The One That Got Away (Film)
| Filmdaten | |
|---|---|
| Plattdüütsch Titel: | — |
| Originaltitel: | The One That Got Away |
| Düütsch Titel: | Einer kam durch |
| Produkschoonsland: | Grootbritannien |
| Johr vun’t Rutkamen: | 1957 |
| Läng: | 106 Minuten |
| Originalspraak: | Engelsch |
| Öllersfreegaav in Düütschland: | FSK 6 |
| Filmkru | |
| Speelbaas: | Roy Ward Baker |
| Dreihbook: | Howard Clewes Kendal Burt (Book) James Leasor (Book) |
| Produkschoon: | Julian Wintle |
| Musik: | Hubert Clifford |
| Kamera: | Eric Cross |
| Snitt: | Sidney Hayers |
| Dorstellers | |
| |
The One That Got Away (op Platt so veel as „De, de utwutscht is“; dt.: Einer kam durch) is de Titel vun en britisch Filmdrama ut dat Johr 1957 över de Geschicht vun den düütschen Flegeroffizeer Franz vun Werra, den eenzigen Düütschen, de ut de Kriegsfangenschop vun de Briten utrieten un die Heimat torüchkehren künn. Dat Dreihbook to den Kriegsfilm baseert op dat Saakbook The One That Got Away, dat 1956 vun Kendal Burt un James Leasor rutbröcht worrn is.
Inholt[ännern | Bornkood ännern]
De Tweete Weltkrieg: De Slacht um England hett 1940 ehrn Hööchpunkt. Dorbi warrt de Messerschmitt Bf 109 vun den Offizeer vun Werra afschaten un mutt nootlannen. He warrt dorophen fangen sett. Vun Werra gifft sik övertüügt vun sik sülvst un bi de Verhören seggt he nix na. Liekers dat se em dör jemehr nau Weten över sien Person bannig tosetten doot, künnt se em nich vun sien eenzig Teel afbringen: de Flucht na Huus. He drängt dorop in en Kriegsfangenenlager to kamen, vun wo ut he mit de Help vun annere Düütsche utneihn will. Vun Werra geiht sogor so weit, dat he mit den Offizeer, de em utfraagt, en Wett afslutt, dat he in weniger as söss Maanden utrieten kann.
Al na en poor Daag hett he en Plaan, woans he sik bi’n Utgang versteken un weglopen kann, ahn dat de Briten em sehn künnt. Wohrhaftig geiht sien Plaan op un he kann utbüxen. To Foot versöcht he sik bit na de Küst dörtoslahn, woneem he sik mit en neutral Schipp na Düütschland översetten laten will. He kummt goot vöran, opletzt aver maakt em dat slechte Weder to dull to schapen un he warrt wedder infungen. He kummt dorna in en anner’t Lager, hett sien Plaan vun de Flucht aver noch nich opgeven. Foorts maakt he sik mit en poor Kameraden an’t Wark, en Tunnel na buten to graven. Een Nacht bi Flegeralarm neiht se ut. Wiel de annern gau wedder infungen warrt, kann vun Werra sien Plaan, sik op en britischen Luftwapenstüttpunkt – tarnt as’n nedderlännschen Piloten – ’n Fleger to klauen, meist ümsetten. Eerst in letzte Sekunn vör’t Afheven kriegt se em doch noch to faten.
Üm wietere Utbrook-Versöken to ünnerbinnen warrt he nu in en Fangenenlager in Kanada överstellt. Sien Will wegtolopen is aver jümmer noch nich broken. Op’n Weg in’t Lager kann he ut den Transporttog utbüxen. Midden in’n harden kanaadschen Winter sleiht he sik in dein Richt na de USA dör, de to de Tiet noch neutral weer. Liekers dat he bit an’t Enn vun sien Kräft gahn mutt un kort vör sien egen Enn steiht, kummt he opletzt an’t redden Över vun de USA an, woneem he üm Asyl anfraagt un so wohrhaftig wedder na Düütschland torüch kamen kann. De Film ennt dormit, dat de Verhöör-Offizeer, mit den vun Werra de Wett afslaten harr, vun em en Postkoort mit de Freeheitsstatue toschickt kriggt, mit de he sien Wettinsatz foddert.
Kritiken[ännern | Bornkood ännern]
Lexikon vun’n internatschonalen Film Spannend inszenierter Kriegsfilm, der in seiner quasi-dokumentarischen Schilderung beglaubigter Ereignisse relativ frei von Spekulation und Pathos bleibt.
Literatur[ännern | Bornkood ännern]
- Kendal Burt, James Leasor: The One That Got Away. Pen & Sword Military Classics, Barnsley 2006, 255 S., ISBN 1-84415-437-8
Weblenken[ännern | Bornkood ännern]
- The One That Got Away in de Internet Movie Database (engelsch)