Gröps
| Wapen/Flagg | Koort | |
|---|---|---|
 |
| |
| Basisdaten | ||
| Inwahners: | ||
| Hööchd: | 89 m över NN | |
| Postleettall: | 29640 | |
| Vörwahl: | 05199 | |
| Geograafsche Laag: | Koordinaten:53° 4′ N, 9° 49′ O53° 4′ N, 9° 49′ O | |
|
| ||
Gröps (hoochdüütsch Gröps) is en lütten Oort in de Gemeen Snevern in’n Landkreis Heidkreis, Neddersassen. Binnen de Gemeen höört de Oort to de polietsche Oortschop Langloh.
Geografie
[ännern | Bornkood ännern]De Oort liggt in de Lümbörger Heid. Dat Water ut dat Rebeed flütt över’n Rönnbeek na de Böhm hen af.
De Naveröörd sünd Hämsen un Fraas in’n Noorden, Häbe in’n Noordoosten, Surbossel un Hillen in’n Oosten, Huckenrieth in’n Süüdoosten, Woltern in’n Süden, Reimen in’n Süüdwesten un Vorwark un Langloh in’n Noordwesten.
Historie
[ännern | Bornkood ännern]Verwaltungsgeschicht
[ännern | Bornkood ännern]In de Franzosentied hett de Oort toeerst 1810 bet 1811 binnen dat Königriek Westfalen to de Mairie Woltern in’n Kanton Soltau höört un denn von 1811 bet 1814 to dat Franzöösche Kaiserriek ünner Napoleon un dor to de Mairie Soltau in’n Kanton Wasra.
De Oort hett vör 1852 to de Amtsvaagdie Snevern in dat Amt Rodenborg tohöört un is in dat Johr denn in dat ne’e Amt Snevern wesselt. Dit Amt hett blots söven Johr bestahn. Von 1859 bet 1885 hett Gröps to dat Amt Soltau höört. Na 1885 weer dat in’n Kreis Soltau. 1977 is dat Deel von’n Landkreis Soltau-Fambossel worrn, de siet 2011 Heidkreis heten deit.
De Oort hett von öllers bi de Gemeen Langloh bihöört, de an’n 1. März 1974 mit de Gemeenreform in Neddersassen Deel von de Gemeen Snevern worrn is. Sietdem höört Gröps binnen de Gemeen to de Oortschop Langloh, de en egen Oortsvörsteiher hett.
Inwahnertall
[ännern | Bornkood ännern]| Johr | Inwahners |
|---|---|
| 1791[1] | 3 Füürsteden |
| 1812[2] | 55 |
| 1824[3] | 6 Füürsteden |
| 1848[4] | 56 Lüüd, 7 Hüüs |
| 1. Dezember 1871[5] | 50 Lüüd, 8 Hüüs |
| 1. Dezember 1885[6] | 64 Lüüd, 10 Hüüs |
| 1. Dezember 1905[7] | 71 Lüüd, 11 Hüüs |
Religion
[ännern | Bornkood ännern]Gröps is evangeelsch-luthersch präägt un höört to dat Kaspel von de Hillig-Geist-Kark in Woltern. Bet 1925 hett de Oort noch to dat Kaspel von de Peter-un-Paul-Kark in Snevern höört. De Oort hett dat Kaspel wesselt, von wegen dat Woltern dichter bi weer as Snevern.
För de Kathoolschen is de St.-Ansgar-Kark in Snevern tostännig, de siet 1. November 2006 to de St.-Maria-Karkengemeen in Soltau tohöört. De St.-Ansgar-Kark is 1963 boot un an’n 1. Januar 1964 egenstännige Karkengemeen worrn. Vörher is dat Rebeed ok al von de St.-Maria-Kark in Soltau betreut worrn.
Weertschop un Infrastruktur
[ännern | Bornkood ännern]För Gröps is de freewillige Füürwehr Langloh mit tostännig.
Verkehr
[ännern | Bornkood ännern]Dör Gröps löppt de Kreisstraat 33, de in’n Noordwesten över Hämsen na Snevern un Zoarn an de Landsstraten L 171 un L 170 ran geiht un in’n Süden na Woltern an de K 24. Lüttjere Straten loopt na Langloh un Surbossel.
De nächste Autobahn is de Autobahn 7 (Afsnidd Hamborg–Hannover). De Opfohrten 43a Snevern (in’n Noordoosten an de B 3) un 44 Soltau-Oost (in’n Süüdoosten an de B 71) doot all beid so 13 Kilometer wied von Gröps weg liggen.
De nächste Bahnhoff is so bi söven Kilometer wied weg in’n Noorden de Bahnhoff Snevern an de Heidbahn. Fröher harr Gröps ok en egen lüttjen Bahnhoff an de Heidbahn, de vondaag aver nich mehr besteiht.
Scholen
[ännern | Bornkood ännern]De Kinner ut Gröps gaht in Snevern op de Grundschool an’t Pietzmoor.
Footnoten
[ännern | Bornkood ännern]- ↑ Christoph Barthold Scharf: Statistisch-Topographische Samlungen zur genaueren Kentnis aller das Churfürstenthum Braunschweig-Lüneburg ausmachenden Provinzen. Meier, Bremen 1791, Sied 86
- ↑ Albrecht Friedrich Ludolph Lasius: Der französische Kayser-Staat unter der Regierung des Kaysers Napoleon des Großen, im Jahre 1812, Band 1. Kißling, Ossenbrügge 1813, Sied 116
- ↑ Curt Heinrich Conrad Friedrich Jansen: Statistisches Handbuch des Königreichs Hannover. Hannover 1824, Sied 224
- ↑ Friedrich Wilhelm Harseim, Carl Schlüter: Statistisches Handbuch für das Königreich Hannover. Schlütersche Hoffbookdruckeree, Hannover 1848, Sied 153
- ↑ Die Gemeinden und Gutsbezirke des Preussischen Staates und ihre Bevölkerung. Berlin 1873, Sied 93
- ↑ Gemeindelexikon für das Königreich Preußen. Auf Grund der Materialien der Volkszählung vom 1. Dezember 1885. Verlag des Königlichen statistischen Bureaus, Berlin 1888, Sied 102
- ↑ Gemeindelexikon für das Königreich Preußen. Auf Grund der Materialien der Volkszählung vom 1. Dezember 1905. Verlag des Königlichen statistischen Landesamtes, Berlin 1908, Sied 153