Lehrden
| Wapen/Flagg | Koort | |
|---|---|---|
 |
| |
| Basisdaten | ||
| Inwahners: | ||
| Postleettall: | 27374 | |
| Vörwahl: | 05168 | |
| Geograafsche Laag: | Koordinaten:52° 56′ N, 9° 29′ O52° 56′ N, 9° 29′ O | |
|
| ||
Lehrden (hoochdüütsch Lehrden) is en lütten Oort in de Gemeen Visselhöövd in’n Landkreis Rodenborg, Neddersassen. Binnen de Gemeen höört de Oort to de polietsche Oortschop Bleckwedel.
Geografie
[ännern | Bornkood ännern]De Oort liggt in de Lümbörger Heid. Dat Water ut dat Rebeed flütt över de Lehrde af.
De Naveröörd sünd Egenbossel, Sankt Pauli un de Hoff Tadel in’n Noorden, Bleckwedel un Jeddingen in’n Noordoosten, Königshoff un Stellich in’n Oosten, Sievern in’n Süüdoosten, Idsen in’n Süden, Hamwie’e un Groten Heinz in’n Süüdwesten un Lüttjen Heinz, Bennbössel un Schepinkel in’n Noordwesten.
Historie
[ännern | Bornkood ännern]Verwaltungsgeschicht
[ännern | Bornkood ännern]In de Franzosentied von 1810 bet 1814 hett de Oort to de Mairie Stellich in’n Kanton Wasra höört. Dat Rebeed hett in disse Tied 1810 to dat Königriek Westfalen un von 1811 bet 1814 to dat Franzöösche Kaiserriek ünner Napoleon höört.
De Oort hett vör 1885 to de Amtsvaagdie Visselhöövd in dat Amt Rodenborg tohöört. Na 1885 weer dat in’n Kreis Rodenborg, de 1977 mit’n Landkreis Bremervöör to’n ne’en un grötteren Landkreis Rodenborg tohoopgahn is.
De Oort höört von öllers bi de Buurschop un later de Gemeen Bleckwedel mit bi, de an’n 1. März 1974 mit de Gemeenreform in Neddersassen Deel von de Gemeen Visselhöövd worrn is. Sietdem höört de Oort binnen de Gemeen to de Oortschop Bleckwedel.
Inwahnertall
[ännern | Bornkood ännern]| Johr | Inwahners |
|---|---|
| 1791[1] | 3 Füürsteden |
| 1812[2] | 39 |
| 1824[3] | 6 Füürsteden |
| 1848[4] | 38 Lüüd, 6 Hüüs |
| 1. Dezember 1871[5] | 35 Lüüd, 6 Hüüs |
| 1. Dezember 1885[6] | 35 Lüüd, 7 Hüüs |
| 1. Dezember 1905[7] | 51 Lüüd, 7 Hüüs |
Religion
[ännern | Bornkood ännern]Lehrden is evangeelsch-luthersch präägt un höört to dat Kaspel von de Johannis-Kark in Visselhöövd.
För de Kathoolschen weer von 1852 bet 1960 de Kapell op Slott Kedenborg tostännig. Nu is de Hart-Jesu-Kark in Visselhöövd tostännig, de siet 1. August 2004 to de Karkengemeen St. Maria von’n hilligen Rosenkranz in Wasra tohöört.
De Doden warrt op’n Karkhoff Bleckwedel begraven, de siet 1921 besteiht. Vörher sünd de Lüüd bi de Kark in Visselhöövd begraven worrn.
Weertschop un Infrastruktur
[ännern | Bornkood ännern]För Lehrden is de freewillige Füürwehr Jeddingen mit tostännig.
Verkehr
[ännern | Bornkood ännern]De Straat, de dör den Oort löppt, föhrt in’n Westen na Groten Heinz an de Kreisstraat 22 (Landkreis Veern) un in’n Oosten över Königshoff na Stellich an de K 124 (Landkreis Heidkreis). Von Lehrden ut geiht en Straat na Noorden an de Kreisstraten K 240 un K 228, de all beid an de Landsstraat 171 ran föhrt. De L 171 löppt in’n Süüdwesten över Kerklinneln na Veern un in’n Noordoosten över Jeddingen na Visselhöövd an de Bundsstraat 440 un wieder na Neenkerken.
De nächste Autobahn is de Autobahn 27 (Afsnidd Bremen–Wasra). De Opfohrt 26 Veern-Oost liggt so 15 Kilometer in’n Westen von Lehrden an de L 171 un de Opfohrt 27 Wasra-West 16 Kilometer in’n Süüdoosten an de B 209.
De nächste Bahnhoff is so bi teihn Kilometer wied weg in’n Noordoosten de Bahnhoff Visselhöövd an de Bahnlien Ülzen–Langwedel. De Bahnlien is 1873 anleggt worrn. Bet 1987 hett dat ok an de Bahnhööv Bennbössel un Jeddingen noch Personenverkehr geven, de blots söss Kilometer wied weg weren.
Scholen
[ännern | Bornkood ännern]De Kinner ut’n Oort gaht na de Grundschool Jeddingen. Bet 1965 sünd se noch op de Volksschool in Bleckwedel gahn. As düsse School dichtmaakt worrn is, sünd se na Jeddingen wesselt.
Footnoten
[ännern | Bornkood ännern]- ↑ Christoph Barthold Scharf: Statistisch-Topographische Samlungen zur genaueren Kentnis aller das Churfürstenthum Braunschweig-Lüneburg ausmachenden Provinzen. Meier, Bremen 1791, Sied 139
- ↑ Albrecht Friedrich Ludolph Lasius: Der französische Kayser-Staat unter der Regierung des Kaysers Napoleon des Großen, im Jahre 1812, Band 1. Kißling, Ossenbrügge 1813, Sied 115
- ↑ Curt Heinrich Conrad Friedrich Jansen: Statistisches Handbuch des Königreichs Hannover. Hannover 1824, Sied 366
- ↑ Friedrich Wilhelm Harseim, Carl Schlüter: Statistisches Handbuch für das Königreich Hannover. Schlütersche Hoffbookdruckeree, Hannover 1848, Sied 153
- ↑ Die Gemeinden und Gutsbezirke des Preussischen Staates und ihre Bevölkerung. Berlin 1873, Sied 167
- ↑ Gemeindelexikon für das Königreich Preußen. Auf Grund der Materialien der Volkszählung vom 1. Dezember 1885. Verlag des Königlichen statistischen Bureaus, Berlin 1888, Sied 178
- ↑ Gemeindelexikon für das Königreich Preußen. Auf Grund der Materialien der Volkszählung vom 1. Dezember 1905. Verlag des Königlichen statistischen Landesamtes, Berlin 1908, Sied 150