Willemshusen
| Wapen/Flagg | Koort | |
|---|---|---|
 |
| |
| Basisdaten | ||
| Inwahners: | ||
| Postleettall: | 28870 | |
| Vörwahl: | 04293 | |
| Geograafsche Laag: | Koordinaten:53° 8′ N, 9° 4′ O53° 8′ N, 9° 4′ O | |
|
| ||
Willemshusen (hoochdüütsch Wilhelmshausen) is en Oort in de Gemeen Otterbarg in’n Landkreis Veern, Neddersassen. Dat is en Deel von Quelkhoorn un höört binnen de Gemeen Otterbarg to de polietsche Oortschop Hu’e.
Geografie
[ännern | Bornkood ännern]De Oort liggt op’n Rand von de Zevener Geest hen na de Maschen un dat Moor langs de Wümm.
De Naveröörd sünd Quelkhoorn in’n Noordoosten, Suurheid in’n Oosten, de Breednau in’n Süüdoosten, Hu’e in’n Süden un Rutendorp in’n Westen un Noorden.
Historie
[ännern | Bornkood ännern]De Oort bestünn toeerst blots ut en enkelten Hoff un is bet an dat Enn von dat 19. Johrhunnert op dree Hööv wussen. Mit dat 20. Johrhunnert sünd dor denn aver en Reeg Hüüs boot worrn.
Verwaltungsgeschicht
[ännern | Bornkood ännern]De Oort hett vör 1859 to de Amtsvaagdie Wilst in dat Amt Otterbarg tohöört un denn von 1859 bet 1880 to dat Amt Zeven. 1880 is de Oort denn in dat Amt Achem wesselt, ut dat 1885 de Kreis Achem worrn is. 1932 is dat Deel von’n Kreis Veern worrn.
De Oort hett polietsch von öllers bi Quelkhoorn mit bihöört. De Gemeen Quelkhoorn is 1968 Deel von de Gemeen Hu’e worrn un an’n 1. Juli 1972 mit de Gemeenreform in Neddersassen Deel von de Gemeen Otterbarg.
Inwahnertall
[ännern | Bornkood ännern]| Johr | Inwahners |
|---|---|
| 1. Dezember 1871[1] | 18 Lüüd, 3 Hüüs |
| 1. Dezember 1885[2] | 13 Lüüd, 3 Hüüs |
| 1. Dezember 1905[3] | 151 Lüüd, 32 Hüüs |
Religion
[ännern | Bornkood ännern]Willemshusen is evangeelsch-luthersch präägt un höört to dat Kaspel von de Leevfroon-Kark in Hu’e. Dat is sied 1868 so. Vörher hett de Oort to dat Kaspel von de Petri-Kark in Wilst höört.
För de Kathoolschen is de St.-Matthias-Kark in Achem tostännig.
De Doden warrt op’n Karkhoff Quelkhoorn begraven, de 1869 anleggt worrn is. Düsse Karkhoff liggt in dat Rebeed von Willemshusen.
Weertschop un Infrastruktur
[ännern | Bornkood ännern]Verkehr
[ännern | Bornkood ännern]Dör Willemshusen löppt de Landsstraat 154, de in’n Noordwesten över Rutendorp un Seebargen na Falkenbarg bi Leendaal geiht un in’n Oosten na Otterbarg, Söttmer un Rodenborg. In’n Süden geiht de Kreisstraat 2 na Hu’e un Eiten un in’n Noorden de K 34 över Rutendorp un Huxfeld op Grasbarg to.
De nächste Autobahn is de A 1 (Afsnidd Hamborg–Bremen). De Opfohrten 50 Stuckenbossel un 52 Eiten doot all beid so ölven Kilometer wied weg von Willemshusen liggen.
De nächste Bahnhoff is so bi söss Kilometer wied weg in’n Süüdwesten de Bahnhoff Sao’ern an de Bahnlien Hamborg–Bremen.
Scholen
[ännern | Bornkood ännern]De Oort harr to keen Tied en egen School. De Kinner sünd in Quelkhoorn na School gahn. In de Johren 1960 is in Willemshusen en neet Schoolhuus för de Grundschool Hu’e boot worrn, na de de Schölers ut Willemshusen nu gaht. Na de 4. Klass wesselt se in de Regel op de Oberschool Wümmschool in Otterbarg oder op dat Gymnasium Otterbarg.
Lüüd
[ännern | Bornkood ännern]De NSDAP-Politiker Heinrich Peper weer ut Willemshusen. De Künstler Otto Modersohn (Künstlerkolonie Hu’e) harr en Tied lang in Willemshusen en Atelier.
Footnoten
[ännern | Bornkood ännern]- ↑ Die Gemeinden und Gutsbezirke des Preussischen Staates und ihre Bevölkerung. Berlin 1873, Sied 171
- ↑ Gemeindelexikon für das Königreich Preußen. Auf Grund der Materialien der Volkszählung vom 1. Dezember 1885. Verlag des Königlichen statistischen Bureaus, Berlin 1888, Sied 177
- ↑ Gemeindelexikon für das Königreich Preußen. Auf Grund der Materialien der Volkszählung vom 1. Dezember 1905. Verlag des Königlichen statistischen Landesamtes, Berlin 1908, Sied 3