Ruthenstroom-Sparrwark

Vun Wikipedia
Zur Navigation springen Zur Suche springen
Ruthenstroom mit dat Sparrwark

Dat Ruthenstroom-Sparrwark bi Drochters liggt in’n Ruthenstroom twüschen Kruutsand un Aßlersand. Dat Sparrwark is Deel von de Hoogwaterschuul-Anlagen langs de Ünnerelv mit ehre Tieden.

Historie[ännern | Bornkood ännern]

Na de Stormflood von 1962 sünd Plaans maakt worrn, üm de Küst von de Ünnerelv beter vör Stormfloden to schulen. Vörher weren Kruutsand un Aßlersand Eilannen in de Elv, de ok keen egen Dieken harrn. De Eilannen weren dör de Barnkroger Süderelv un de Wischhobener Süderelv von’n fasten Wall trennt un dör den Ruthenstroom vonenanner. De ole Dieklien lööp bi de Öörd Barnkroog, Weth, Aßel, Ritsch, Gauensiek, Drochters, Theisbrügg, Nindörp, Doornbusch, Neeland, Wischhoben un Hamelwöörden langs. De ne’en Plaans hebbt nu vörsehn, dat de Hauptdiek bi Weth dör de Barnkroger Süderelv un merrn dör Aßlersand na’n Ruthenstroom geiht un von dor över Kruutsand na de Wischhobener Süderelv un bi Hamelwöörden an de ole Dieklien ran. Ruthenstroom un Wischhobener Süderelv schullen mit Sparrwarken afsparrt warrn. De ne’e Hauptdiek un de Sparrwarken sünd denn ok würklich boot worrn. Dat Ruthenstroom-Sparrwark un dat Sparrwark Wischhoben an de Wischhobener Süderelv weren 1978 trech. Dormit weren Kruutsand (mit Kahlesand, Wischhobenersand, Gauensiekersand un Delen von Aßlersand) un de Küst von Weth bet na Wischhoben vör Stormfloden schuult.

Dat Bowark is 18,8 Meter breed un 37 Meter deep. Dat hett twee 7 Meter brede Gatten, de dör en Stemmdoor un en Heevdoor verslaten warrn köönt. De Drempeldeepd liggt bi 2,8 Meter ünner NN, de Böverkant von de Dörfohrt is bi 4,5 Meter över NN. Dat Sparrwark warrt bi Stormflood in’t Winterhalvjohr bi en Waterstand von 2,2 Meter över NN und in’t Sommerhalvjohr bi 1,9 Meter över NN slaten. Von wegen dat dor blots lüttje Sportbööd dörföhrt, is ut Köstengrünn en slaten Bowies wählt worrn.

Bedreven warrt dat Sparrwark von de Bedrievsstell Stood von’n Neddersassischen Landsbedriev för Waterweertschop, Küsten- un Naturschuul (NLWKN).

Weblenken[ännern | Bornkood ännern]

Commons-logo.svg Ruthenstroom-Sparrwark. Mehr Biller, Videos oder Audiodateien to’t Thema gifft dat bi Wikimedia Commons.


Koordinaten:53° 43′ N, 9° 25′ O