Lohmöhlen

Wapen/Flagg	Koort
Basisdaten
Bundsland: Neddersassen Landkreis: Cuxhoben Samtgemeen: Hemmoor Gemeen: Heckthusen
Inwahners:
Hööchd:	3 m över NN
Postleettall:	21755
Vörwahl:	04774
Geograafsche Laag:	53° 37′ N, 9° 11′ O
Laag von Lohmöhlen in de Gemeen Heckthusen (Koort lett sik anklicken)

Luftbild, Lohmöhlen links (2011)

Lohmöhlen (hoochdüütsch Laumühlen) is en Dörp in de Gemeen Heckthusen in’n Landkreis Cuxhoben, Neddersassen. Dat liggt an de Oost un hett bi 200 Inwahners.

Geografie

Lohmöhlen liggt an de Oost un is na Süden hen vun dissen Stroom afspirrt. Naveröörd sünd Klint in’n Oosten, Seth in’n Westen, Kronenborg in’n Süden un na Noorden to Ihlbeek.

Historie

Lohmöhlen kummt üm un bi 1560 toeerst in de Oorkunnen vör. Dat geev al fröher enen Oort, Burcholt, de 1059 tooerst vörkummt, un woll in de Gegend legen hett, woneem nu Lohmöhlen un Klint sünd. Bi dat Dörp liggt ok dat Good Lohmöhlen vun de Freeherren-Familie Marschalck von Bachtenbrock.

De Naam Lohmöhlen kummt vun de Loh to’n Garven, de ut Ekenloov maakt worrn is. Dit Ekenloov is mit ene Watermöhl lütt maakt worrn. Dat Wapen vun Lohmöhlen wiest dorvun baven in gröön ene Ecker mit Ekenloov op sülver Grund, neern en halv sülvern Rad vun ene Watermöhl, op blauen Grund.

De Akten vun de ole Gemeen Lohmöhlen doot siet 1951 in’t Kreisarchiv vun’n Landkreis Cuxhoben in Oterndörp liggen.

De Diek bi Lohmöhlen is ünner annern 1824 un 1954 braken. In de Johren 2003 bet 2006 is de Oostendiek nochmal wedder utbetert worrn.

Verwaltungsgeschicht

De Oort hett vör 1850 to dat Gericht Heckthusen höört. 1850 is dat denn Deel von dat Amt Himmelpoorten worrn, dor aver man twee Johr bleven un is 1852 an dat Amt Oosten kamen. 1885 is dat Amt Oosten in’n Kreis Neehuus opgahn. 1932 is de Oort an’n Landkreis Land Hadeln kamen un 1977 Deel von’n Landkreis Cuxhoben worrn.

1962 keem de Gemeen to de Samtgemeen an de Oost. Ganz ophöört mit de Gemeen hett dat 1972, as Lohmöhlen mit de Gemeenreform in Neddersassen to Heckthusen keem.

Inwahnertall

Johr	Inwahners
1824-00-001824	24 Füürsteden
1848-00-001848	201 Lüüd, 36 Hüüs
1910-12-011. Dezember 1910	208
1925-00-001925	212
1933-00-001933	190
1939-00-001939	169

Religion

Lohmöhlen is evangeelsch-luthersch präägt un höört to dat Kaspel von de Marienkark in Heckthusen.

För de Kathoolschen is de St.-Nikolaus-Kapell in Heckthusen tostännig, de siet 1. September 2010 to de Karkengemeen Hillig Geist in Stood tohöört.

Kultur

Kriegerdenkmaal

Kriegerdenkmaal

Dat Kriegerdenkmaal in Lohmöhlen erinnert an de Fullenen ut de beiden Weltkriege. In’n Eersten Weltkrieg sünd söven Mannslüüd ut Lohmöhlen fullen, in’n Tweten 19.

Weertschop un Infrastruktur

As freewillige Füürwehr is de Füürwehr Klint för Lohmöhlen mit tostännig.

Verkehr

Dör Lohmöhlen geiht de Landsstraat 116, de in’n Oosten in Heckthusen an de Bundsstraat 73 rangeiht. In Westen löppt de L 116 na Loomst wieder un geiht dor an de Bundsstraat 495 ran. Na Noorden löppt en lüttje Straat na Bornbarg, un in’n Süden geiht en Diekweg na’n Höben in Brobargen. Brobargen sülvst un Kronenborg direkt op de anner Siet Oost sünd nich direkt mit Lohmöhlen verbunnen. Dat geiht blots in’n Sommer över de Brobarger Fähr oder över de Brügg över de Oost in Heckthusen. De nächste Bahnhoff is de Bahnhoff Heckthusen an de Nedderelvbahn.

Scholen

De Schölers ut Lohmöhlen gaht na de Grundschool Heckthusen. Later köönt se op de Oberschool Loomst wesseln oder alternativ op de Haupt- un Realschool Hemmoor. As Gymnasium is dat Gymnasium Warstood för den Oort tostännig.

Weblenken

Lohmöhlen. Mehr Biller, Videos oder Audiodateien to’t Thema gifft dat bi Wikimedia Commons.