Freewillige Sülvstkontroll vun de Filmweertschop

Vun Wikipedia
FSK-Kennteken siet den 1. Dezember 2008

De Freewillige Sülvstkontroll vun de Filmweertschop (FSK) is en düütsche Organisatschoon, de vun de Spitzenorganisatschoon vun de Filmweertschop (SPIO) dragen warrt un ehrn Sitt in Wiesbaden hett.

Opgaven[ännern | Bornkood ännern]

Dat Huus vun de Friedrich-Wilhelm-Murnau-Stiftung, woneem ü. a. ok de FSK ünnerbröcht is

De Hööftopgaav vun de FSK besteiht dorin, Filmen, DVDs un annere Mediendrägers as Videokassetten, Trailers oder Warffilmen to prüfen, de in Düütschland för en apentliche Vörföhren vörsehn sünd.

Dat gifft keen Plicht, en Film dör de FSK prüfen to laten, liekers aver hebbt de Liddmaten vun de SPIO toseggt, dat se blots Produkschonen publizeeren wüllt, de vun de FSK kontrolleert worrn sünd.

De Rechtgrundlaag för de Arbeit vun de FSK sünd dat Jöögdschuulgesett (§ 14 [2] i. V. m. § 14 [6]), de Fierdagsvörschriften vun de Länner as ok de Grundsätz vun de FSK. Disse Grundsätz warrt vun de Grundsatzkomisschoon fastleggt, de ut twintig Vertreders vun dat Film- un Videogewarf, vun de apentlichen Hand un de apentlich-rechtlichen Rundfunkanstalten tosamensett is.

De FSK is finanziell unafhangig un finanzeert ehr Arbeit dör Geböhren, de för jeden kontrollerten Mediendräger betahlt warrn mutt. In de TWüschentiet warrt se as Dochtersellschop vun de SPIO in Form vun en GmbH bedreven. De SPIO nimmt aver keen Influss op de Kontrollen dör de FSK.

Op Nafraag prüüft de SPIO sülvst ok Medien op straafrechtlich bedenkliche Inholten dör en egene, unafhangige Juristenkomisschoon. Wenn dat dor nix to beanstannen gifft, warrt dat Etikett „SPIO/JK“ vergeven.

Freegaven[ännern | Bornkood ännern]

De Freegaven vun de FSK sünd:

Teken Aktuell Kennteken Kennteken vun’n 1. April 2003 bit 30. November 2008 Kennteken vör’n 1. April 2003
FSK af 0 freegeven Freegeven ahn Öllersbeschränken (witt) na § 14 JuSchG FSK Freegeven ahn Öllersbeschränken (witt) na § 7 JÖSchG FSK
FSK af 6 freegeven Freegeven af 6 Johren (geel) na § 14 JuSchG FSK Freegeven af 6 Johren (geel) na § 7 JÖSchG FSK
FSK af 12 freegeven Freegeven af 12 Johren (gröön) na § 14 JuSchG FSK Freegeven af 12 Johren (gröön) na § 7 JÖSchG FSK
FSK af 16 freegeven Freegeven af 16 Johren (blau) na § 14 JuSchG FSK Freegeven af 16 Johren (blau) na § 7 JÖSchG FSK
FSK af 18 Keen Jöögdfreegaav (root) na § 14 JuSchG FSK Nich freegeven ünner 18 Johren (root) na § 7 JÖSchG FSK
Ok: Freegeven af 18 Johren (root) na § 7 JÖSchG FSK

"De ne’en Teken sünd op de Vördersiet vun de Hüll links ünnen op en Flach vun tomindest 1200 mm² (3,46 cm x 3,46 cm) un op’n Bilddräger op en Flach vun tomindest 250 mm² (1,58 cm x 1,58 cm) antobringen (§ 12 Abs. 2 Satz 2 JuSchG)."[1]

Siet den 1. April 2003 an, drööft Kinner af 6 Johren in Kinofilmen gahn, de af 12 Johren freegeven sünd, wenn personensoorgberechtigte Lüüd dorbi sünd. Dat hett also mit Personen, de na § 1626 BGB Optuchtberechtigte för dat Kind sünd.

Kinofilmen kriegt keen FSK-Kennteken, wenn kloor is, dat de Film en swore Gefohr för de Jöögd dorstellt. en FSK-Freegaav is blots denn mööglich, wenn dat hööchsten en „Jöögdgefährden“ is oder en möögliche „Jöögdbeinträchtigen“. Warrt so en Film op en Bilddräger (Video, DVD) publizeert, warrt al keen Kennteken mehr geven, wenn en eenfache Gefohr för de Jöögd vörliggt.[2] Wenn en Film en FSK-af-18-Kennteken hebbt, künnt vun de Bundsprüüfsteed för jöögdgefährden Medien nicht mehr indizeert warrn. Ok wenn de Verdacht besteiht, dat en Straafbestand geven is, to’n Bispeel Gewaltverherrlichen, § 131 StGB, kann de FSK-Freegaav aflehnt warrn. In dissen Fall kann de Film aver bi de Juristenkommischoon vun de SPIO vörleggt warrn. Dor warrt he op straafrechtliche Bedneken hen prüüft. Aver ok wenn de Kommischoon den Film prüüft hett, kann de Film noch indizeert oder intogen warrn. Dat Signet schuult de Bedeeligten aver wietrekend för en individuelle Straafverfolgen.

Fierdagsfreegaav[ännern | Bornkood ännern]

Bi de Vergaav vun de Öllersfreegaav richt sik de FSK na dat Jöögdschuulgesett. Se prüüft de Filmen aver ok op Opföhren hen, de an de so nöömten Stillen Fierdaag stattfinnt, de in eenige Bundslänner sünners schuult sünd („fierdagsfree“).[3]

Struktur un Arbeitswies[ännern | Bornkood ännern]

För de FSK arbeit mehr as 190 Prüfers op Ehrenamt. Se warrt vun de Verbännen vun de Film- un Videoweertschop un vun de apentlichen Hand för en Duer vun dree Johren benöömt un mööt Insichten in den Üngang mit Kinner un junge Lüüd hebben oder en gliekbedüden Fackweten in de Psychologie oder de Medienwetenschoppen vörwiesen künnen. Bito drööft de Prüfers nich in de Film- oder Videoweertschop arbeiten, ümdat de Industrie nich op de Bescheden vun de Prüfers inwirken kann. Dorüm warrt bi’t Beropen vun de Prüfers dorop acht, dat se ut ünnerscheedliche Beroopsrebeden un sellschoppliche Schichten kamt.

De Proov vun de Filmen warrt in verschedene Gremien organiseert. Dat gifft den Arbeitsutschuss, de den Hööftandeel vun de Kontroll övernimmt, den Hööftutschuss, de as Instanz för’t Beropen arbeit, un den Appellatschoonsutschuss för’t Beropen in de Jöögdprüfen. In’n Alldag arbeit all dree Utschüss parallel.

De Arbeitsutschüss stellt de eerste Instanz dor. All Filmen, de bi de FSK inreicht warrt, kamt toeerst dor in de Proov. Normalerwies sett sik disse Utschuss ut söven Prüfers tohopen. Dree dorvun kamt ut de Filmweertschop un veer sünd vun apentliche Hand bestimmt. Dorto kummt de stännige Vertreder vun de Böversten Landsjöögdbehörden.

Historie[ännern | Bornkood ännern]

Na den Tweeten Weltkrieg is Erich Pommer, de fröhere Filmproduzent vun de UFA un dormols de böverste Film-Offizeer vun de US-amerikaanschen Besattensmacht mit dat Wedderopboen un de Neeorden vun de düütschen Filmweertschop beopdraagt worrn. Tosamen mit den Speelbaas Curt Oertel un den Gewarfsföhrer vun den Verband vun de Filmverlehres in Wiesbaden, Horst vun Hartlieb, hett he de Freewillige Sülvstkontroll vun de Filmweertschop na dat Vörbild vun den Hays Code, as he in de USA gellt, utklamüstert. Dat Teel vun disse Inrichten schüll wesen, dat de Staat de Hand op de Regeln vun de Filmindustrie hett un Militärzensur aftolösen, de dormols noch gell. Vun Hartlieb segg dorto, de dat eerste BEstreven weer, en Kontroll in egen Verwalten optoboen, vun wegen dat en staatliche Kontroll vör den Achtergrund vun’t Drüdde Riek, de Gefohr vun’t Politiseeren mit sich bröcht harr.

Butendem hett de Jöödgschuul bi’t Tolaten dör de Besattensmächt keen Rull speelt, so dat Kinner un junge Lüüd ahn Ingrenzen op Filmmaterial togriepen künnen. Dorüm is vun de Kultusministerkonferenz vun de westlichen Besattenszonen Anfang 1948 en „Komisschoon to’n Prüfen vun de Fraag: Gefohr vun de Jöögd dör Filmen“ inricht worrn. Se harr de Opgaav, Vörslääg för en filmischen Jöögdschuul to entwickeln, de in all Länner gellen schüll. De KOmisschoon hett ehr Arbeit in’t hess’sche Kultusministerium in Wiesbaden opnahmen. To de Verhanneln sünd blangen de Vertreders ut de annern Kultusministerien ok Lüüd ut de Filmweertschop, ut de Karken un ut de kathoolschen Jöögd vun Bayern inlaadt worrn.

Dat Resultat dorvun weer dat Inrichten vun en gemeensome Sülvstkontrollinstanz mit den Naam „Freewillige Sülvstkontroll vun de Filmweertschop“, de an’n 18. Juli 1949 den eersten Film to’n Begootachten op’n Disch kregen hett. Dat weer de Kummedie Intimitäten vun Paul Martin ut dat Johr 1944, de to de Tiet vun’n Natschonalsozialismus verboden weer. Över den Film is diskuteert worrn, vun wegen, dat en Szeen dorin weer, wo sik twee, ’n Söten geevt. Opletzt weer de aver för en apentliche Vörföhren freegeven.[4] An’n 28. September 1949 is dat Seggen över de Kontroll vun disse Medien vun de Allieerten Militärbehörden offiziell an de FSK överdragen worrn.

De Länner in de Sowjetische Besattenszoonsowjetischen Besattenszoon hebbt sik an de FSK nich bedeeligt, vun wgen dat in de in’t sülve Johr grünnten DDR de Filmkontroll vun’n Staat övernahmen worrn is. In de DDR weer en P vör’t Kennteken vun de Öllersfreegaav stellt, also t. B. „P14“, differenzeert weer dor vun 6 bit 18 Johren in’n Afstand vun twee Johren.

Mit dat Novelleeren vun’t Jöögdschuulgesett in’t Johr 1985 weer de Plicht to’n Kennteken op ne’e Medien utwiet, also op Videofilmen un glieke Bilddrägers. De Bundsverband Video e. V. hett sik dorophen an de FSK anslaten, üm all ben ehr publizeerten Videofilmen prüfen to laten. In’t glieke Johr is ok de Utwieten üm de „Freegaav ahn Öllersinschränken“ maakt worrn.

Na de Weddervereenigen hebbt sik ok de ne’en Bundslänner an de FSK anslaten un jemehr Vertreder in de Prüüfutschüss schickt. Un siet 1995 warrt ok digitale Medien op en Öllersfreegaav prüüft, wenn se filmische Sequenzen bargt. An’n 9. Dezember 2004 is mit den Film Sophie Scholl – Die letzten Tage de 100.000. Film vun de FSK prüüft worrn.

De FSK hett 2009 ne’e Logos inföhrt, op de ok Lagerbestännen ümstellt warrn müssen. De Positschoon för dat Logo is as bi de USK ünnen links un mutt op dat Cover 1200 mm² groot wesen. Op den Datendräger sülvst is de Grött 250 mm². Vele Herstellers levert jemehr digitalen Mdien ut den Grund mit Covers to ümdreihn ut, wobi de Binnensiet denn keen FSK-Teken opwiest.

Ümstreden Indelen[ännern | Bornkood ännern]

Wenn de Öllersfreegaav hooch utfallt, warrt licht Stimmen luut vun wegen Zensur, Verklemmheit oder övertogene Inschränken. Fallt de Freegaav to siet ut, warrt dorgegen seggt, dat de Intressen vun’n Jöögdschuul nich nooch acht oder toveel Bedacht op de Wünsch vun de Filmindustrie leggt warrt. Filmen, de vele Tokiekers anteht, warrt dorna to sacht anfaat, vun wegen dat dor ok veel Ümsatz vermoodt warrt. Dorför mööt de Filmen, de weniger Spood verspreken doot, ünner strenge Vergaven lieden, üm in de Dorstellen na buten ’n Utgliek to hebben. Ünner dit Vörgahn harrn siet de 1970er Johren vör allen de düütschen Filmen to lieden, de faken nicht ünner 16 Johren freegeven weern, wiel Filmen ut Hollywood faken af 12 oder sogors af 6 Johren freegeven weern.

Na de Ansicht vun Kritikers güng de Tendenz vun de FSK-Indeelen (FSK 6 oder FSK 12) in de 2000er-Johren tomeist över na dat sietere Öller. Dat gifft de Utwahl vun Bispelen wedder, de aver keen Oordeel verlööft, wat disse Thees wohrhaftig stimmt.

Enkelte Entscheeden, de in de Medien wegen dat siete Öller diskuteert worrn sünd, weern t. B.

  • Jurassic Park, bi den de Freegaav af 12 Johren en wekenlange Diskuschoon utlöst hett.
  • Harry Potter and the Chamber of Secrets is 2002 nich af 6, man af 12 Johren freegeven worrn. De Filmverleh hett den Film dorüm in Düütschland in körtere Form publizeert. De Diskuschoon, de achteran över de Vergaven vun Öllersfreegaven in Düütschland losgahn is, hett dorto föhrt, dat de faste Instopen vun „af 6“ un „af 12“ dör en ne’e Freegaavmööglichkeit utwiet worrn is, de sik an de Logik vun’t US-amerikaansche „R“-Rating orienteert. Dorbi drööft Filmen, de an sik eerst af 12 Johren freegeven sünd ok vun jüngere Kinner af 6 in’t Kino keken warrn, wenn en Peronsensoorgberechtigten dorbi is.
  • De Film Keinohrhasen is af 6 Johren freegeven worrn. Nadem sik de Bundslänner düchtig doröver opregt hebbt, is de Freegaav denn in „af 12“ ännert worrn. Sogors de Speelbaas un Schauspeler Til Schweiger meen in en Interview, dat he sik ok över de Freegaav af 12 al freit harr. Ümstreden weren hier de velen Sexszenen, de smuddige Ümgangsspraak un de Sexverkloren, de opletzt to de högere Freegaav föhrt hebbt.
  • De Anime-Film Hotaru no haka (火垂るの墓, dt.: Die letzten Glühwürmchen) stellt teemlich drastisch dor, woans en Jung un en Kind in Japan an’t Enn vun’n Tweeten Weltkrieg verhungern doot. Disse Film weer vun de FSK af 6 Johren freegeven. In annere Länner dorgegen weer de af ruchweg 12 Johren freegeven.
  • Ok annere Filmen, in de teemlich veel smuddig snackt warrt, as to’n Bispeel Borat, de af 12 Johren freegeven is, warrt as problemaatsch ansehn. In’n Fall vun Borat is woll de Spraak teemlich hard, man de Dorstellen bargt an sik keen Problemen.

En in de Medien diskuteerten gegendeeligen Fall vun to harde Freegaav weer to’n Bispeel de Kinnerfilm Die grüne Wolke, de „af 12“ freegeven weer un bi Experten bi’t Kinnerfilmfestival Golden Spatz bannige Kritik utlöst hett.

Deelwies gefft dat de Foddern, dat de Regeln vun de FSK, de ut dat Johr 1951 stammt, moderniseert warrn müssen. Dör de düütlich annere Medienkumpetenz vun de hüütigen Kinner, hebbt sik de Regeln in de Twüschentiet överhollt un warrt as to stuur ansehn. En Bispeel is de Film City Hunter, de 1993 kört af 18 freegeven weer un vundaag ahn Körten af 12 Johren freegeven is. Butendem warrt kritiseert, dat de Stoop vun FSK-6 op FSK-12 to groot is, vun wegen dat Kinner jüst in dit Öller grote Verännern dörmaakt.

Literatur[ännern | Bornkood ännern]

  • Jürgen Kniep: Keine Jugendfreigabe. Filmzensur in Westdeutschland, 1949-1990, Wallstein Verlag, Göttingen 2010 ISBN 9783835306387

Kiek ok[ännern | Bornkood ännern]

Borns[ännern | Bornkood ännern]

  1. Ne’e Kennteken vun de FSK
  2. Bundesarbeitsgemeinschaft Kinder- und Jugendschutz e. V.
  3. Regeln för stille Fierdag
  4. vgl. Wolfgang Hübner: Die Jedi-Ritter der Leinwand-Moral. In: Associated Press Worldstream, 22. August 1999, 20:14 Eastern Standard Time, Frankfort an’n Main

Weblenken[ännern | Bornkood ännern]