Wischhobenersand

Wapen/Flagg	Koort
Basisdaten
Bundsland: Neddersassen Landkreis: Stood Gemeen: Drochters
Inwahners:
Postleettall:	21706
Vörwahl:	04143
Geograafsche Laag:	53° 46′ N, 9° 21′ O

Wischhobenersand (hoochdüütsch Wischhafenersand) is en Rebeed in de Gemeen Drochters in’n Landkreis Stood, Neddersassen, dat fröher en Insel in de Elv weer.

Geografie

Wischhobenersand liggt as Sand twüschen den Königspriel in’n Westen, de den Sand von Kahlesand trennt, un dat Sandlock in’n Oosten, dat Wischhobenersand von Kruutsand trennt. In’n Noorden trennt de Wischhobener Süderelv den Sand von’n fasten Wall un in’n Noordoosten liggt de Hauptstroom von de Elv. Ganz in’n Süden drippt Wischhobenersand bi Neeland ok wedder op’n fasten Wall, von den dat dör de Wischobener Süderelv trennt is. Dat Rebeed tellt to Keden.

En richtig Eiland is Wischhobenersand vondaag nich mehr. De Priel in’n Westen un dat Sandlock in’n Oosten sünd blots noch smalle Gravens un dat Rebeed liggt kumplett binnen den Hauptdiek an de Elv. Bi Stormflood is dat Rebeed dör dat Ruthenstroom-Sparrwark un dat Sparrwark Wischhoben kumplett vör dat Water ut de Elv schuult. De ole Loop von’n Königspriel is jüstso as de ole Loop von dat Sandlock von’n Hauptdiek von de Elv dörsneden.

De Naveröörd sünd Kruutsand in’n Süüdoosten, Doornbusch in’n Süden, Neeland in’n Süüdwesten, Kahlesand un Wischhoben in’n Westen un Hamelwöörden in’n Noordwesten. Op de annere Sied von de Elv in’n Noordoosten liggt Glückstadt.

Historie

Bevör na de Stormflood 1962 de Hauptdiek an de Elv un de Sparrwarken boot worrn sünd, hett dat keen Dieken geven, de Wischhobenersand schuult hebbt.

Dat geev op Wischhobenersand in dat 19. Johrhunnert maal negen Hüüs, de op Worten boot weren. Dor sünd vondaag blots noch fiev von nableven.

Verwaltungsgeschicht

De Oort hett vör 1859 to dat Amt Wischhoben tohöört un denn von 1859 bet 1885 to dat Amt Freeborg. Na 1885 weer dat in’n Kreis Keden. 1932 is dat Deel von’n Kreis Stood worrn.

Nadem op’n Sand in dat 19. Johrhunnert de eersten Hüüs boot worrn sünd, hebbt de Inwahners to de Gemeen Kruutsand tohöört. De Gemeen Kruutsand is an’n 1. Juli 1972 mit de Gemeenreform in Neddersassen Deel von de ne’e Gemeen Drochters worrn.

Inwahnertall

Johr	Inwahners
1791-00-001791	3 Füürsteden
1824-00-001824	3 Füürsteden
1848-00-001848	70 Lüüd, 6 Hüüs
1871-12-011. Dezember 1871	80 Lüüd, 9 Hüüs

Religion

Wischhobenersand is evangeelsch-luthersch präägt un höört to dat Kaspel von de Kark op Kruutsand.

För de Kathoolschen is de Hillig-Geist-Kark in Stood tostännig.

Weertschop un Infrastruktur

Verkehr

Wischhobenersand is över en lüttjere Straat verbunnen mit de Kreisstraat 19, de von Kruutsand ut in’n Süüdwesten na Doornbusch an de Landsstraat 111 ran geiht. De K 45 löppt von Kruutsand na Süden un ennt in Drochters an de L 111.

De L 111 geiht in’n Noordwesten na Wischhoben, is dor mit de Bundsstraat 495 verbunnen un denn na Freeborg. In’n Süüdwesten löppt de L 111 över Drochters, Aßel un Bützfleet na Stood.

De nächste Autobahn is de Autobahn 26 (Afsnidd Stood–Hamborg). De Opfohrt 3 Stood-Oost liggt so 27 Kilometer in’n Süüdoosten von Wischhobenersand an de L 111.

De nächsten Bahnhööv sünd so bi 22 Kilometer wied weg an de Nedderelvbahn. Dat sünd de Bahnhoff Hemmoor in’n Süüdwesten un de Bahnhoff Hammoh in’n Süden. Von 1899 bet 1936 hett dat ok Personenverkehr op de Kedener Kreisbahn geven. De nächste Bahnhoff weer de Bahnhoff Doornbusch-Kruutsand.