Dolores Balderamos-García

Anna Dolores Balderamos-García (* 1957) is en Politikerin ut Belize (PUP).

Leven

Balderamos is 1957 boren. Balderamos is en Süsterdochter to George Cadle Price. Se güng in Belize na School un hett an dat Viterbo College in La Crosse (USA) studeert, dat se 1979 cum laude afslaten hett. Tosätzlich hett se en Master-Afsluss in Engelsch an de Marquette University in Milwaukee maakt. 1982 is se an de University of the West Indies un hett dor Juristeree studeert. 1985 hett se an de Norman Manley Law School in Mona (Jamaika) en Bachelor of Laws maakt un is 1987 in Belize as Avkatin tolaten worrn.

Se weer 1989 bet 1991 Maat von dat Board of Directors von dat Belize Sugar Board, 1990 bet 1992 bi de Broadcasting Corporation of Belize un 1995 bet 1996 von dat Belize Zoo and Tropical Educational Center.

As Avkatin hett se en egen Kanzlie in Belize-Stadt. 2017 is se Senior Counsel worrn.

Siet de Johren 1980 is Balderamos Moderatorin von dat Programm Jazz Vibes op’n Radiosenner VIBES Radio. En poor Johren lang harr se ok in de Belize Times en Kolumne to Jazz-Themen. 2009 sünd Texten ut de Kolumne as Book rutkamen (Jazz Sketches; Profiles of Thirty Greats).

Politik

1993 is se as Vertrederin von de PUP-Oppositschoon in’n Senaat beropen worrn.

Bi de Parlamentswahl in Belize 1998 weer se Kannedatin för de PUP in’n Wahlkreis Port Loyola un hett de Wahl mit 58,78 % von de Stimmen gegen Anthony Martinez von de UDP wunnen. Bi de Wahl 2003 hett se in’n sülven Wahlkreis blots noch 38,98 % von de Stimmen kregen un gegen Martinez verloren.

Dormit weer se von’n 27. August 1998 bet 5. März 2003 Afornte von dat Repräsentantenhuus von Belize. Se weer in düsse Tied ünner Premierminister Said Musa Ministerin för Minschliche Entwicklung, Froonslüüd un Junge Lüüd. 1999 hett se tosätzlich von Jose Coye de Tostännigkeit för dat Thema Zivilsellschop övernahmen, dorför aver de Tostännigkeit för Junge Lüüd an Mark Espat afgeven.

2005 is se noch en tweet Maal in’n Senaat beropen worrn.

Bi de Wahl 2012 weer se Kannedatin för de PUP in’n Wahlkreis Belize-Land Zentraal un hett de Wahl mit 51,19 % von de Stimmen gegen Michael Hutchinson von de UDP wunnen. De Wahl 2015 dorgegen hett se mit 47,35 % von de Stimmen gegen Beverly Diane Castillo von de UDP verloren.

Dormit weer Balderamos-García von 2012 bet 2015 en tweet Maal Afornte von dat Repräsentantenhuus.