Titania (Maand)

Vun Wikipedia
Wesseln na: Navigatschoon, Söök
Bild von Titania, dat 1986 von de Sonde Voyager 2 maakt worrn is.

Titania is de gröttste Maand von den Planeten Uranus. Opdeckt worrn is Titania von Wilhelm Herschel an’n 11. Januar 1787, veer Johr nardem Herschel ok den Uranus sülbst opdeckt harr. Wie all de groten Maanden von den Uranus is ok disse no Figuren ut dat Wark von William Shakespeare oder Alexander Pope nöömt. Titania wörr de Elvenkönigin un Fru von Oberon in Shakespeares A Midsummer Night’s Dream (hdt.: Der Sommernachtstraum). De Naam wörr von Herschels Söhn John Herschel vörslagen worrn.

Ümloop[ännern | Bornkood ännern]

Titania bruukt so bi 8 Daag un 17 Stünnen, üm eenmal üm Uranus rümtolopen. Dorbi is de Maand in’t Middel 463.300 km von em weg. Sien Baan is mit en Exzentrizität von 0,0017 blots een beten von Kreis verscheeden un üm 0,34° gegen den Planetenäquator kippt.

Wi de meesten Maanden, so hett ok Titania een bunnen Rotatschoon mit Uranus un wiest em dorüm jümmer de glieke Siet.

Egenschoppen[ännern | Bornkood ännern]

Titania ist 1986 von de Ruumsond Voyager 2 fotografeert und vermeten worrn. Dorüm weet wi al teemlich veel över den Maand. De Dörmeter von Titania is ungefäähr 1578 km bi en middlere Dicht von 1,71 g/cm³. De Albedo von Titania is mit 0,28 teemlich hoch. Dat bedüdt, dat 28 % von dat Licht, dat op Titania opdröppt, wedder trüchschient warrt.

Tohopensett is de Maand wohrschienlich to en Half ut Wateries, 30 % Silikat-Steen un de restlichen 20 % ut Kohlenstoff-Verbinnen as t. B. Methan. De Temperatur op Titania liggt bi -190 °C un de Sworkraft is man ok blots 4 % von dat, wat wi bi uns op de Eer kennt.

De opfälligste Struktur op de Bavensiet is en bannig lang Slucht gegen de de Grand Canyon op de Eer man blots Flegendreck is. Von dat Utmaat her kanns de verglieken mit dat Valles Mariniensis op’n Mars oder Ithaca Chasma op den Saturn-Maand Tethys.