Julian Wintle

Francis Julian Wintle (* 17. Oktober 1913 in Liverpool, † 8. November 1980 in Brighton) weer en britischen Filmproduzent.

Leven

Julian Wintle weer boren as de Söhn vun Francis Edward Wintle, de de Viez vun’t Walton-Gefängnis in Liverpool weer, un den sien Fro Irene Ridley. Opwassen is he in’t Herrenhuus vun sien Vadder un güng later in’t Winton House, Berkhamsted, un denn in Durham na School. Wintle hett ünner Hämophilie (Blöderkrankheit) leden – en Krankheit, bi de ok lütte Sehren nich ophöört to blöden un to’n Dood föhren künnt. To de Tiet weer de Krankheit noch kuum utforscht un verstahn. Prägt hett em, dat he Sünnavends nachts jümmers Filmen kieken de. As he en Artikel vun en bekannten Filmkritiker lest harr, hett he beslaten, en Loopbahn in’t Filmgewarf antostüern. Na de Scholl hett sik op en nee anboden Kurs beworven un weer een vun blots twee Studenten, de dissen kortlevigen Kurs goot afslaten hett. In de Beaconsfield Studios hett he denn as Filmeditor arbeit un dorna in de Welwyn Garden City Studios.

As he 26 Johren oolt weer, is de Tweete Weltkrieg utbroken. Mit sien Krankheit keem he för den Wehrdeenst natürlich nich in Fraag, so dat he eerst keen Arbeit mehr harr. Opletzt künn he för sik denn aver en Steed in’t Ümfeld vun de BBC torecht bedeln, so dat he in’t Produkschoonsgewarf blieven künn. Eenmol hett he sik mit Country Town (1945) ok as Speelbaas versöcht, weer dormit aver nich recht tofreden. Liekers is dorbi sien Vermögen as Filmemaker düütlich worrn un he kreeg de Mööglichkeit in de Produkschoon to arbeiten. Sien eersten Speelfilm weer The Dark Man. 1951 kreeg he denn en Anbott, in de bekannten Pinewood Studios to arbeiten. dor is ünner annern The One That Got Away entstahn, mit den he aver in düütschland veel mehr Spood harr as in Grootbritannien sülvst. So güng he wedder weg vun Pinewood un keem 1958 – as Filmproduzent – torüch na de Beaconsfield Studios.

Faken stünn he ünner Kritik, vun wegen dat he en teemliche Tall vun minnerwertige Produkschonen maken de. Man, as Grund geev he an, dat disse Produkschonen en praktischen Grund harrn, neemlich dat mit finaziell spoodrieke „B-Produkschonen“ de beteren – un dorüm düreren – Produkschonen överhaupt eerst mööglich weern. In disse Tiet hett he de eerste vun sien beiden Feernsehregen, The Human Jungle, produzeert, de vör allen in de USA Spood harr. Beaconsfield müss 1963 denn aver dichtmaken, as Wintle wegen en blödig Magensweer nich mehr arbeiten künn un meist doodbleven weer un sien Partner, Parkyn, in’n Rohstand gahn is. Dorna aver kreeg Wintle en överraschen Anbott ut de Pinewood Studios.

De Gewarfsföhrer vun ABC Television harr sik Wintle utkeken as Produzent vun de Feernsehreeg The Avengers, meten an de Gööd vun sien eerste Feernsehreeg un annere Produkschonen ut de Beaconsfield-Tiet. De hett sik denn foorts en Koppel vun Lüüd dorto söcht, as Brian Clemens, Albert Fennel un den Filmkomponisten Laurie Johnson. He sorg denn ok dorför, dat de Feernsehreeg ok na de USA verköfft warrn schüll un weer ok mitverantwoortlich dorför, dat Diana Rigg in de Reeg hollt worrn is. Na en Reeg vun Krankheiten hett he Pinewood wedder verlaten un müss sik nu eerstmol ’n lange Tiet schonen. Liekers beteken he disse Tiet as de Spoodriekste in sien Loopbahn, as he mit The Avengers en groten finanziellen Spood harr.

Mit sien Loopbahn güng dat na un na to Enn, sünners ok, as sien Gesundheit jümmers slechter weer. He künn kuum noch alleen lopen, kreeg jümmers wedder Blöden unn opletzt hebbt ok sien Neren verseggt. Sien fasten Willen hebbt em noch en Tiet an’t Leven hollen, man an’n 8. November 1980 is Wintle denn doodbleven an de Naklapp vun en Blöden in’n Brägen. Wintle weer verheiraat mit de Schrieversche Anne Francis, mit de he twee Söhnen harr. Sien Weetfro hett in de 1980er Johren en Book över em schreven.

Produkschonen (Utwahl)

Johr	Originaltitel	dt. Titel
1951	The Dark Man	Der Mann in Schwarz
1952	Hunted	Ein Kind war Zeuge
1955	Passage Home	Eine Frau kommt an Bord
1957	The One That Got Away	Einer kam durch
1959	The White Trap	Die weiße Falle
1960	Circus of Horrors	Der rote Schatten
1961	House of Mystery	Das Landhaus des Dr. Lemming
1961	Payroll	Schmutziges Geld
1961	The Man in the Back Seat	Der Tod fährt mit
1962	The Fast Lady	O Darling – was für ein Verkehr
1964	Father Came Too!	Ach, du lieber Vater
1963-64	The Human Jungle, Feernsehreeg	—
1965-67	The Avengers, Feernsehreeg	Mit Schirm, Charme und Melone
1971	The Firechasers	Jagd durchs Feuer
1972	Madam Sin	In den Fängen der Madame Sin
1973	The Belstone Fox	Der Fuchs von Belstone

Utteken

Wintle hett keen Filmpries winnen künnt, man he weer 1967 eenmol för den Emmy in de Kategorie Rutragen dramaatsch Feernsehreeg nomineert för de Reeg The Avengers.

Literatur

• Anne Francis: Julian Wintle: A Memoir, Dukeswood, 1986, ISBN 978-0951262405

Borns

• Biografie op „The Avengers Forever“

Weblenken

• Julian Wintle in de Internet Movie Database (engelsch)