Freschenhusen

Wapen/Flagg	Koort
Basisdaten
Bundsland: Neddersassen Landkreis: Horborg Gemeen: Seevdaal
Inwahners:
Postleettall:	21220
Vörwahl:	04105
Geograafsche Laag:	53° 22′ N, 10° 4′ O

Freschenhusen (hoochdüütsch Freschenhausen) is en eenstelligen Hoff in de Gemeen Seevdaal in’n Landkreis Horborg, Neddersassen. He is as Bodenkmaal schuult.

Geografie

Freschenhusen liggt an’n Noordrand von de Lümbörger Heid in de Neegd von’n Kohlenbeek, de later in’n Ashuser Möhlenbeek münnt. Na Süüdoosten to liggt de Baukweddel un in’n Noordoosten dat Naturschuulrebeed Stemmbrook.

De Naveröörd sünd Fachenfelln un Stell in’n Noordoosten, Ashusen un Scharmbääk in’n Süüdoosten, Ohlendörp un Holtörp in’n Süden, Ramßel un Host in’n Süüdwesten un Maschen-Heid un Maschen-Dörp in’n Noordwesten.

Historie

De Hoff is siet 1572 in Besitt von de Familie Benthack. De Besitter Gerd Benthack hett keen Nafohren un will den Besitt mit 220 Hektar Land na sien Dood an’n Vereen Naturschutzpark afgeven (Stand 2010).

Verwaltungsgeschicht

In de Franzosentied von 1810 bet 1814 hett de Oort to de Mairie Parrns in’n Kanton Winsen höört. Dat Rebeed hett in disse Tied 1810 to dat Königriek Westfalen un von 1811 bet 1814 to dat Franzöösche Kaiserriek ünner Napoleon höört.

De Oort hett vör 1885 to de Vaagdie Parrns in dat Amt Winsen tohöört. Blots in de Tied 1852 bet 1859 hett de Oort kort to dat Amt Parrns höört. Na 1885 weer dat in’n Kreis Winsen. 1932 is dat Deel von’n Kreis Horborg worrn.

In de Midd von dat 19. Johrhunnert is Freschenhusen Deel von de Gemeen Maschen worrn. De Oort is an’n 1. Juli 1972 as Deel von de Gemeen Maschen mit de Gemeenreform in Neddersassen an de Gemeen Seevdaal kamen.

Inwahnertall

Johr	Inwahners
1793-00-001793	1 Füürsteed
1824-00-001824	1 Füürsteed
1848-00-001848	25 Lüüd, 2 Hüüs
1871-12-011. Dezember 1871	33 Lüüd, 3 Hüüs

Religion

Freschenhusen is evangeelsch-luthersch präägt un höört to dat Kaspel von de Fredenskark in Maschen. Vör 1953 hett de Oort to dat Kaspel von de Mauritius-Kark in Hittfeld höört.

För de Kathoolschen is de St.-Ansgar-Kark in Hittfeld tostännig, de siet 2014 Deel von de Karkengemeen Goden Hirt in Winsen is. Toeerst hett de Oort to de Karkengemeen St. Petrus in Bookholt tohöört. De St.-Ansgar-Kark is 1964 boot worrn un hett bet 1978 noch to de Parree Bookholt höört. To’n 1. April 1978 is St. Altfrid in Mäkelfeld egenstännige Parree un Hittfeld Filialkark worrn.

Weertschop un Infrastruktur

Verkehr

Freschenhusen is över Maschen mit de Kreisstraten K 10 un K 86 verbunnen.

De nächste Autobahn is de Autobahn 39 (Afsnidd Hamborg–Lümborg). De Opfohrt 2 Maschen liggt good dree Kilometer in’n Noordwesten von Freschenhusen an de K 10/K 86. Över de A 39 un dat Maschener Krüüz/Hoster Dreeeck besteiht ok Ansluss an de Autobahn 1 (Afsnidd Hamborg–Bremen) un de Autobahn 7 (Afsnidd Hamborg–Hannover).

De nächste Bahnhoff is so bi fiev Kilometer wied weg in’n Noordoosten de Bahnhoff Stell an de Bahnlien Hamborg–Hannover. 1977 hebbt se en Bahnlien von de Bahnlien Bookholt–Wittenbarg in Jesborg na’n Rangeerbahnhoff Maschen anleggt, de to de Tied ok nee boot worrn is. Disse reine Göderbahn (Göderümgehungsbahn Hamborg) geiht direkt an’n Hoff Freschenhusen vörbi.