Zum Inhalt springen

On Her Majesty’s Secret Service (Film)

Vun Wikipedia
Filmdaten
Plattdüütsch Titel: —
Originaltitel: On Her Majesty’s Secret Service
Düütsch Titel: Im Geheimdienst Ihrer Majestät
Produkschoonsland: Grootbritannien
Johr vun’t Rutkamen: 1969
Läng: 142 Minuten
Originalspraak: Engelsch
Öllersfreegaav in Düütschland: FSK 16
Filmkru
Speelbaas: Peter R. Hunt
Dreihbook: Richard Maibaum
Simon Raven
Produkschoon: Albert R. Broccoli
Harry Saltzman
Stanley Sopel
Musik: John Barry
Louis Armstrong (Titelleed)
Kamera: Michael Reed
Snitt: John Glen
Szenenbild: Syd Cain
Kledaasch: Marjory Cornelius
Dorstellers

On Her Majesty’s Secret Service (op plattdüütsch „In de Majestät ehrn Geheemdeenst“; dt. Titel: Im Geheimdienst Ihrer Majestät) is de Titel vun en Agentenfilm ut de James-Bond-Reeg ut dat Johr 1969. Dat is de sösste Film ut de Reeg vun Eon Productions un de eenzige, in den George Lazenby de Hööftrull speelt hett. Dat Dreihbook baseert op den gliek nöömten Roman vun den britischen Schriever Ian Fleming.

Inholt

[ännern | Bornkood ännern]

James Bond is mit sien Auto op den portugeeschen Landstraat ünnerwegens, as he gau överholt warrt. He föhrt achteran un finnt dat Auto leddig an en Strand vör, wiel de Fohrersche op’n Weg na’t Water is – as dat utsütt, üm sik sülvst in de See aftosupen. He kann er redden und warrt kort later in’t Hotel wies, dat de Fro de Contessa Teresa di Vincenzo is. Se is de Dochter vun den korischen Ünnernehmer un Mafia-Liddmaat Marc Ange Draco. In’t Hotel reddt he ehr en tweet mol, as se bi’t Kortenspeel ehr Schulden nich betahlen kann. Dorför verleevt de beiden de Nacht tosamen.

Tracy is den nächsten Morgen weg un Bond warrt vun mehrere Mannslüüd mitnahmen. Se bringt em na Draco, de sik för Bond sien Möhen mit sien Dochter bedanken deit. Wohrhaftig will he Bond vörsnacken, dat he sien Dochhter heiraden deit. He versprickt em sogor, een Million Pund in Gold to betahlen, wenn he dat maken deit. Bond lehnt af will aver vun Draco weten, woneem sik sien ollen Feend Blofeld ophollen deit. Draco vertellt em vun en Afkaat in Bern, de Lüüd na Blofeld afworven hett. Dor finnt Bond Henwiesen dorop, dat Blofeld sik bi’t königliche Heraldik-Institut sien Titel as Comte de Bleuchamp bestätigen laten will. Bond gifft sik also as de Heraldiker Sir Hillary Bray, üm an Blofeld rantokamen.

Op den (fiktiven) Tipp vun’n Piz Gloria hett Blofeld en ehmoligen Sportclub köfft un in en Forschungsanlaag ümboen laten, woneem he Sir Hillary drapen will. De verkleedte Bond finnt dor aver ok noch teihn junge Fornslüüd op, de sik bi Blofeld gegen jemehr Allergien behanneln to laat. Man, in Wohrheit sett Blofeld jem jeden Dag ünner Hypnoos, üm jem för sien Plaan to konditschoneren: Op en Funksignal hen will he jem dorto bringen, ahn dat to weten Krankmakers op de helen Welt to verbreden.

Sien Verkleden flüggt op, as he mit mehrere vun de Fronslüüd wat anfangen deit un warrt fangen nahmen. He kann aver utneihn un sik na en gresige Skiaffohrt in’n Bargdörp Mürren versteken. Dor is jüst en Volksfest, woneem Bond unvermodens Tracy wedderdrapen deit. Se hett neemlich intwüschen anfungen Bond to söken un vun ehrn Vadder rutfunnen, dat he sik in de Swiez is. Se büxt tohopen in ehr Auto ut. Later aver warrt Tracy vun Blofeld sien Mackers opgrepen un in de Forschungsstatschoon bröcht. Blofeld sien Deerns sünd intwüschen afreist un mit de Krankmakers in jemehr Heimatlänner torüchföhrt. Vun’n Piz Gloria ut schickt he sien Naricht an de hele Welt un draut en weltwiete Süük lostolaten, wenn sien Foddern nich nakamen warrt.

Bond holt sik Hülp vun Draco sien Organisatschoon, de mit Heevschruvers en spektaklulären Angreep op Blofeld sien Anlaag flegen doot. Se leegt Sprengsätz, üm de Statschoon mitsams den Senner op’n Tipp vun’n Piz Gloria tonichten to maken. Dormit schall de Welt för de Süük reddt warrn. Bond kann sien Tracy, in de he sik verkeken hett, redden un BLofeld sien Plaan dörkrüüzen. An’t Enn vun’n Film heriaat Bond un Tracy un fohrt glieks dorna in’n Honnigmaand. Op’n Weg hollt se an, üm de Blomen an’t Auto wegtomaken, as Blofeld an jem vörbiföhrt. Irma Bunt, sien Hülpersche, schütt mit en Maschiengewehr op jem. Bond kann sik op de Eer smieten, man Tracy blifft doot. Bond sien Glück is vörbi, noch vödem dat richtig anfungen hett.

Kritik

[ännern | Bornkood ännern]

De TV Spielfilm schreev över den Film, dat to’n eersten mol nich Sean Connery, man de Asutralier George Lazenby den James Bond spelen de. To’n eersten mol ok, harr Bond dat mit de Leev eernstnohmen – so eernst, dat he sogor heiraden de. Wieter weer seggt, dat eenige Fans dissen Bond-Film för den besten hollen doot. Ünner’n Streek weer dat Oordeel, dat Bond ok ahn Sean Connery grootordig weer.[1]

Utteken

[ännern | Bornkood ännern]

Filmpriesen hett disse Bond-Film nicht kregen, man he weer 1970 för den Golden Globe in de Kategorie Meistverspreken Needorsteller nomineert. In’t Johr 2004 weer de Film noch mol för den Golden Satellite Award in de Kategorie Best Klassiker-DVD vörslahn.

Produkschoonsachtergrund

[ännern | Bornkood ännern]

Plaan

[ännern | Bornkood ännern]

On Her Majesty’s Secret Service weer toeerst as veerte Film in de Reeg vörsehn. Man, Eon Productions Ltd. hett sik mit den Rechtebesitter vun Thunderball Kevin McClory op en Verfilmen eenigen künnt, so dat de denn toeerst ümsett weer. Dorna schüll den egentlich On Her Majesty’s Secret Service natogen warrn. [2] De Produzenten weern aver bang, dat de beiden Filmen to gliek weern un hebbt den Film nochmol torüchstellt. An sien Steed folg You Only Live Twice. Dorna weer den aver mit dat Planen anfungen.

Dorstellers

[ännern | Bornkood ännern]

Sean Connery harr 1961 en Verdrag afslaten, in den he de Plicht ingahn is, vun 1962 bit 1967 jeed Johr een Bond-Film to dreihn.[3] De Spood hett en jümmer grötter’t apentlich Intresse na sik togen, un so weer Connery blots noch as de Figur vun den britischen Geheemagenten wohrnahmen. Doröver hett Connery sik bi de Produzeten beklaagt, vunwegen dat de Dreiharbeiten to lang weern un he an’n weertschoplichen Spood an de Filmreeg nich noog Andeel harr.[4] De olle Verdrag weer dorüm 1966 oplöst un Connery kreeg en enkelten Verdrag för You Only Live Twice.[3] Twüschen de Filmen weer ok to’n eersten mol en längere Poos maakt, üm Connery de Arbeit an annere Filmprojekten mööglich to maken. Un togliek weer ok sien Gaasch anpasst. Liekers stell he al bi de Arbeiten vun You Only Live Twice kloorstellt, dat he för en wieteren Film nich mehr praat stünn.[3] Wohrhaftig hett sik Connerey ok mit noch mehr Geld nich dorvun afbringen laten.

Eon Productions hett verschedene Schauspelers vörspreken laten, dorünner ok de beiden lateren Dorstellers Roger Moore un Timothy Dalton, aver ok annere as Roy Thinnes un Adam West. Lazenby weer vun Albert Broccoli bi en Termin bi’n Putzbüdel dat eerste mol wohrnahmen un kreeg en Inladung to’n Vörspelen, as he sik offiziell bi Harry SAltzmann vörstellt harr.[5] In’n April 1968 weern noch fief Dorstellers in’t Rennen, de noch een poor Kameratest maken schülln. Blangen Lazenby weern dat John Richardson, Anthony Rogers, Robert Campbell un Hans de Vries.[6][7] Sünners sien physisch Dorstellen vun Kampszenen hett groten Indruck maakt,[5] so dat he an’t Enn de Rull vun James Bond tosproken kreeg.[7]

Bit dorhen harr Lazenby nich as Schauspeler arbeit, man blots as Fotomodell un in Warfspots. Man, wegen sien maskuline Utstrahlen weer dat nich as Nadeel ansehn. Vun Vördeel weer sorgegen ansehn, dat Lazenby ’n beten as Connery utseh, vunwegen dat de Tokiekers dat Utsehn wennt weern. In de düütschen Faten weer Lazenby ok wedder vun Gert Günther Hoffmann synchroniseert, de vörher ok Connery spraken harr. En Verdrag mit Eon Productions över mehrere Filmen (na Borns 5[8] oder 6[9]) hett Lazenby nich ünnerschreven, vunwegen dat he mit een poor vun de Klauseln in’n Verdrag nich torecht keem.[8]

De Rull vun Bond sien Gegenspeler Ernst Stavro Blofeld hett de US-Amerikaner Telly Savalas kregen. Sien Hülpersche Irma Bunt weer vun de düütschen Schauspelersche Ilse Steppat speelt, de dree Dag na de Premiere doodbleven is. Wiethen bekannt weer de britische Schauspelersche Diana Rigg dör de Feernsehreeg The Avengers. Se hett dat Bond-Girl Tracey speelt un weer dormit na Honor Blackman als de tweete Schauspelersche ut de Feernsehreeg, de in en Bond-Film speelt hett. Wohrhaftig hett hier ok noch en drüdde Schauspleersche ut de Feernsehreeg mitspeelt, neemlich Joanna Lumley, de in The New Avengers mitspeelt hett. De Figur Tracy weer in Fleing sien Roman as blond beschreven, so dat blangen Rigg ok de beiden franzööschen Schauspelersches Catherine Deneuve un Brigitte Bardot för de Rull in Ogenschien nahmen weern. Bardot harr aver jüst en Verdrag to den Film Shalako mit Connery afslaten un Deneuve harr keen Intresse an de Rull.[10]

Dreiharbeiden

[ännern | Bornkood ännern]

De Dreiharbeiten güngen an’n 21. Oktober 1968[11] in de Swiez los, woneem dat Tipprestaurant Piz Gloria op den Schilthorn as een vun de Hööftöörd utwählt weer. In’n Film is dat dat Hööftquarteer vun Blofeld. De Binnenopnahmen sünd in de Pinewood Studios bi London dreiht worrn. De Produkschoon hett ünner’n Streek söven Millionen US-Dollar köst.[12]

För de Skiszenen in de Swiez weer de Kru vun Willy Bogner tostännig. För de Dreiharbeiten sünd ne’e Kamerareedschoppen utklamüstert un unkonventschonell insett worrn. Deelwies is Bogner dorbi trüchoors den Barg rünnerdüüst as he de Verfolgunsszenen dreiht hett.[5] De Arbeiten legen aver swegen slecht Weder al 16 Daag torüch. In’n Februar 1969 keem de Plaan noch wieter in Vertog un de Speelbaas Hunt hett sien Filmeditor John Glen fraagt, dat he op dat Filmset kummt un dat tweete Filmteam övernehmen schüll. Glen hett dorophen in Mürren de Verfolgunsjagd in en stillleggte Bobbahn, wiel dat eerste Team de Szenen bi’t Stockcarrennen dreiht hett.

In’n Mai 1969 weer de Anfangsszeen an’n Strand vun Praia do Guincho in Portugal opnahmen, in de Bond Tracy för’t Afsupen redden deit. In Portugal weer ok de Geboortsdagsfier vun Draco dreiht.[11] De Speelbaas Peter Hunt harr den Infall, den Film mit de Affohrt vun de beiden frischen Ehlüüd to Enn gahn to laten. De Dood vun Tracy weer toeerst as Anfangsszeen vun den nächsten Bond-Film plaant, man de Produzenten hebbt opletzt beslaten, dat de Film so ennen schüll as in Fleming sien Roman.[5] De Dreiharbeiten güngen an’n 23. Juni 1969 to Enn – twee Maanden later, as dat vörsehn weer.[11]

Anners wat

[ännern | Bornkood ännern]
Dat Restaurant Piz Gloria op den Tipp vun’t Schilthorn
  • Üm to verkloren, dat James Bond op eenmol vun en ne’en Dorsteller speelt warrt, weer över een Szeen nadacht, de 007 in en Krankkenhuus na en plastische Operatschoon wiest. De Szeen is opletzt nich schreven worrn, man de Idee weer in den Film dorna wedder opgrepen, üm dat ännerte Utsehn vun Blofeld to verkloren.
  • George Lazenby dröff ut Grünnen vun de Versekerung nich sülvst Ski fohren. All Szenen, in de Bond skilopen deit weern vun den Skirennlöper Luggi Leitner doubelt. Leitner weer 1964 in Innsbruck Olympiawinner. Liekers wull Lazenby mööglichst veel Stunts sülvst maken un hett sik dorbi ok eenmol den Arm broken.
  • On Her Majesty’s Secret Service weer de eerste Bond-Film, de in Stereo opnahmen worrn is.
  • De Verfolgers vun Bond sünd histoorsch richtig mit de Swiezer Armeewapen Stormgewehr 57 utrüst. Disse Wapen is meist blots in de Swiez verbreedt un stellt dorüm en bannig rore Filmrequesite dor.
  • Ofschoonst de Film in de Swiez spelen deit, sleiht Tracy vör, na en Telefonzell in Feldkirch to fohren. Feldkrich liggt aver in Öösterriek.[13]
  • Dat Tipprestaurant Piz Gloria is vun den düütschen Produkschoonsbaas Hubert Fröhlich as Dreihoort opdeckt worrn.
Teresa Bond ehr Graffsteen
  • Dat sik Bond as Sir Hillary Bray verkleedt hett, harr Blofeld egentlich foorts marken müsst, vun wegen dat he Bray al in You Only Live Twice drapen hett. Dat is ok en Teken, dat de Reeg vun de beiden Filmen vertuuscht worrn is.

Literatur

[ännern | Bornkood ännern]
  • John Cork & Bruce Scivally: James Bond. Die Legende von 007. Bern 2002, ISBN 3-502-15340-X.
  • Erich Kocian: Die James Bond Filme. Heyne, München 1997, ISBN 3-453-86044-6.
  • Dirk Manthey (Hrsg.): James Bond 007. Kino-Verl., Hamburg 1995, ISBN 3-89324-124-8.
  • Michael Marti, Peter Wälty: James Bond und die Schweiz. Echtzeit-Verl., Basel 2008, ISBN 978-3-905800-20-3.
  • Alexander Smoltczyk: James Bond, Berlin, Hollywood. Die Welten des Ken Adam. Nicolai, Berlin: 2002, ISBN 3-87584-069-0.
  • Siegfried Tesche: Das große James Bond Buch. Henschel, Berlin 2002, ISBN 3-89487-440-6.

Borns

[ännern | Bornkood ännern]
  1. ↑ Filmkritik op TV Spielfilm
  2. ↑ Interview mit Sean Connery in’n Playboy, November 1965 op seanconneryonline.com (engelsch), afropen an’n 4. November 2012
  3. ↑ a b c Steve Rubin, Siegfried Tesche: Die Hintergrund-Story zu 25 Jahre Bond Kino Verlag, Hamburg 1987, ISBN 3-89324-026-8, S. 77.
  4. ↑ You Only Live Twice op tcm.com (engelsch), afropen an’n 4. November 2012
  5. ↑ a b c d Dokumentation Inside On Her Majesty's Secret Service op de Koop-DVD James Bond 007 - Im Geheimdienst Ihrer Majestät (Ultimate Edition), MGM, 2006
  6. ↑ Being 007: Behind the Scenes at James Bond Auditions op life.time.com (engelsch, afropen an’n 12. November 2012
  7. ↑ a b Steve Rubin & Siegfried Tesche: Die Hintergrund-Story zu 25 Jahre Bond Kino Verlag, Hamborg 1987, ISBN 3-89324-026-8, S. 86-87.
  8. ↑ a b Lazenby feiert 70. Geburtstag op n-tv.de, afropen an’n 23. Oktober 2012
  9. ↑ Biografie op mi6-hq.com (engelsch), afropen an’n 23. Oktober 2012
  10. ↑ Steve Rubin, Siegfried Tesche: Die Hintergrund-Story zu 25 Jahre Bond Kino Verlag, Hamborg 1987, ISBN 3-89324-026-8, S. 90.
  11. ↑ a b c Production Notes op mi6-hq.com (engelsch), afropen an’n 13. November 2012
  12. ↑ On Her Majesty's Secret Service op mi6-hq.com (engelsch), afropen an’n 13. November 2012
  13. ↑ “Der” große James Bond Atlas, S. 167.

Weblenken

[ännern | Bornkood ännern]
James-Bond-Filmreeg

Filmreeg vun Eon
1962: Dr. No | 1963: From Russia with Love | 1964: Goldfinger | 1965: Thunderball | 1967: You Only Live Twice | 1969: On Her Majesty’s Secret Service | 1971: Diamonds Are Forever | 1973: Live and Let Die | 1974: The Man with the Golden Gun | 1977: The Spy Who Loved Me | 1979: Moonraker | 1981: For Your Eyes Only | 1983: Octopussy | 1985: A View to a Kill | 1987: The Living Daylights | 1989: Licence to Kill | 1995: GoldenEye | 1997: Tomorrow Never Dies | 1999: The World Is Not Enough | 2002: Die Another Day | 2006: Casino Royale | 2008: Quantum of Solace | 2012: Skyfall | 2015: Spectre

Annere
1954: Casino Royale (Feernsehfilm) | 1967: Casino Royale | 1983: Never Say Never Again

 
Vun „https://nds.wikipedia.org/w/index.php?title=On_Her_Majesty’s_Secret_Service_(Film)&oldid=924939“