Setebos (Maand)

Vun Wikipedia

Setebos (ok S/1999 U1 oder Uranus XIX) is een vun de lütten buteren Maanden vun den Planeten Uranus.

Naam un Opdecken[ännern | Bornkood ännern]

De Maand weer an’n 18. Juli 1999 vun de Astronomen John J. Kavelaars, Brett J. Gladman, Matthew J. Holman, Jean-Marc Petit un Hans Scholl opdeckt.

Toeerst hett he sien vörlöpig Beteken kregen, as dat bi de Internatschonale Astronoomsche Union (IAU) so begäng is. Sien hüütigen Naam hett he eerst later kregen. De Maanden sünd all na Figuren ut de Warken vun William Shakespeare oder Alexander Pope nöömt, wat op en Traditschoon torüch geiht, mit de John Herschel mol anfungen harr. So is dat naher bibehollen worrn. Setebos is en Gott ut Shakespeares Kummedie The Tempest (dt.: Der Sturm), de vun de Hex Sycorax un den Slüngel Caliban anbeedt warrt.

Ümloopbahn[ännern | Bornkood ännern]

Setebos hett vun den Uranus en middleren Afstand vun ungefäähr 17.501.000 km. Üm eenmol üm den Planeten rümtokreisen bruukt de Maand üm un bi 2234 Daag un 18 Stünnen. Vun kreisen kann dorbi kuum noch snackt warrn: De Exzentrizität vun de Bahn is 0,5843, so dat dat mehr en langtogen Ellips is. De Bahn is bito ok noch üm 158,161° gegen den Äquater vun’n Uranus kippt. Dat bedüüd, dat de Ümloop retrograd verlöpt, also gegen de Rotatschoonsrichten vun’n Uranus.

Opbo un Egenschoppen[ännern | Bornkood ännern]

De Maand hett en Dörmeter vun ungefäähr 24 km. He is also en vun de ganz lütten Maanden. De middlere Dicht liggt üm un bi 1,5 g/cm³, wat nich sünners veel is. Dat düüdt dorop hen, dat Setebos vör allen ut Wateries un silikatsch Steen tohopensett is. De Albedo liggt bi 0,07. Anners snackt, warrt ruchweg 7% vun dat infallend Sünnenlicht wedder reflekteert. Dormit is Setebos ok en ehr düsteren Maand.