden Sprengköpp. De Spoor föhrt em wieter na Nassau op de Bahamas, woneem he de Superyacht Flying Saucer beobachten deit. Twee Anslääg, de op em veröövt warrt, överleevt he. Opletzt löpt dat Schipp ut un Bond reist na de Côte d’Azur achterran, woneem Bond vun Felix Leiter ünnerstütt warrt.

Bond kummt in Kuntakt mit Domino Petachi, de Süster vun Jack, de intwüschen Largo sien Bruut is, üm ruttofinnen, wat se vun de Saak weet. Kort later sliekt Bond sik op en Wohltätigkeitsball in, denn Largo utrichten deit. De laadt em to en sünnere Oort vun Speel in, bi dat de Spelers mit Elektroschocks bestraaft warrt. Opletzt winnt Bond dat Speel, tuuscht dat wunnen Priesgeld vun 267.ooo US-Dollar aver in gegen en Dans mit Domino. Dorbi vertellt he ehr vun den Moord an ehrn Broder. För den nächsten Dag laadt Largo Bond to’n Lunch in, üm Fatima en letzte Mööglichkeit to geven, Bond an de Siet to maken. Opletzt is dat aver Fatima, de dorbi ümkummt.

Tosamen mit Leiter beobacht he wieter de Yacht vun Largo, ahn ruttofinnen, wat de Bomben an Boord sünd oder nich. Den nächsten Dag warrt he op Largo sien Yacht opdeckt, kann aver vörher noch en Funknaricht afsetten, dat he na Palmyra in Noordafrika ünnerwegens is. Dor sparrt Largo em in un büdd Domino as Slaavsche an, vunwegen dat he rutkregen hett, dae nich mehr op sien Siet is. Bond befreet sik aver un kann ehr redden. Butendem kriggt he ok noch rut, dat de eerste Atombomb in Washington D.C. liggt, so dat se funnen warnn kann.

De tweete Bomb schall aver ünner Water in en verstekene Grott afleggt warrn. Bond finnt ok dat rut un grippt de Grott mit Hülp vun Leiter an. Largo sien Mackers warrt dorbi utschallt, Largo sülvst büxt aver jem mit den Sprengkopp ut. Ünner Water kummt dat twüschen jem to’n Showdown, man opletzt warrt Largo vun Domino mit en Harpuun doodschaten. Bond kann de Bomb afschalten. De Film dormit, dat sik Bond mit Domino an en Pool vergnöögt. As he fraagt warrt, doch wedder na’n Geheemdeenst torüchtokamen, antert he mit en Plinkern: „Never Again“.

Kritik

In’t Lexikon vun’n internatschonalen Film stünn, dat dat Remake, mit dat Connery na 12 Johren Bond-Poos torüchkeem, över wiete Strecken de tyypschen Materialslachten wies un langatige Klischees vun’t Genre an’nannerreegt. Blots de eerste halve Stünn weer en sülvstiroonsch Actionaventüer mit veel Afwesseln.^[1]

Utteken

De Film weer 1984 in twee Kategorien för den Saturn Award un eenmol ok för den Golden Globe nomineert. Uttekent weer he opletzt blots mit de Goldene Lienwand.

Achtergrund

Vördem de Film produzeert warrn künn, geev dat eenigen Rechtsstriet vör Gericht. twüschen den Produzent Kevin McClory un de Firma Eon Productions, de de offizielle Bond-Reeg rutbringen deit. De Taliafilm weer för den Verkoop vun de weltwieten Verdriefsrechten tostännig, de Warner Bros. för de USA köfft hett, wiel de Constantin Film den Verleh in Düütschland övernahmen harr. Dör den Verkoop vun de Orion Pictures Corporation dör Metro-Goldwyn-Mayer keem de Rechten an den Film in de Hannen vun Eon Productions.

De Film baseert op de Roman-Vörlaag to Thunderball vun Ian Fleming, an de Kevin McClory deelrechten hollen de. In den Rechtsstriet hett he opletzt de Mööglichkeit kregen, en Neefaten vun Thunderball to dreihn, müss sik dorbi aver mööglich nau an de Vörlaag hollen. Liekers gifft dat en poor klore Ünnerscheden to Thunderball, wat de Rullennaams angeiht, deelwies aver ok in Betog op de Geschicht sülvst.

De Filmtitel Never Say Never Again speelt dorop an, dat Connery 1967 na de Dreiharbeiten vun You Only Live Twice seggt hebben schall, dat he de Rull nie wedder spelen wull. Lieker harr he 1971 mit Diamonds Are Forever en Comeback un künn to dissen Film nochmol wedder övertüügt warrn. In den glieken Tosamenhang steiht ok sien Anmarken in de letzten Filmszeen („Never Again“) as he fraagt warrt, wanneer he na’n Geheemdeenst torüchkummt.

De Yacht Flying Saucer, de in’n Film en Rull speelt, weer to de Tiet, as de Film dreiht worrn is, in’n Besitt vun den Wapenhännler Adnan Khashoggi un harr den Naam Nabila. In’n Afspann dürckt de Filmemakers em jemehrn Dank ut mit de Wöör „Thanks A.K.“.

Klaus Maria Brandauer snackt sien Text in de Originalfaten mit en lichten düütschen Akzent un bruukt mehrmols dat Woort „Ja“ ansteed vun dat engelsche „Yes“, worophen ok Barbara Carrera eenmol mit en „Ja?“ op em reageert. Ok seggt he eenmol „Schöne Unterhaltung“ to sien Gäst. In de düütschen Synchronisatschoon blifft de Toon dorgegen stumm.

Literatur

Ian Fleming: James Bond, sag niemals nie oder Aktion Feuerball. Roman. Düütsch vun Willy Thaler. Scherz, Bern, München un Wien 1999, 175 S., ISBN 3-502-79222-4
John Cork, Bruce Scivally: James Bond. Die Legende von 007. Bern 2002, ISBN 3-502-15340-X
Danny Morgenstern, Manfred Hobsch: James Bond XXL. Schwarzkopf & Schwarzkopf, ISBN 3-89602-545-7

Borns

↑ Lexikon vun’n internatschonalen Film – Filmkritik

Weblenken

Never Say Never Again in de Internet Movie Database (engelsch)
Kritik to’n Film bi Rotten Tomatoes
Vergliek vun de Snittfaten VHS Constantin – FSK 12 DVD op Schnittberichte.com
Vergliek vun de Snittfaten BBFC PG - FSK 12 op Schnittberichte.com

James-Bond-Filmreeg

Annere
1954: Casino Royale (Feernsehfilm) | 1967: Casino Royale | 1983: Never Say Never Again

[1] Lexikon vun’n internatschonalen Film – Filmkritik

[1]