Wischhobener Süderelv
De Wischhobener Süderelv weer en Siedenarm von de Ünnerelv, de vondaag blots noch in Resten besteiht.
Historie[ännern | Bornkood ännern]
Bevör de Elv in dat 19. un 20. Johrhunnert dat enge un depe Bedd kregen hett, dat se vondaag hett, weer de Stroom düüdlich breder. Twüschen Barnkroog un Hamelwöörden hett de Elv en Bagen maakt, de direkt an de Öörd Weth, Aßel, Ritsch, Gauensiek, Drochters, Theisbrügg, Nindörp, Doornbusch, Neeland un Wischhoben langsgüng. In düssen Bagen legen verscheden Sannen: Aßlersand, Kruutsand, Gauensiekersand, Kahlesand un Wischhobenersand.
Aßlersand weer dör de Barnkroger Süderelv von’n fasten Wall trennt. De annern veer Sannen weren dör de Wischhobener Süderelv von’n fasten Wall trennt. Twüschen Kruutsand un Gauensiekersand leeg de Kruutsanner Binnenelv un twüschen Kruutsand un Aßlersand de Ruthenstroom.
De Wischhobener Süderelv lööp dormit von’n Ruthenstroom ut an Gauensiek, Drochters, Theisbrügg, Nindörp, Doornbusch, Neeland un Wischhoben langs un hett sik bi Hamelwöörden wedder mit’n Hauptstroom von de Elv verbunnen.
Dör Waterboarbeiden is aver jümmer minner Water dör de Süderelv flaten. De Waterlööp sünd jümmer mehr toslickt. Al in dat 19. Johrhunnert harr de Süderelv dorüm twüschen Gauensiek un Doornbusch mehr den Charakter von en breden Graven as von en breden Elvarm so as ehrdem.
Na de Stormflood 1962 hett de Elv en ne’en Hauptdiek kregen. Mit düssen Hauptdiek is de Barnkroger Süderelv afdiekt worrn. De Diek güng över Aßlersand na’n Ruthenstroom, de nu mit dat Ruthenstroom-Sparrwark afsparrt is. Denn geiht de Diek över Kruutsand na de Münn von de Wischhobener Süderelv. Dor is de Süderelv mit dat Sparrwark Wischhoben afsparrt. De beiden Sparrwarken sünd 1978 in Bedriev gahn. Dormit liggt de Wischhobener Süderelv nu meist kumplett binnendieks.
Toströöm[ännern | Bornkood ännern]
Dat Water ut dat Achterland flütt över en Reeg Fleten in de Süderelv: Gauensieker Slüsenfleet, Sietwenner Slüsenfleet, Theisbrügger Slüsenfleet, Nindörper Slüsenfleet, Doorbuscher Slüsenfleet, Wulfsbroker Fleet, Neelanner Moorkanaal, Wischhobener Moorkanaal un Wischhobener Slüsenfleet.
Weblenken[ännern | Bornkood ännern]
Wischhobener Süderelv. Mehr Biller, Videos oder Audiodateien to’t Thema gifft dat bi Wikimedia Commons.