Parlamentswahlen in Belize

Vun Wikipedia

In de Parlamentswahlen in Belize warrt na de Verfaten von Belize dat Repräsentantenhuus von dat Land Belize wählt. Dat Parlament besteiht ut Repräsentantenhuus un Senaat, aver de Senaat is beropen un warrt na de Wahlen von Vertreders von verscheden Gruppen (vör allen de Regerungs- un de Oppositschoonspartei) bestimmt.

System[ännern | Bornkood ännern]

Na’n regulären Turnus gifft dat all fiev Johr Wahlen.

Dat is en Mehrheitswahl na dat Westminster-System. Dat heet, dat gifft 31 Wahlkreise (Stand 2020), in de je een Afornten wählt warrt. Wokeen de mehrsten Stimmen in’n Wahlkreis kriggt, winnt den kumpletten Wahlkreis. Dat föhrt dorto, dat Partein in dat Repräsentantenhuus deelwies över- un ünnerrepräsenteert sünd. So hett 1993 de UDP mit 48,7 % von de Stimmen 16 von 29 Seten kregen, wieldes de PUP mit 51,2 % blots 13 Seten haalt hett. 1961 dorgegen hett de PUP mit 64,7 % von de Stimmen all 18 Seten wunnen un de Oppositschoonspartein keeneen. Düt System, dat ok first-past-the-post nöömt warrt, föhrt dorto, dat Belize en Tweeparteinsystem hett, in dat lüttjere Partein keen grote Rull speelt.

Kannedaten mööt Börger von Belize un an keen anner Land bunnen ween. Wenn en Person pankrott geiht, denn dröff de Person keen Maat von dat Repräsentantenhuus mehr ween.

Wenn en Maat von dat Repräsentantenhuus dör Dood oder annere Utfallgrünn ut dat Parlament utscheedt, denn gifft dat in’n bedrapen Wahlkreis Nawahlen. Dat is von 1954 bet nu (Stand 2020) veer Maal passeert: 1993 in Freetown nadem Derek Aikman för pankrott verkloort worrn is, 2003 na Agripino Cawich sien Dood in Cayo Süüd, 2015 in Cayo Noord nadem Joseph Mahmud sien Mandaat dalleggt harr un toletzt in Dangriga, nadem Ivan Ramos sien Mandaat dalleggt harr.

Historie[ännern | Bornkood ännern]

De eersten fre’en un allgemenen Wahlen hett dat 1954 geven, as in Brietsch-Honduras dat eerste Maal de Legislativversammlung wählt worrn is.

To’n 1. Januar 1964 is en Tweekamersystem inföhrt worrn, sietdem gifft dat Repräsentantenhuus un Senaat.

1978 is dat Wahlöller von 21 op 18 ännert worrn.

Siet 1954 hett dat 15 Wahlen geven (Stand Juni 2020). De nächste Wahl is för November 2020 ansett.