The Avengers (Feernsehreeg)

Vun Wikipedia

Dit Woort hett noch annere Bedüden: kiek dorför ünner The Avengers (Film).

Daten vun de Reeg
Plattdüütsche Titel:
Düütsche Titel: Mit Schirm, Charme und Melone
Originaltitel: The Avengers
Produkschoonsland: Grootbritannien
Produkschoonsjohr(en): 1961–1969
Produzent(en):

Leonard White (1961-1962)
John Bryce (1963-1964)
Julian Wintle (1965-1967)
Brian Clemens (1965-1969)
Albert Fennell (1967-1969)

Episodenläng: 50 Minuuten
Episodentall: 161 in 6 Staffeln
Originalspraak:

Engelsch

Musik:

Johnny Dankworth (1961–64)
Laurie Johnson (1965–69)

Genre:

Drama, Krimi, Actionreeg

Eerst Sennen: 7. Januar 1961
op ABC Television/ITV
Eerst Sennen (D): 18. Oktober 1966
op ZDF
Dorsteller

The Avengers (op Platt so veel as „De Afrekers“, dt. Titel: Mit Schirm, Charme un Melone) weer de Titel vun en britisch Feernsehreeg, in de dat üm en Geheemagenten geiht, de över de Johren mit verscheden Helpslüüd an de Siet Opdrääg to bestahn hett. Vun de Reeg sünd vun 1961 bit 1969 tosamen 161 Episoden dreiht worrn, an de in de 1970er Johren noch mol 26 Folgen anknütten deen, de ünner den Titel The New Avengers wiest worrn sünd. Vun de söss Staffeln, de dat vun de Reeg gifft, sünd de eersten dree in Düütschland nie wiest worrn. De Filmmusik vun de eersten dree Staffeln (1961-64) weer vun den Jazzmusiker Johnny Dankworth un vun 1965 an vun Laurie Johnson komponeert.

Grundkonzept[ännern | Bornkood ännern]

De Feernsehreeg weer in de eersten Staffel as’n reine Krimireeg anleggt. Dat hett sik mit de Tiet wannelt, vun wegen dat de Makers markt hebbt, dat de Tokiekers sünnere Elementen ut de Reeg an’n leefsten sehn deen. Se hett „The Avengers“ in’n wieteren Verloop Elementen ut verscheden Genres tosamenbröcht, de ünnerscheedlich Andeel an de enkelten Episoden hebbt. So kann een Andelen vun Science-Fiction, Action, Thriller un Filmdrama faststellen, de in de lateren Staffeln jümmer mehr ok vun Kummedie-Elementen dörtogen weern.

Vun’n Inholt her geiht dat in de Feernsehreeg üm de Arbeit vun den fiktiven britischen Geheemagenten John Steed, de as eenzige Figur in all Staffeln mitspeelt un ok noch in de Nafolgerreeg The New Avengers ut de 1970er Johren en bedüdene Rull speelt. De enkelten Episoden sünd dorbi so anleggt, dat se jümmer een Fall behannelt.

De Afloop folgt dorbi geern en wedderkamen Muster: To Anfang vun de Folg steiht en Begeevnis, wat en Ingriepen vun’n Geheemdeenst nödig maakt. Dat kann to’n Bispeel dat Verswinnen oder de Moord vun en wichtigen Wetenschoppler oder Politiker wesen, oder ok dat Verswinnen oder de Dood vun an annern Agenten, de op en wichtige Spoor ansett weer. In dissen Fall warrt faken dorop henwiest, dat dat een vun de besten Lüüd weer, wat den Ernst vun de Situatschoon un de Gefährlichkeit vun’n Gegner verkloren deit. Annere Ophangers künnt t. B. dat Opduken vun Spionen vun de Gegensiet, Inbreken in militäärsche Anlagen oder Forscheranstalten, mitünner aver ok schienbor harmlose Begeevnissen wesen.

Gemeensom mit en Partner an siene Siet, de över den Verloop vun de Reeg fakener wesselt, versöcht Steed denn de Saak op’n Grund to gahn. Faken deelt sik de beiden Partners dorto op un folgt verscheden Sporen, üm dor ünnerscheedliche Informatschonen to’n glieken Sluss tokamen un in’n Showdown an’n Enn denn tosamen den Gegner ünnertokriegen. Dorbi hannelt sik dat tomeist üm en Geheemorganisatschoon, de Grootbritannien oder de hele Welt ünner ehr Fuchtel bringen oder Schaden tofögen will, oder ok üm jichtenseen verrückt-kloken Kopp, de sik snaaksche gefährliche Saken utdacht hett.

Produkschoonshistorie[ännern | Bornkood ännern]

De Feernsehreeg „The Avengers“ füng an sik mit en annere Feernsehreeg an, de dorför al in britsche Feernsehn utstrahlt worrn is. Op ABC lööp 1960 de Reeg Police Surgeon, bi de dat üm den Polizei-Dokter Dr. Geoffrey Brent güng[1]. Een vun de Produzenten vun de Reeg weer Leonard White, de later ok „The Avengers“ produzeert hett. Wiel dat Management vun ABC jüst mit de Ansicht keem, dat dat Programm vun ABC en Thriller goot verdrägen künn, harr White mit Police Surgeon en lütt Problem: Liekers, dat de Hööftdorsteller Ian Hendry bannig goot bi de Tokiekers ankamen de, hett de Reeg sülvst nich den Smack vun de Lüüd drapen. Un so harrn White un de tostännige Bass för Drama den Infall, dat Format ümtostellen un den Polizei-Dokter en Geheemagenten an de Siet to stellen. Beid harrn se all mit Patrick Macnee to doon hatt, un laden em dorüm in, de Rull vun den Agenten to övernehmen. Toeerst weer Macnee dor gor nich recht vun andahn, vun wegen dat he lever wieter in de Produkschoon arbeiten wull, womit he jüst anfungen harr. Övertüügt hett em denn aver de Utsicht, en regelmatigen Verdeenst to hebben, un so füng dat mit „The Avengers“ an[2].

1. Staffel (1961)[ännern | Bornkood ännern]

De eerste Staffel kann noch nich recht mit de nafolgen Staffeln vergleken warrn, as dat dor noch en anner’t Konzept achter weer. Vun wegen dat de ne’e Reeg an Police Surgeon ansluten schüll, bleev de Polizeidokter – nu mit den Naam Dr. Keel – de Hööftfigur. De Feernsehreeg weer op dat Format vun’t britsche Feensehn tosneden un weer al bi de Produkschoon op dree Delen mit twee Posen anleegt, wobi de beiden Posen mit Afspann un Titelmelodie inleidt weern. In’t Feernseh weer twüschen de Delen denn de Warf sennt.

De eerste Folg Hot Snow vun de ne’en Feernsehreeg is an’n 7. Januar 1961 in Grootbritannien utstrahlt worrn. To’n Optakt vun de Episood stellt en Drogenhännler fast, dat sien Heroin ut Versehen an’n verkehrten Dokter levert worrn is. Afgeven worrn is dat bi de Leevsten vun Dr. Keel, de dorophen an de Siet maakt warrt, üm dat nümms vun dat Drogengewarf wies warrt. De Polizei kann den Moord nich opkloren un so maakt sik Keel op egen Reken op de Söök na den Möörder un kummt em op de Spoor. Dorbi löpt he den geheemnisvullen Spion John Steed över’n Weg un stellt den Drogenbaas tosamen mit em en Fall.

Ut de Geschicht vun de eersten Episood verklort sik de Titel „The Avengers“, wat so vell heet as „De Afrekers“ – vun wegen dat Dr. Keel mit den Verbreker afreken deit. In’n Verloop vun de eersten Staffel krüüzt sik de Weeg vun de Polizeidokter un den snaakschen Agenten jümmer wedder. In’n Vördergund vun de Reeg bleev aver Ian Henrys Rull Dr. Keel, so dat Steed in eenige vun de Folgen vun de eersten Staffel gor nicht vörkamen de. De Tokiekers müchen mit de Tiet de Figur John Steed aver man jümmer lever sehn, so dat he an’n Enn höger in de Gunst stünn as de egentliche Hööftfigur. Ünner’n Streek keem de Feernsehreeg aver goot an bi de Lüüd.

As 1961 denn aver Geller för de Produkschoon streken worrn sünd, güng dat mit de eersten Staffel gauer to Enn as dat plaant weer. 39 Folgen schülln egentlich dreiht warrn, man blots 26 sünd opletzt produzeert worrn, as de Reeg den instellt warrn müss[3]. De hele eerste Staffel ümfaat de nafolgen Episoden:

As dat schient, is meist de hele eerste Staffel verloren gahn. Blots de beiden Folgen The Frighteners un Girl on the Trapeze hebbt noch vullstännig överduert, as ok de eersten 20-25 Minuuten vun de eersten Episood Hot Snow.

2. Staffel (1962-63)[ännern | Bornkood ännern]

Dat harr ruchweg een Johr duert, bit de Produkschoon vun de Feernsehreeg wedder anlopen de. In de Twüschentiet weer Ian Hendry aver vun’t Feernsehn weggahn un wull sik mehr op sien Filmkarriere kunzentreeren. He stünn dorüm nich wieter as Dr. Keel praat. Nu weer dat aver al so plaant, dat in de eersten Staffel in Episood 27 en ne’e Figur inföhrt warrn schüll, de sik mit Dr. Keel as Partner vun Steed afwesseln schüll, vun wegen, dat Steed jo vun de Lüüd lever sehn weer. De ne’e Rull schüll de Jazz-Singersche Venus Smith wesen, en Fro, de an sik vun de Spionaasch nix afweet, aver dör Tofall in de Ünnersöken rintogen warrt un Steed in Delen vun sien Arbeit ünnerstütten schüll. Dordör schüll Steed de Hööftfigur vun de Reeg warrn[3].

To Anfang vun de tweeten Staffel sünd eerstmol dree Folgen dreiht worrn, de noch ut de eersten Staffel överbleven weern. De Böker weern för de Rull vun Dr. Keel schreven, un so weer för disse disse dree Episoden Jon Rollason ünner Verdrag nahmen, de as Dr. Martin King an Ian Hendrys Steed spelen de. Dat Format mit de beiden Posen is in de tweeten Staffel bibehollen worrn. De Infall mit de Jazz-Singersche müss ok noch en Wiel töven, as de Schauspelersche, de för de Rull vörsehn weer, nich praat stünn un en ne’e Besetten funnen warrn müss. De Rull is opletzt vun Julie Stevens speelt worrn. In de tweeten Staffel drööp Steed denn fakener ok mol een vun sien Basen, de em en ne’en Opdrag oder Informatschonen geven deen. Se weern tomeist mit Nummers betekent as One-Ten oder One-Six.

In de Twüschentiet güng dat aver dorüm, en vullstännig ne’en Tyyp vun Fro as egentlichen Partner vun Steed in de Feernsehreeg intobinnen, neemlich een, de sülvstbewusst is un sik ok jede Tiet sülvst to helpen weet. De Infall to disse Figur weer utlöst dör’n Bericht över’n Fro in Kenia, de ehr Familie dör Terroristen verloren harr. De Rull Cathy Gale, weer de allereerste Fro in en Feernsehprodukschoon, de sogor kämpen un sik sülvst verdeffendeeren künn. Se weer dormit ehr Tiet noch wiet vörut[3]. Besett weer de Rull mit Honor Blackman. „The Avengers“ weer jümmer noch as’n reine Krimireeg anleggt, liekers dat nu ok Geschichten mit opnahmen weern, wo dat üm Spökenkram un unnatürliche Saken as t. B. Voodoo güng.

De Verwantwoortliche för de Reeg weer mit de Besetten nich recht tofreden, as he meen, dat Blackman de Rull nich so spelen künn, as he sik dat vörstellen de. In ehr eerste Episood Death dispatch speelt se wohrhaftig noch anners as in de nafolgen Episoden: Se is dor noch fründlich un smüüster veel, wat ehr denn aver utdreven worrn is. In de tweete Folg, de mit ehr dreiht weer (Warlock – de Episood is aver bi’t Utstrahlen eerst veel later wiest worrn. Dat is ok doran to marken, dat Steed un Cathy sik dor noch nich so goot to kennen schient, wat so laat in de Staffel an sik keen Sinn maakt) wirkt se dorüm veel harder un sülvststänniger. För ehr Rull hett Blackman Ünnerricht in Judo kregen, vun wegen dat Cathy Gale nich to veel mit Scheetwapen hanteeren, man ok in’n Nahkamp goot wesen schüll. Kleder un annere wiete Kledaasch weern dorför natürlich nich to bruken, so dat sik an’n Enn de Ledder-Antog as de beste Kledaasch för Cathy rutstellt hett. Dat dor ok’n beten wat verruucht binnen leeg, weer woll ok wullt[3].

To de tweeten Staffel höört de nafolgen Episoden. In de Folgen, de mit ¹ markeert sünd, is Dr. King de Partner vun Steed, mit ² sünd de Episoden mit Venus Smith markeert. All annern sünd mit Cathy Gale.

3. Staffel (1963-64)[ännern | Bornkood ännern]

As de tweet Staffel to Enn weer, geev dat blots en lütte Ünnerbreken, vördem de Produkschoon vun de drüdden Staffel anlopen de. Ofschoonst de Feernsehreeg mit teemlich eenfache Middel un meist ahn Tricktechnik bleven de Episoden roor ünner jemehr vörsehn Budget. Man de Geldmiddel sünd denn licht opstockt worrn, vun wegen dat de Reeg bi de Tokiekers so goot ankamen de. De Form vun de Episoden is wieter gliek bleven, dat heet, dat geev ok wieter twee Posen in jede Episood[4].

Bi de Dorstellers harr sik nu ok klor Honor Blackman as Cathy Gale dörsett, de as de starke Fro in eher Ledder-Kledaasch en ganz ne’en egenen Stil prägen de. Annere Partners vun Steed geev dat nu nich mehr. Dr. King weer al so blots as Övergang vun de eersten Staffel dacht wesen, un de Singersche Venus Smith, de an de Siet vun Steed al so jümmer wat verloren utseh, keem bi de Tokiekers lang nich so goot an as Cathy. Dorto keem, dat de Schauspelersche Julie Stevens ’n Kind kriegen de, un de Rull al so nich wieter spelen künnt harr. In de drüdden Staffel geev dat nu ok nich mehr de geheemnisvullen Basen One-Ten usw. An jemehr Steed pedden de beiden Basen Charles un Quilpie.

De Dreihböker sünd in de drüdden Staffel ok dichter worrn vun’t Vertellen her. Nu kregen de beiden Hööftfiguren ok faste Wahnungen, in de ok Delen vun de Geschichten speelen, so dat de Geschicht mehr Leven kreeg un mehr Realismus. De Makers harrn doröver nadacht, Steed ok wedder ’n beten harder to maken, as se Bedenken harrn, dat he för de Tokiekers anners woll unintressant warrn künn. Liekers güng dat langsom los, dat he mehr in de Richt vun den Gentleman-Spion kamen de, as den he laterhen groten Spood harr[4]. Ok sien Schirm un sien Meloon, de later Ingang in den düütschen Titel funnen hebbt, hören nu allmählich to faste Bestanddelen vun sien Kledaasch.

Dree Maanden vördem de drüdde Staffel fardig produzeert weer kreeg de britsche ABC en Anbott vun en US-amerikaanschen Filmproduzent, ut de Feernsehreeg en Film to maken. Ruchweg to de glieken Tiet wull ’n annern Produzent den Achtergrund för en Musical an’n Broadway bruken[5]. Noch bevör sik de Makers vun „The Avengers“ klor warrn künnen, wat se mit de Anbotten ut de USA maken wulln, geev dat för jem en anner’t Problem, wat to lösen weer, vun wegen dat Honor Blackman to’n Enn vun de Staffel ophören wull. As ehr Plaan al bi Tieten klor weer, is ehr Weggahn vun de Geheemdeenstarbeit an’n Enn vun de letzten Episood kort opgrepen worrn.

Eenige vun de Folgen ut de drüdden Staffel, as The Charmers oder Don’t Look Behind You sünd later in de föfften Staffel noch mol wedder opgrepen un in de Folgen (t. B. The Correct Way to Kill un The Joker) mit licht ännerte Böker nee ümsett worrn. De drüdde Staffel ümfaat de nafolgen Episoden:

4. Staffel (1965-66)[ännern | Bornkood ännern]

Na de drüdden Staffel is Honor Blackman ut de Reeg utscheedt. Se wull lever in’t Filmgewarf, un hett en Anbott annahmen för den James-Bond-Film Goldfinger, in den se Pussy Galore spelen de. ABC hett dorophen de Produkschoon eerstmol anhollen un geev de Rechten na’n Tiet vun’t Överleggen an Telemen Ltd. af, woneem Julian Wintle dat Regeer harr. Wintle hett sik Brian Clemens un Albert Fennell dorto hollt, um de Feernsehreeg wieter to maken[5].

De Produkschoon vun „The Avengers“ hett eerstmol söven Maanden op Ies legen, vun wegen dat nu de Fro an Steeds Siet fehlen de. Dat güng nich blots dorüm, de Rull nee to besetten, man överhaupt en ne’e Figur to entwickeln, de an Cathy ehr Steed de ne’e Partner vun Steed warrn schüll. Un so is dorbi de Figur Emma Peel tostannen kamen. Se schüll Cathy dorin glieken, dat se ok vullstännig emanzipeert un sülvststännig wesen schüll. To’n annern schüll se aver ok Charme hebben un de Mannslüüd antrecken, wat opletzt ehrn Naam begrünnt hett. De leidt sik neemlich af vun dat engelsche „man-appeal“ oder kort: „m-appeal“[5].

Dat duer en poor Maanden bit mit Elizabeth Shepherd en Schauspelersche funnen weer. Man, as se al twee Folgen mit ehr dreiht harrn, hebbt de Produzenten meent, dat se nich de richtige för de Rull weer un füngen noch mol dat Söken an. Opletzt weern se vun de dormols 26-johrige Diana Rigg övertüügt, dat se nipp un nau de Fro is, de se söcht harrn. In Dezember 1964 is mit ehr denn de eerste Folg The Murder Market noch mol nee dreiht worrn[6]. Mit Emma Peel un ehr sünnere egene Oort keem de Feernsehreeg op ehrn Hööchpunkt an, un dat Agenten-Poor Steed & Emma hett en lütt Kapitel Filmhistorie schreven.

Mit de ne’en Produzenten hett sik veel ännert in de Reeg. Vun nu an weern de Episoden op Film opnahmen un nich mehr op Video-Band, as in de eersten dree Staffeln, un de Opnahmen weern nu ok na buten verleggt un weern nich mehr to’n gröttsten Deel op’t Studion begrenzt. Dat Anliggen, de Feernsehreeg ok för’t utlännsche Publikum intressant to maken, wies sik dorin, dat as Achtergrund nu de schönen Ecken vun Grootbritannien bruukt weern, wat denn gliektietig ok as Touristenwarf deenen künn[5]. Ok de Indelen in dree Akten geev dat nu nich mehr, wodör de Reeg ehr theaterordige Ümsetten afleggt hett. Un nich toletzt sünd ok de Figuren nauer utarbeit worrn un kregen mehr Achtergrund un so ok mehr Persönlichkeit.

Ok bi de Inholten hett sik veel ännert. Mit de veerten Staffel beweeg sik de Reeg weg vun de reine Spionaasch-Krimi-Geschicht. Dör dat Tosamenspeel vun Steed un Emma, de vermoden laten dee, dat dor mehr Verbinnen weer as blots de Arbeit, kreeg de Hanneln mehr Geföhl. To gliek sünd nu mehr ok Themen mit mehr Fanatsie verarbeit worrn, wat weg vun’n Realismus föhrt hett, hen to Science Fiction un Fantasy-Elementen. So geev dat nu jümmer fakener verrückt-geniale Wetenschopplers (t. B. The Gravediggers, The Cybernauts), gefährliche Technik, de deelwies över’n dormoligen Standard rut utklamüstert weer (The Cybernauts, The House That Jack Built, Dial a Deadly Number) oder ok mol ’n fleeschfreten Resenplant (Man-Eater of Surrey Green).

Schandaal geev dat üm de Episood A Touch of Brimstone, de vun en Geheembund hannel na dat histoorsche Vörbild vun’n „Hellfire Club“. De Liddmaten harrn to’n Teel sik dat in all Belangen goot gahn to laten un sik an Maatlosigkeit un Sündhaftigkeit to freihn. To’n Enn vun de Folg keem dat to en utschweifen Orgie, in de Emma Peel in en knapp un drang Domina-Kledaasch as „Sünnenkönigin“ to sehn is. De Kledaasch harr Diana Rigg sülvst utklamüstert. Wat ut hüütige Sicht ehr harmlos antosehn is, weer to de Tiet Schandaal nooch, üm dat de Episood in de USA nich wiest warrn dröff. In Grootbritannien weer se blots zenseert to sehn – ahn de Szeen mit de Ledderpietsch an’n Enn[7]. In’t düütsche Feernsehn is de Folg dormols ok gor nich wiest worrn, eerst in de 1990er Johren weer se vun Sat.1 utstrahlt.

De veerte Staffel bestünn ut de nafolgen Episoden:

5. Staffel (1966-67)[ännern | Bornkood ännern]

In de Twüschentiet hett de Feernsehreeg internatschonal Spood hatt un weer geern sehn ok buten vun Grootbritannien. Na’t Enn vun de veerten Staffel versöchen de Makers vun „The Avengers“ jemehr Reeg ok an’t US-amerikaansche Feernseh to verköpen, woneem de American Broadcasting Company (ABC) sik woll intresseert wiesen de, vun wegen dat keen egen Spionaasch-Reeg in’t Programm harrn. Mit dat Farvfeernsehn weern se in de USA aver al ’n beten wieter, un dorüm weer ABC nich so dorvun övertüügt, en Feernsehreeg in swart-witt intoköpen. Se möken dorüm en Anboot: Se seggen to, de veerte Staffel ok to köpen, wenn de föffte denn in Farv dreiht warrt[8]. Diana Rigg un Patrick Macnee sünd 1966 in de USA flagen, üm mit jemehr Warf den Anfang vun de Feernsehreeg to ünnerstütten[6].

De Produkschoon weer nu’n beten anpasst an den Smack vun de amerikaanschen Tokiekers, de to’n Bispeel nich so goot op de harde Oort bi Fronslüüd ansnacken deen. De Karate-Stil op hogen Standard, denn Emma in de veerten Staffel wiesen de, weer torüchdreiht op en Stil, de mehr för’t Oog weer. Ok vun de drange Ledderkledaasch keem man nu af, wat Diana Rigg goot to pass keem, de dat nich so geern müch. An de Steed weern nu vele modische klöörte Saken för ehr maakt, ünner annern de so nöömten „Emmapeelers“.

Liekers weer dat meist nich mehr to en fööfte Staffel kamen, vunwegen dat Diana Rigg gor nich tofreden weer mit dat wenige Geld (£ 150 för een Episood) wat se kriegen de, ofschoonst se söss bit söven Daag in de Week bit to twölf Stünnen an’n Dag an’n Set arbeiten müss. De Produzenten weern inverstahn, ehr dat dreefache to betahlen. Rigg is eerst mol dorbi bleven, vör allen woll ut Loyalität to Patrick Macnee, möök aver liekers kloor, dat dat för ehr de letzte Staffel is[8]. Un dat weer nich dat eenzige Problem, dat de Produkschoon harr. De Kosten för de Feernsehreeg weern teemlich hooch, so dat se dorop anwiest weern, dat de Amerikaners de Reeg köpen deen, man de heebt sik bi disse Saak bannig torüch hollen, so dat vörtietig dat Geld för de Produkschoon to Enn güng un de Arbeit ünnerbroken warrn müss.

Plaant wesen is en wietere Staffel mit 26 Episoden, man de is denn splitt worrn in en Produkschoonsblock 5a un 5b. In Grootbritannien weern de Delen as enkelte Staffeln ustrahlt, in de USA weer 5a as een Staffel un 5b tosamen mit en Deel vun de sössten Staffel sennt. Annere Länner as ok Düütschland hebbt beide Delen as een Staffel utstrahlt.

Ünnern Streek hett sik „The Avengers“ to en global Phänomen entwickelt: 120 Länner hebbt de Feernsehreeg sennt un möken Macnee un Rigg op de helen Welt bekannt un beropen. De Spood wies sik nich toletzt ok in Nomineeren för den Emmy eenmol för de Reeg sülvst to’n annern för Diana Rigg as Schauspelersche. De vullstännige föffte Staffel harr de nafolgen Episoden:

6. Staffel (1968-69)[ännern | Bornkood ännern]

As Diana Rigg dat ankünnigt harr, is se na de föfften Staffel utstegen. Man se keem noch mol för een Episood (The Forget-Me-Knot) torüch, üm den Övergang in de nächste Staffel un den Wessel to’n ne’en Partner vun Steed hentokriegen. De Makers wulln nich den Weg gahn, dat Emma eenfach nich mehr vörkummt, man dat schüll in’n Film klor warrn, worüm se nich mehr mit Steed arbeit. So hett man de Lösen funnen, dat ehr Ehmann, de för Johren as Testpilot verschollen bleev, bats wedder opduken dee un se dorüm nich länger in’n Geheemdeenst arbeiten wull.

In’n Rahmen vun den Wessel wull man aver gliek ok annere Saken ännern. Toeerst mol weern de beiden Produzenten Clemens un Fennell vör de Döör sett un de vörige Produzent John Bryce wedder in de Produkschoon insett. De Söök na en ne’e Dorstellersche an de Siet vun Macnee güng bi Tieten los. Worrn is dat de 20-johrige Linda Thorson, de noch nienich vör en Kamera stahn harr[9]. Intressanterwies weer se jüst to de Tiet mit den ollen ne’en Produzent Bryce tosamen.

Bryce harr dree Folgen (Invitation for a Killing, The Great Great Britain Crime un Invasion of the Earthmen) för de sössten Staffel produzeert, as he togeven müss, wiet achter’n Tietplaan to liggen. De Wessel is dorüm torüchrullt worrn, un Clemens un Fennell hebbt wedder dat Regeer bi „The Avengers“ övernahmen. Von de eersten dree folgen is blots Invasion of the Earthman övernahmen worrn. Vun The Great Great Britain Crime menen Clemens un Fennel, dat se nich to bruken weer un hebbt ehr ut’t Programm nahmen. Delen dorvun sünd later mit annere Saken tosamensneden un as Homicide and Old Lace sennt worrn[10]. De eerste Episood weer as’n längeren Pilofilm dacht, üm de ne’e Figur Tara King in de Reeg intoföhren, wat aver denn mit The Forget-Me-Knot veel beter ümsett worrn is. De plaante Pilotfolg is later op de normale Tiet vun en Episood torechtkört worrn un keem denn as de Folg Have Guns – Will Haggle in de Staffel[11].

Ünner Tietdruck weern nu gau de eersten Folgen afdreiht (Produkschoonsblock 6a), un tosammen mit den Rest vun de föfften Staffel jüst noch rechttietig na de ABC in Amerika schickt. De Senner hett denn aver besloten, noch en vullstännige Staffel mit 26 Folgen in jemehr Programm to nehmen, so dat de Druck för de Produkschoon wietergüng. Mit de Indelen vun de Staffeln güng dat nu dörenanner. In de USA weern de Staffeln 5b un 6a as een Staffel tosamenfaat, wiel Grootbritannien aftöven de, bit all 33 Episoden mit Tara King fradigstellt weern[6].

De Figur Tara King künn as gröönsnaveligen Neeling natürlich nich gegen Emma an un keem bi de Tokiekers man half so goot an. Liekers maakt se in de Staffel en Wannel dör un entwickelt sik mit de Tiet to en richtige Agentin. Man, as de Reeg vun de Folgen noch ännert worrn is, geev dat bi’t Sennen mitünner Sprüng in’n Charakter vun Tara, de nich so eenfach to verkloren weern. Nee in de Reeg kamen is ok’n ne’en Geheemdeenstbaas ünner de Beteken Mudder, speelt vun Patrick Newell. He weer in sien Rullstohl tomeist an en wunnerlichere Oort antodrapen, de as Hööftquarteer inricht weer, ümgeven vun tallriek Telefonen un een Plegersche, de nie snacken deit. Dat Hööftquarteer wessel in jede Episood op deelwies teemlich alverne Oort, wat sik as Running Gag dör de hele Staffel tütt. In de Episood Killer hett John Steed noch mol en annere Partnersche an de Siet kregen, as Tara King to Anfang Urlaub nehmen deit. An ehr Steed keem Lady Diana Forbes-Blakeney as Uthülp, speelt vun Jennifer Croxton, de vun ehr Oort her mehr na Emma Peel slahn de. Liekers bleev dat bi blots een Gastoptritt.

To de sössten Staffel höört disse Folgen:

Vun wegen dat in de USA keen Nafraag mehr weer na en ne’e Staffel, güng dat mit de Feernsehreeg in’n Februar 1969 bats un gau to Enn. Ut dat Vereenigte Königriek geev dat ok keen Bestreven na mehr un so is de Reeg na acht spoodrieke Johren instellt worrn. Dat geev eenige Versöken, „The Avengers“ weddertobeleven, as Theater-Stück to’n Bispeel, oder in Süüdafrika as Höörspeelreeg, de för de South African Broadcasting Company produzeert worrn is. In’t Feernsehn geev dat eerst 1976 noch mol en Anloop mit The New Avengers, woneem ok wedder Patrick Macnee as John Steed mitspeelt hett. In’t Johr 1998 keem opletzt ok noch de Kinofilm The Avengers rut, de na de Vörlaag vun de Feernsehreeg dreiht worrn is.

Personen in de Reeg[ännern | Bornkood ännern]

John Steed[ännern | Bornkood ännern]

John Steed is de eenzige Figur, de in all Staffeln mitspeelt, speelt warrt he vun Patrick Macnee. Na dat Bühnenstück to „The Avengers“ is he dat jüngste vun acht Kinner mit den vullstännigen Naam John Wickham Gascoyne Berresford Steed. Vör sien Loopbahn bi’n Geheemdeenst weer Steed bit Militär. In’n Tweeten Weltkrieg hett he bi’n Geheemdeenst vun de Army un bi de Royal Navy deent.

De Charakter vun de Figur Steed ännert sik in’n Verloop vun de Feernsehreeg. In de eersten Staffeln warrt he as de Spionaasch-Agent dorstellt, de in’n Geheemen Sporen nageiht un dorbi Gefohren direkt un mit physischen Insatz angeiht. De Insatz vun Pistolen un körperliche Gewalt is dorbi noch fakener to sehn. Af Staffel dree warrt Steed wat sütjer dorstellt un laatestens mit Emma Peel an sien Siet wannelt he sik to den Gentleman-Tyyp, de apen an sien Ermiddeln rangeiht. Dorbi slippt he in verscheden Rullen, ahn dorbi sien Naam oder sien Utsehn to ännern. Sien Verhollen blifft dorbi ok Gegeners gegenöver jümmer fründlich un vörnehm, aver liekers ok bestimmt.

Vun de veerten Staffel an bruukt Steed Füerwapen blots noch in Utnahmen. Macnee segg sülvst mol över de Figur Steed: „Wat schall ik en Pistool rümslepen? Ik drääg mien Bregen mit mi rüm“[5]. För den Fall hett Steed aver jümme sien smucke Meloon op’n Kopp, de binnen mit Stahl utkleed is un dorüm ok al mol as Wapen döögt. Sien tweet Markenteken is de vörnehme Schirm, de sik mol as Stockdegen rutstellt, mol en Fotoapparat, en Toonband oder en Funkapparat inboet hett.

As Schauspeler harr Macnee düchtig Problemen, na’t Afsetten vun de Feernsehreeg 1969 ne’en Rullen anboden to kriegen, vun wegen, dat he so drang mit de Produkschoon verbunnen weer, dat in em all blots noch John Steed sehn deen.

Dr. David Keel[ännern | Bornkood ännern]

Ian Hendry harr in de Reeg Police Surgeon en Polizeidokter speelt, de, anners as de Reeg sülvst, goot bi de Tokiekers ankamen de. En glieke Figur schüll he nu bi „The Avengers“ ünner den Naam Dr. David Keel spelen, de in de eersten Folg persönliche vun en swor Verbreken bedrapen warrt un foortan as resolute Person Verbrekers överföhrt. Tomeist hett he dorbi Help vun den geheemnisvullen Agenten John Steed, aver nich in jede Episood.

Dr. Martin King[ännern | Bornkood ännern]

Dr. Martin King weer speelt vun Jon Rollason. De Figur kummt blots in dree Folgen vör, as he in de tweeten Staffen in’n Övergang an de Steed vun Dr. Keel inspringen müss bit för de ne’e Figur Cathy Gale en Schauspelersche funnen weer. De Dreihböker för de dree Episoden weern noch ut de eersten Staffel nableven un harrn dorüm de Figur vun en Dokter vörsehn. Vergleken mit sien Vörgänger blifft Dr. King teemlich in’n Achtergrund. Dat resolute Vörgahn vun Dr. Keel hett he gor nicht, man bi em is de medizinische Siet dat wichtige. John Steed is dormit all düütlich kennbor as Hööftperson anleggt.

Cathy Gale[ännern | Bornkood ännern]

Anners as de annern fröhen Partners vun Steed, hett de Person Dr. Catherine Gale mehr Achtergrund-Geschichte mit op’n Weg kregen. Dorstellt warrt se vun Honor Blackman. Cathy is en emanzipeerte, unafhangige Fro, de in London ehrn lateren Ehmann kennenlehrt hett, en süüdafrikaanschen Buern. In Afrika is se wies worrn, woans een Fohrtüüch heel maakt oder mit Wapen ümgeiht. Na’n Dood vun ehrn Mann güng se torüch na London, woneem se ehrn Dokter in Anthropologie maken de.

De eerste Kuntakt to Steed is mehr en Tofall, man dorna helpt se em fakener bi’t Lösen vun sien Fäll. Anfangs wesselt se sik noch af un to mit Venus Smith af, warrt in de drüdden Staffel denn aver faste Partner vun Steed. Dat Vergahn twüschen de beiden is jümmer en beden vun Spannung präägt, vun wegen dat sik Cathy as starke Fro nix vun Steed vertellen laten will, he ehr aver geern ok mol op’n Arm nimmt. Dorut entwickelt sik so en Oort vun Wootleef.

Mit Cathy Gale keem ok de swarte Ledderantog in de Feernsehreeg, de ’n Tiet lang en Markenteken weer. Bito stünn to’n eersten mol ’n Fro in’n Vördergrund, de mit Wapen ümgahn künn un sik mit Judo ok gegen Mannslüüd to wehren wüss.

Venus Smith[ännern | Bornkood ännern]

De Figur Venus Smith warrt vun Julie Stevens dorstellt. Se is en Jazz-Singersche, de in de tweeten Staffel in söss Folgen Steed helpt Verbrekers to jagen. As Künstlerin hett se mit den Kamp gegen dat Verbreken an sik nix an’n Hoot un slippt in de Episoden mehr oder minner tofallig in de Fäll mit rin. Dat eerste mol is dat in de Folg The Decapod, in de se vun Steed ansnackt warrt. As se tomeist vun de Vörgäng keen Ahnung hett un ok mit teemlich wenig Versahn vun de Tosamenhäng dorstellt warrt steiht se in en düütlichen Gegensatz to Cathy un wirkt tomeist teemlich verloren blangen Steed.

Emma Peel[ännern | Bornkood ännern]

Emma Peel is de Partner vun John Steed in de veerten un föfften Staffel, speelt warrt se vun Diana Rigg, de dör disse Rull weltbekannt worrn is un gliektietig ok för den Hööchpunkt vun de Reeg sorgt hett. Emma Peel is keen richtige Agentin, man se arbeit as Amateur mit Steed tosamen. Se is boren as Emma Knight un weer de Dochter vun en Industriellen un hett later ’n Tiet lang de Firma leidt, as dat in de Episood The House That Jack Built vertellt warrt. Se is verheiraadt mit den Testpilot Peter Peel, de verschollen is, an’n Enn vun de Folg The Forget-Me-Knot aver wedder opducken deit, wat för Emma de Grund is, den Geheemdeenst to verlaten.

As Cathy Gale is ok Emma en kloke, sülvststännige un emanzipeerte Fro, de Kampsport beherrscht un sik in ehr Freetiet ok al mol mit högere Physik uteneensetten deit. In de düütschen Medien weer se faken ok as „Karate-Emma“ betekent vun wegen ehrn Kampstil. De Ünnerscheed to Cathy liggt vör allen dorin, dat se en veel innigeren Kuntakt to Steed hett – mööglicherwies sogor intim, wat aver in de Reeg nie apen wiest oder seggt warrt. As Minsch hett se veel mehr Charme as Cathy un is allgemeen ok fründlicher un ageert mit mehr Hart. En Markenteken vun Emma weer ehr utfallen Mood, de in de swart-witt Staffel vun John Bates un dorna vun Alan Hughes utklamüstert worrn is. Vele Fronslüüd, de de Feernsehreeg geern sehn hebbt, hebbt jede Week wedder dorop tööft, wat Emma woll ditmol an harr.

Tara King[ännern | Bornkood ännern]

In de Episood The Forget-Me-Knot övernimmt Tara King för Emma Peel as ne’e Partnersche vun Steed. Inföhrt warrt se as junge „Agentin 69“, de jüst noch in de Utbilln is un in’n Verloop mit ehr Idol John Steed to doon kriggt. Speelt warrt „Dschingbumm“ Tara – so ehr Ökelnaam, as se angifft – vun Linda Thorson. Later in de Episood kann se Steed helpen, as he sien Gedächtnis verloren hett, un överföhrt mit em tosamen en Verrater binnen den Geheemdeenst. Dordör warrt se an’n Enn vun de Staffel as sien ne’en Partner indeelt.

Steed heet dormit to’n eersten mol ’n Partner an de Siet, de sülvst ok bi’n Geheemndeenst arbeit, un to’n eersten mol ok een, de düütlich jünger is as he. De Ümgang is dorüm en anner’n as mit Cathy oder mit Emma, as sik hier nu ehr en Vadder-Dochter-Situatschoon entwickelt. Tara is anfangs mehr dat junge Küken, dat sik mitünner dumm anstellt un vun Steed schult warrn mutt, entwickelt sik in’n Verloop vun de sössten Staffel aver to en vullweertige Agentin, ofschoonst se jümmer in’n Schadden vun Steed torüch blifft.

Mudder[ännern | Bornkood ännern]

De Figur „Mudder“ warrt in de sössten Staffel as de Baas vun’n Geheemdeenst inföhrt. Mudder, dorstellt vun Patrick Newell, sitt in’n Rullstohl – as dat Vörbild vun de US-amerikaanschen Feernsehhelden Ironside – un lenkt vun dat geheeme Hööftquarteer ut de Akschonen vun de Agenten. Sien wohren Naam un sien verleden Tiet blievt dorbi in’n Düstern.

In de wieteren Folgen warrt Mudder faken as vörtüüscht klook, dorstellt, de tomeist en brillanten Sluss ut en Situatschoon tehn deit mit jüst de glieken Wöör as Steed dat jüst vör em verklort hett. De Humor, de dör disse Rull in de Reeg bröcht warrt, blifft wiet achtern den fienen Witz vun Emma Peel torüch. Un dör den Running Gag vun’t jümmer wesselnde Hööftquarteer ümgeven vun Telefonen an de dwatschesten Öörd, drifft Reeg dör Mudder mitünner in’t Alverne af.

In de Episood Stay Tuned is Mudder in Urlaub un warrt hier vun sien Viez „Vadder“ vertreden. Vadder is en blinne Fro, de vun wegen dat se nich kieken kann, düchtig goot föhlen un hören kann. In’n Gegendeel to Mudder geiht Vadder mit mehr Intuitschoon vör un vertellt ok lang nich so veel.

Rhonda[ännern | Bornkood ännern]

Ok de Figur Rhonda weer woll as humoristischen Bidrag to de Reeg dacht. Speelt warrt se vun de hooch wassen Rhonda Parker. Se is in de sössten Staffel jümmer in de Neeg vun Mudder un hett eenzig de Opgaav, em wat antorecken, sünners de Telefonhörers. In all de Episoden snackt se nich een Woort.

Schauspelers[ännern | Bornkood ännern]

As dat bi en Feernsehreeg nich anners wesen kann, weern för de Episoden jümmers wedder eenige Schauspelers bruukt, man vele vun jem weern nich blots eenmol för en Rull ünner Verdrag. En Koppel weern fakener mol to sehn, wat mitünner ’n beten verbiestern kann, sünners wenn dat üm Gesichtern deit, de een so gau nich vergitt. En poor vun jem weern bit to söss mol in de verscheden Folgen vun de Reeg – in ünnerscheedliche Rullen – to sehn.

Ünner de velen Schauspelers weern ok eenige, de laterhen groot rutkamen sünd. Dorto höört to’n Bispeel de noch junge Donald Sutherland un de to de Tiet noch unbekannte Charlotte Rampling, de beide in The Superlative Seven mitspelen deen. Jüst so unbekannt weer to de Tiet ok noch John Cleese oder ok Carol Cleveland, de later ok eenige mol bi Monty Python to sehn weer. Al wat bekannter weer Gordon Jackson, de in Castle De’Ath tosamen mit Robert Urquhart en Bröderpoor speel, oder Christopher Lee, de in twee Episoden mitspeelt hett. Sogor veermol is Julian Glover ünner Verdrag nahmen worrn. Wieter bekannte Schauspelers in „The Avengers“ weern ü.a. Peter Wyngard, Brian Blessed, Nigel Green oder Peter Bowles.

Verbinnen to Bond[ännern | Bornkood ännern]

De Feernsehreeg „The Avengers“ is bekannt för ehrn egen Stil, de dör de sünnere un eenzigordige Verbinnen vun Spannung un Humor utmaakt weer, un de to de Tiet vun Emma Peel un Tara King ehrn Hööchpunkt harr. Aver nipp un nau hinkeken gifft dat doch ok Verbinnen to annere Produkschonen, de mit dat Geheemdeenst-Gewarf to doon harrn.

Faken warrt en Verbinnen to de James-Bond-Filmreeg togen. De düütlichste Parallele is natürlich, dat beide Produkschoonsregen in Grootbritannien löpen un jemehr Anfang ruchweg to de glieken Tiet weer. Dat harr natürlich as een vun de düütlichsten Verbinnen to Folg, dat in beide Produkschonen en goten Deel von glieke Schauspelers mitspeelt hebbt.

Mehr as achtig vun de Schauspelers ut „The Avengers“ hebbt dorna ok Rullen in de Bond-Filmen speelt. Dat weern vör allen ’n hele Reeg vun lüttere Rullen, man ok eenige vun de wichtigen Rullen bi Bond-Filmen güngen an Schauspelers, de vörher al in „The Avengers“ mitspeelt harrn. Dorünner weern de al nöömten Julian Glover, John Cleese oder Christopher Lee, aver butendem ok Lois Maxwell de as Miss Moneypenny weltbekannt worrn is. Aver ok de Hööftdorsteller vun „The Avengers“ harrn faken en Optritt in en Bond-Film, as eerste Honor Blackman, de as Pussy Galore in Goldfinger to sehn weer. Dorop is sogor gliek in twee Feernseh-Episoden anspeelt worrn: So kreeg Steed in de Folg Too Many Christmas Trees in Wiehnachtskoort vun Cathy, de se angeevlich ut Fort Knox schreven harr – den Oort vun’n Showdown in den Bond-Film. En tweet’ mol is dorop in de Nafolgerreeg The New Avengers anspeelt worrn, as Steed un Gambit in de Folg Cat Amongst the Pigeons mit övermatig veel Katten gegen Vagels vörgahn sünd. In de Reeg geev dat noch’n Anspeelen op Bond in de Folg Complex, in de Gambit vun de Polizei fasthollen weer un man em dormit optütt, dat he jo gor nich de Gadgets bi sik harr, de för britsche Agenten so tyypsch weern.

Blangen Honor Blackman weer ok Diana Rigg inst en Bondgirl: As Tracy weer se de eenzige Fro, de – in On Her Majesty’s Secret Service – James Bond je heiraden dröfft hett. In’n glieken Film weer ok Joanna Lumley in en lütte Nevenrull mit dorbi. Se hett later Purdey in The New Avengers speelt un weer dormit woll een vun de wenigen, de al in en Bond-Film speelt hebbt, noch vördem se bi „The Avengers“ dorbi weern.

Un opletzt hett ok Patrick Macnee in A View to a Kill sien Optritt in een Bond-Film hatt. Öber em geev dat nochn wietere Verbinnen. He weer neemlich de Spreker bi de Dokumentatschonen bi’t Bonus-Material, as Metro-Goldwyn-Mayer bit dorhen vullstännige Reeg vun twintig Filmen op DVD rutbröcht hett.

Utteken[ännern | Bornkood ännern]

De Feernsehreeg is fiefmol nomineert wesen un hett een Pries dorvun ok kregen:

  • 1967: nomineert för den Emmy in de Kategorie Rutragen Dramareeg för Julian Wintle.
  • 1967: nomineert för den Emmy in de Kategorie Rutragen anhollen Leistung vun en Hööftdorstellersche in en Feernsehreeg för Diana Rigg.
  • 1968: nomineert för den Emmy in de Kategorie Rutragen Dramareeg för Albert Fennell un Brian Clemens.
  • 1968: nomineert för den Emmy in de Kategorie Rutragen anhollen Leistung vun en Hööftdorstellersche in en Feernsehreeg för Diana Rigg.
  • 2000: uttekent mit den Sünnerpries vun de BAFTA Awards för Honor Blackman , Joaana Lumley, Diana Rigg un Lindy Thorson.

Literatur[ännern | Bornkood ännern]

  • Tim Heald: John Steed an Authorized Biography – Vol, 1 Jealous in Honour, Weidenfeld & Nicolson, Londo, ISBN 0-297-77434-4 (engelsch)
  • Lars Baumgart: Das Konzept Emma Peel – Der unerwartete Charme der Emanzipation: The Avengers und ihr Publikum, Ludwig, Kiel, ISBN 3-933598-40-0
  • Franziska Fischer: Msr. Peel, wir werden gebraucht! Mit Schirm, Charme und Melone. Das Buch zur Serie, Bertz + Fischer Verlag, 3. Oplaag, Berlin 2006, ISBN 3-86505-159-6
  • Dave Rogers: The Avengers, Episodenföhrer, ITV Books, 2. Oplaag, London 1986, ISBN 0-907965-09-1 (engelsch)

Borns[ännern | Bornkood ännern]

  1. http://theavengers.tv/forever/keel-prod-dp2.htm
  2. http://theavengers.tv/forever/keel-prod.htm
  3. a b c d http://theavengers.tv/forever/gale1-prod.htm
  4. a b http://theavengers.tv/forever/gale2-prod.htm
  5. a b c d e http://theavengers.tv/forever/peel1-prod.htm
  6. a b c http://theavengers.tv/forever/timeline.htm
  7. http://theavengers.tv/forever/peel1-21.htm
  8. a b http://theavengers.tv/forever/peel2-prod.htm
  9. http://theavengers.tv/forever/king-prod.htm
  10. http://theavengers.tv/forever/king-u2.htm
  11. http://theavengers.tv/forever/king-u1.htm

Weblenken[ännern | Bornkood ännern]