John Barry (Filmkomponist)

Vun Wikipedia
John Barry, 2006

John Barry OBE (* 3. November 1933 in York, England as John Barry Prendergast; roor ok ünner sien Pseudonym Michael Angelo; † 30. Januar 2011 in Oyster Bay)[1] weer een vun de spoodrieksten britschen Filmkomponisten un Arrangeuren vun’t 20. Johrhunnert. He hett ’n grote Tall an Filmpriesen wunnen as to’n Bispeel fief Oscars. Weltwiet bekannt worrn is he vör allem dör sien Kompositschonen för de James-Bond-Filmreeg.

Leven un Loopbahn[ännern | Bornkood ännern]

Fröhe Johren[ännern | Bornkood ännern]

John Barry weer dat jüngste vun dree Kinner. Sien Mudder, Doris Prendergast (borene Wilkinson), weer Pianistin un sien Vadder, Jack Xavier Prendergast, weer de Besitter vun acht Kinos in’n Noorden vun England.

Barry is in de Mitt von York op de Bar Convent Catholic Junior School na School gahn. De Disziplin un Ornen, de dor herrschen de, güngen em gau gegen den Streek un hebbt em för sien Leven prägt. Wietere Begeevnissen, de em prägt hebbt, weern de Bombenangrepen dör de düütsche Luftwapen in’n Tweeten Weltkrieg. Dorbi hett de Dood un Tonichtenmaken ut de Neeg mitkregen.

As he ölven Johr oolt weer, güng he in en högere, vun Protestanten föhrte Privatschool, de St. Peter’s public school, woneem he Klavierünnerricht nahmen hett. Al fröher harr he sien Hang na de Musik opdeckt un heeg den Wunsch, Musiker to warrn. För em weer dat butendem normal, dat he jümmer wedder de aktuellen Filmen kieken de, vun wegen de Kinokeed vun sien Vadder. Barry segg later, he fünn dat as de beste School, de en Filmkomponist hebben künn, sik Filmen tosamen mit Lüüd antokieken, de dorför betahlt hebbt. As Teenager hett he en musikaalsche Utbilln bi Dr. Francis Jackson maakt, de Master of Music vun de Yorker Kathedraal weer.

Na’n Krieg weer Barry vun’t Fever för Jazz-Musik packt, mit de em sien Broder Patrick bekannt maakt hett. Bit dorhen harr he vör allen mit klassische Musik to doon hatt, man nu kreeg he ok en Sinn för de Ünnerhollnsmusik.

Anfang vun de 1950er Johren hett he bi George Swift Ünnerricht för Trumpeet un füng an, eerste lüttere Stücken to komponeeren. To disse Tiet hett Barry op’n Korrespondenzweg de Kompositschoonstechnik na dat System vun Joseph Schillinger studeert, dat ok vun de Arrangeuren in de Stan-Kenton-Band anwennt worrn is. Se baseert op’n Oort vun mathemaatsche Bereken. De Musik vun Stan Kenton hett Barry bannig goot gefallen un ehr bewunnert.

Vun 1952 an hett Barry dree Johr lang sien Militärdeenst afleist. He weer eerst enige Weken in Richmond un is denn na Ägypten, woneem jüst de Sueskries in sien harde Phaas güng. Later is sien Eenheit na Zypern verleggt worrn, woneem de politische Laag ok düchtig anspannt weer.

Wiel de Militärtiet weer Barry Liddmaat vun en Armee-Grupp, wat em de Mööglichkeit geev, sien musikaalschen Anlagen wieter to verbetern un sien Künnen jeden Dag to proven. Vun Zypern ut hett he ok wedder op’n Korrespondenzweg en Feernkurs beleggt. Ditmol weer dat bi Bill Russo, de as egentlichen Klamüsterer vun Stan-Kenton-Sound gell. Dordör hett Barry sik Insichten in’t Arrangement för Big Bands anegent.

The John Barry Seven[ännern | Bornkood ännern]

Na sien Utscheden ut de Armee hett Barry 1957 de Rock-’n’-Roll-Grupp „The John Barry Seven“ grünnt, mit de he in England teemlich veel Spood harr. Blangen Barry sülvst höörn to de Grupp Les Reed, Vic Flick, Mike Peters, Jimmy Stead, Dennis King un Doug Wright. Barry hett toeerst versöcht, as Singer vun de Grupp optotreden, man sien Stimmvermögen harr Grenzen. So hebbt sik de Musikers gau op dat Spelen vun Instrumentalstücken beschränkt.

Na Optreden in’t Feernsehn, vör allen in de Sennen 6.5 Special un Oh Boy vun de BBC, spoodriek verköffte Schallplaten un ok wegen sien ansleegsche Managerin Eve Taylor, künn he opletzt in’t Filmgewarf instiegen, wat he al lang wullt hett. In’t Johr 1960 hett he den Opdrag kregen, de Musik för den Film Beat Girl (dt. Titel: Heiß auf nackten Steinen) to schrieven, in den Rock ’n’ Roll en groten Rull innehmen schüll. Mit den Film schüll butendem ok de Singer Adam Faith noch bekannter maakt warrn.

De grote Dörbrook as Filmkomponist keem för Barry denn mit de James-Bond-Filmen, mit de dat 1962 losgüng. De Produzenten harrn em den Opdrag geven, en poppig Titel-Thema för 007 to arrangeeren för jemehrn eersten Bond-Film Dr. No. De musikaalsch Vörlaag dorto harr Monty Norman levert.

James Bond[ännern | Bornkood ännern]

Wat nipp un nau dorto föhrt hett, dat Barry mitarbeit hett, as ok wat de nauen Afspraken in’n Rahmen vun sien Arbeit bi den Film angeiht, gifft dat bit hüüt veel Spekulatschonen un hitte Diskusschonen. Norman un Barry hebbt dorto mitünner gegendeeligte Saken vertellt, de ok na all de Johren noch nich vullstännig verkloort warrn künnen.

Dat geev Andüden, ünner annern vun Barry sülvst, dat he dat beropene Thema sxhreven harr un nich Norman, wat aver vun Norman bestreden warrt. To Recht, vun wegen dat he free vun Twievel beleggemn, dat de musikaalsche Grundidee vun em stammt un op en Leed baseert, dat he för en Musical schreven harr, dat nienicht ümsett worrn is. En Prozess vör den High Court vun England is 2001 to Gunsten vun Monty Norman to Enn gahn. Em is dorbi to vulle Schrieverschop tokennt worrn.

Man, jüst so wenig Twievel gifft dat aver doran, dat Barry mit sien Arrangement vun 1962 dat Bond-Thema düchtig ännert un utwiet hett. Den bedüden Andeel, den Barry an den Spood vun’t Stück harr, kennt Monty ok an. Dat dorut so en groten Spood warrn schüll, hett to de Tiet ok noch nümms ahnt. Op jeden Fall is dorna Barry för de folgen Bond-Filmen ünner Verdrag nahmen worrn un nich Norman.

Bi den Bond-Film Goldfinger vun 1964 weer Barry ok verantwoortlich för dat weltbekannte Titelleed, dat he tosamen mit de Texterns Anthony Newley un Leslie Bricusse schreven hett. Shirley Bassey hett dat Leed sungen un harr dormit een vun ehr gröttsten Hits vun ehr Loopbahn. Barry hett ehr för Diamonds are Forever un Moonraker later wedder för’t Singen kregen. Bit 1987 hett Barry mit Posen för de Bond-Filmen arbeit. Na den Film The Living Daylights hett he dormit aver ophört. Dat geev Versöken, em wedder torüch to holen, man Barry wull dat nich mehr un geev ok in INterviews an, dat för em dat Kapitel „James Bond“ afslaten weer.

Wessel in de USA[ännern | Bornkood ännern]

Na den Spood mit Bond hett Barry ok in Hollywood Foot faten künnt. Mitt vun de 1970er Johren is he in de USA gahn, nich toletzt ok as he Lasten mit den britschen Fiskus harr. Toeerst güng he na Hollywood un töög later denn an de Oostküst vun de USA, woneem he toletzt mit sien Fro un sien Söhn en jümmer torüchtogener’t Leven in Oyster Bay op Long Island buten vun New York City föhren de.

Mit den Wessel in de USA hett sik ok Barry sien Stil wannelt. Se is düütlich langsomer worrn un legg en starkeren Swoorpunkt op Striekinstrumenten as vörher. De utfallen Arrangements, as se ut sien Arbeiten vun de Tiet vun 1964-1969 kennt hett, sünd roren worrn. Vör allen in de tweeten Half vun sien Loopbahn, müss he sik faken anhören, dat he wenig Infäll harr.

In’t Johr 1988 harr he en Reet vun de Spiesröhr. Woans dat dorto keem is nich kloor, man üm sien Gesundheit weer dat lange Tiet nich goot bestellt. Eerst 1990 weer he wedder so wiet bi Kräft, dat he wedder arebiten künn, as Kevin Costner em för den Film Dances with Wolves anfraagt hett. För dat Wark is he mit sien föfften un letzten Oscar uttekent worrn. In de 1990er Johren wannel sik dat Denken in Hollywood, wat sik ok op de Arbeit vun Barry utwirken de: Enige vun sien Filmmusiken weern in de Folg aflehnt, wat jüst so ok annere öllere Filmkomponisten so güng as to’n Bispeel Elmer Bernstein oder Maurice Jarre. Barry hett sik dorophen deelweis ut dat Filmgewarf torüchtogen.

Halfrohstand[ännern | Bornkood ännern]

In’t Johr 2003 schüll he de Musik to den Film The Incredibles schrieven, man dat geev ünnerscheedliche Ansichten, so dat sik Barry na korte Tiet ut dat Projekt wedder torüchtogen hett. Barry letzte Musik, de he 2001 to Enigma fardigstellt harr, hett jüst so as annere Musiken ut sien laat Wark, nich mehr de frischen un rieken Infäll as sien fröhen Kompositschonen.

In’t Johr 2004 hett Barry mit sien langejohrigen Mitarbeiter un Texter Don Black en Musical-Projekt toennbröcht, dat he al ruchweg 40 Johren vör harr. Dat Stück mit den Titel Brighton Rock baseert op en Roman mit glieken Titel vun Graham Greene un weer in’n Harvst 2004 in’t Almeida Theater in London ooropföhrt. Man, dat Stück keem nich goot an un weer vun de Kritikers mit Aflehnen opnahmen. Na wenige Opföhren weer dat wedder ut dat Programm nahmen. Barry sien Musicla mit den meisten Spood bleev dormit Billy, dat he 1974 mit Don Black schreven harr. De Hööftdorsteller Michael Crawford harr dormit sien Dörbrook as Musical-Star.

In’n November 2007 hett sik dat 8. Festival International Musique & Cinéma D’Auxerre mit Barry sien Wark befaat. De Komponist kreeg in Auxerre den Ordre des Arts et des Lettres vun’n französschen Kulturminister verleht. Dat geev mit em ok en Podiumsdiskusschoon un en Kunzert, bi dat Barry aver blots kort optreden de. Ok bi annere Tributveranstalten weer he to sehn. Man, vun wegen sien slecht Gesundheit weer em dat toletzt nich mehr mööglich, persönlich an de Ehrungen för sien Levenswark in Wien[2] (2009) un Gent[3] deeltonehmen.

Dat Leed Our Time Is Now hett Barry 2009 tosamen mit Don Black för Shirley Bassey schreven. Dat schüll sien letzte Neekompositschoon wesen, de noch to sien Leevtieten op CD rutkamen is.

Privat[ännern | Bornkood ännern]

Barry weer veermol verheiraat: 1959 hett he Barbara Pickard heiraat, vun de he sik 1963 scheden laten hett. Vun 1965 bit 1968 harr he en Eh mit Jane Birkin un de drüdde weer mit Jane Sidney vun 1969 bit 1972. Vun’n 3. Januar 1978 an weer he mit Laurie Barry verheiraat. De Komponist harr veer Kinner.

An ’n 30. Januar 2011 is Barry na lange Krankheit an de Naklapp vun en Hartinfarkt doodbleven bi sik to Huus in Oyster Bay in’n Bundsstaat New York[4].

Filmmusik (Utwahl)[ännern | Bornkood ännern]

Johr Originaltitel dt. Titel
1960 Beat Girl Heiss auf nackten Steinen
1962 Dr. No James Bond 007 jagt Dr. No
1964 Goldfinger Goldfinger
1965 Thunderball Feuerball
1965 The Knack…and How to Get it Der gewisse Kniff
1966 The Chase Ein Mann wird gejagt
1966 Born Free Frei geboren – Königin der Wildnis
1967 You Only Live Twice Man lebt nur zweimal
1968 The Lion in the Winter Der Löwe im Winter
1968 Deadfall Die Todesfalle
1969 Midnight Cowboy Asphalt-Cowboy
1969 On Her Majesty’s Secret Service Im Auftrag ihrer Majestät
1971 They Might Be Giants Der verkehrte Sherlok Holmes
1971 Mary, Queen of Scots Maria Stuart, Königin von Schottland
1971 Diamonds Are Forever Diamantenfieber
1974 The Longest Yard Die Weltumseglung
1974 The Man with the Golden Gun Der Mann mit dem goldenen Colt
1976 Robin and Marian Robin und Marian
1977 The White Buffalo Der weiße Büffel
1977 The Deep Die Tiefe
1979 Moonraker Moonraker
1979 Hanover Street Das tödliche Dreieck
1979 The Black Hole Das Schwarze Loch
1980 Somewhere in Time Ein tödlicher Traum
1981 The Legend of the Lone Ranger Die Legende vom einsamen Ranger
1981 Body Heat Body Heat – Eine heißkalte Frau
1983 Octopussy Octopussy
1984 Until September Liebe ohne Ausweg
1985 A View to a Kill Im Angesicht des Todes
1985 Jagged Edge Das Messer
1985 Out of Africa Jenseits von Afrika
1986 Peggy Sue Got Married Peggy Sue hat geheiratet
1987 The Living Daylights Der Hauch des Todes
1988 Masquerade Masquerade – Ein tödliches Spiel
1990 Dances with Wolves Der mit dem Wolf tanzt
1993 Indecent Proposal Ein unmoralisches Angebot
1993 My Life Mein Leben für dich
1994 The Specialist Der Spezialist
1995 The Scarlet Letter Der scharlachrote Buchstabe
1997 Swept from the Sea Amy Foster – Im Meer der Gefühle
1998 Mercury Rising Das Mercury Puzzle
1998 Playing by Heart Leben und lieben in L.A.
2001 Enigma Enigma – Das Geheimnis

Aflehnte Filmmusiken (Utwahl)[ännern | Bornkood ännern]

De Titels in disse List stellt Filmen dor, för de John Barry Musik komponeert hett, de aver denn nich annahmen worrn is. To’n Deel hannelt sik dat üm enkelte Themen för en Demonstratschoon, deelwies aver ok kumplett inspeelte Partituren.

Filmpriesen (Utwahl)[ännern | Bornkood ännern]

Barry weer en spoodrieken Komponist, de för siene Warken 42 mol för Filmpriesen vörslahn weer. Dorvun hett he de Hälft ok wunnen, dorünner alleen fiefmol den Oscar. Uttekent worrn is he ünner annern:

Musicals[ännern | Bornkood ännern]

  • 1965: Passion Flower Hotel
  • 1971: Lolita My Love
  • 1974: Billy
  • 1981: The Little Prince and the Aviator (Wegen Geldnoot weer dat Projekt wenige Daag vör de Ooropföhren afbroken)
  • 2004: Brighton Rock

Diskografie (Utwahl ahn Filmmusiken)[ännern | Bornkood ännern]

Kunzeptalben[ännern | Bornkood ännern]

  • 1961: Stringbeat
  • 1975: Americans
  • 1988: The Beyondness Of Things (mit enige Stücken ut Barry sien aflehnte Filmmusik to The Horse Whisperer)
  • 2001: Eternal Echoes (mit en Stück ut de aflehnten Filmmusik to Goodbye Lover)
  • 2005: Here’s To The Heroes (Barry hett tosamen mit Don Black dree ne’e Leder bistüert.)

Anthologien[ännern | Bornkood ännern]

  • The Collection: 40 Years Of Film Music (Silva Screen FILMXCD 349 – 4-CD-Set mit Neeinspelen vun tallrieke Soundtrack-Suiten)
  • The Hits & The Misses (Play It Again PLAY 007 – Doppel-CD mit frühen Barry-Werken)
  • John Barry Revisited (Fantastic Voyage FVQD034 – 4-CD-Set mit frühen Barry-Werken)
  • Themependium (Sony/BMG 88697079502 – 4-CD-Set, vör allen vun Barry sülvst dirigeerte Originalopnahmen)
  • Zulu (Silva Screen FILMXCD 305 – Dubbel-CD mit de Neeinspelen vun’n vullstännigen Soundtrack un annere Leder)

Literatur[ännern | Bornkood ännern]

  • Leonard, Geoff; Walker, Pete; Bramley, Gareth: John Barry. The Man With The Midas Touch. Bristol 2008, ISBN 978-1-904537-77-9 (engelsch, aktualiseerte un stark utwiet Neeoplaag vun John Barry. A Life In Music, ISBN 0-09-478530-9)
  • Foreign Composers in: William Darby und Jack Du Bois: American Film Music. Major Composers, Techniques, Trends, 1915 - 1990. McFarland, Jefferson 1990, ISBN 0-7864-0753-0, S. 390–392 (engelsch, korte Översicht mit Notenbispelen to Barry sien Filmmusik in’n Rahmen vun een Kapitel)

Borns[ännern | Bornkood ännern]

  1. BBC News: Composer John Barry dies aged 77 (31. Januar 2011) (engelsch)
  2. Hollywood in Vienna (2009)
  3. Film Festival Ghent: John Barry in Concert (2010)
  4. Jon Burlingame: John Barry dies at 77. In: Variety (31. Januar 2011) (engelsch)

Weblenken[ännern | Bornkood ännern]