Ne’enkarken (Swonewebel)
| Wapen/Flagg | Koort | |
|---|---|---|
|
|
| |
| Basisdaten | ||
| Flach: | 16,81 km² | |
| Inwahners: | 3.405 (30. Juni 2012) | |
| Inwahnerdicht: | 202,6 Inwahners pro km² | |
| Hööchd: | 5 m över NHN | |
| Postleettall: | 28790 | |
| Vörwahl: | 0421 | |
| Geograafsche Laag: | Koordinaten:53° 14′ N, 8° 31′ O53° 14′ N, 8° 31′ O | |
|
| ||
Ne’enkarken (hoochdüütsch Neuenkirchen) is en Dörp in de Gemeen Swonewebel in’n Landkreis Oosterholt, Neddersassen. Binnen de Gemeen billt de Oort en egen polietsche Oortschop.
Bi de Oortschop höört ok de Oort Vörbrook mit Gösp un Stellerbrook mit to. Vörbrook is vondaag aver mit Ne’enkarken tohoopwussen.
Geografie
[ännern | Bornkood ännern]De Oort liggt op’n Rand von de Oosterholter Geest (Bremer Swiez) hen na de Masch langs de Werser. De Masch is de Anfang von de Landschop Oosterstood. Dat Water ut dat Rebeed flütt över dat Möhlenfleet na de Werser af.
De Naveröörd sünd Rade un Aschwarden in’n Noorden, Hinnebeek un Meyenborg in’n Noordoosten, Swonewebel in’n Oosten, de Bremer Stadtdeel Bockhorn in’n Süüdoosten, Reken un Farge in’n Süden un Elsfleth in’n Westen.
Historie
[ännern | Bornkood ännern]De eerste Kark in Ne’enkarken is in dat 9. Johrhunnert boot worrn. 1192 is en ne’e Feldsteen-Kark boot worrn. Düsse Kark is de Ne’e Kark nöömt worrn un dorvon hett de Oort sien hüdigen Naam. De Kark is 1768 nochmaal wedder nee boot worrn in ehr hüdige Form as Gebüüd ut Tegelsteen.
1588 hett de Oort Marktrechten kregen.
In’n Oktober 1943 is op de Ne’enkarker Heid dat KZ Farge inricht worrn.
In’n Süüdoosten von’n Oort doot de Werser-Geest-Kasern, de Lützow-Kasern un en Truppenövungsplatz liggen. De Kasern hett 2015 dichtmaakt. 2007/2008 al is dor aver dat Museum Baracke Wilhelmine inricht worrn, dat ok vondaag noch besteiht.
Verwaltungsgeschicht
[ännern | Bornkood ännern]In de Franzosentied hett de Oort toeerst 1810 bet 1811 binnen dat Königriek Westfalen to de Mairie Neenkarken in’n Kanton Blomendal höört un denn von 1811 bet 1814 to dat Franzöösche Kaiserriek ünner Napoleon un dor to de Mairie Blomendal in’n Kanton Vesack.
De Oort hett vör 1885 to de Amtsvaagdie Ne’enkarken von dat Amt Blomendal tohöört. Na 1885 weer dat in’n Kreis Blomendal, de 1932 Deel von’n Kreis Oosterholt worrn is.
De Oort weer fröher en egenstännige Gemeen. 1929 is de Gemeen Vörbrook mit de beiden lüttjeren Öörd Gösp un Stellerbrook an de Gemeen Ne’enkarken kamen. Von 1966 bet 1974 weer Ne’enkarken sogor de Seet von de Samtgemeen Ne’enkarken. Mit de Gemeenreform in Neddersassen an’n 1. März 1974 is de Gemeen denn aver Deel von de Gemeen Swonewebel worrn. Sietdem billt dat Dörp en Oortschop mit Oortsraad un Oortsbörgermeester binnen de Gemeen.
Inwahnertall
[ännern | Bornkood ännern]| Johr | Inwahners |
|---|---|
| 1791[1] | 60 Füürsteden |
| 1812[2] | 345 |
| 1824[3] | 63 Füürsteden |
| 1848[4] | 429 Lüüd, 66 Hüüs |
| 1. Dezember 1871[5] | 447 Lüüd, 88 Hüüs |
| 1. Dezember 1885[6] | 439 Lüüd, 84 Hüüs |
| 1. Dezember 1905[7] | 527 Lüüd, 90 Hüüs |
| 1. Dezember 1910[8] | 481 |
| 1925[9] | 550 |
| 1933[9] | 1.132* |
| 1939[9] | 1.405* |
- * tohoop mit Vörbrook, Gösp un Stellerbrook
Religion
[ännern | Bornkood ännern]Ne’enkarken is evangeelsch-reformeert präägt un billt mit de Michael-Kark en egen Kaspel.
För de Kathoolschen is de Marienkark in Blomendal tostännig.
De Doden warrt op’n Karkhoff bi de Kark begraven. Deelwies sünd de Lüüd fröher ok op’n Karkhoff Sandesch begraven worrn, de vondaag aver achter de Landsgrenz na Bremen liggt un to Reken höört.
Wapen
[ännern | Bornkood ännern]Dat Wapen von Ne’enkarken wiest baven op roden Grund en sülvern Karktoorn mit twee Linnenbläder rechts un links un ünnen op sülvern Grund en roden Streekbalken, de von baven vörn na ünnen achtern geiht.
Utklamüsert het dat Wapen de Heraldiker Albert de Badrihaye. Dat is an’n 25. August 1967 genehmigt worrn. De Toorn steiht för de Michael-Kark un de Linnenbläder för dat ole Gericht Ne’enkarken. Dat Feld ünnen is dat Wapen von de Eddelfamilie von Stelle, de ünner annern de Kark boot hett.
Oortsraad
[ännern | Bornkood ännern]| Johr \ Partei | Tall | CDU | SPD | WG | Gröne |
|---|---|---|---|---|---|
| 2011 | 9 | 1 | 5 | 2 | 1 |
| 2016 | 8 | 2 | 4 | 2 |
- Liddmaten
- 2011:
- SPD: Angelika Cordes, Harald Grote, Frank Schneider, Roger Schöning, Annette von Wilcke-Brumund
- CDU: Werner Musfeld
- Gröne: Hardmuth Groß
- WG: Thomas Holler, Udo Prinz
- 2016:
- CDU: Jan Arfmann, Werner Musfeld
- SPD: Angelika Cordes, Harald Grote, Frank Schneider, Roger Schöning
- WG: Thomas Holler, Udo Prinz
Oortsbörgermeesters
[ännern | Bornkood ännern]| Tied | Naam | Partei |
|---|---|---|
| –31. Oktober 2016 | Annette von Wilcke-Brumund | SPD |
| 1. November 2016– | Angelika Cordes | SPD |
Kultur
[ännern | Bornkood ännern]Verenen
[ännern | Bornkood ännern]De Schüttenvereen Ne’enkarken is 1932 grünnt worrn un de Sportvereen 1. FC Ne’enkarken 1980.
De Vereen von de Heimatfrünn Ne’enkarken hett sik an’n 27. März 1960 grünnt.
Weertschop un Infrastruktur
[ännern | Bornkood ännern]Ne’enkarken hett en egene freewillige Füürwehr, de an’n 11. Oktober 1902 grünnt worrn is.
De Volksbank Oosterholt-Scharmbeek hett en Filiaal in Ne’enkarken in’n Raiffeisenweg 2.
Verkehr
[ännern | Bornkood ännern]Dör Ne’enkarken löppt de Kreisstraat 2, de in’n Noorden över Rade un Aschwarden na’n Landkreis Cuxhoben geiht un in’n Süden na de Landsgrenz na Bremen un wieder na Reken un Farge. Von de K 2 geiht in’n Süüdoosten de K 26 af an de Landsstraat 149. De L 149 föhrt in’n Süüdwesten ok na Reken un Farge un in’n Oosten na Swonewebel an de L 134 un wieder na Oosterholt-Scharmbeek.
De nächsten Autobahnen sünd de Autobahn 27 (Afsnidd Bremerhoben–Bremen) un de Autobahn 270. De Opfohrt 14 Swonewebel op de A 27 liggt so ölven Kilometer in’n Oosten von Ne’enkarken an de L 149. De Opfohrt op de A 270 liggt söven Kilometer in’n Süüdoosten.
De nächste Bahnhoff is knapp veer Kilometer wied weg in’n Süden de Bahnhoff Farge an de Bahnlien Farge–Vesack. Dor föhrt de Lien RS 1 von de Regio-S-Bahn Bremen/Neddersassen, de von Farge bet na Veern geiht.
Scholen
[ännern | Bornkood ännern]De Oort hett mit de Grundschool Ne’enkarken en egen School.
Literatur
[ännern | Bornkood ännern]- Martin Baake: Aus der Vergangenheit und Gegenwart des Dorfes Neuenkirchen. Friedrich Pörtner, Blomendal 1983
Footnoten
[ännern | Bornkood ännern]- ↑ Christoph Barthold Scharf: Statistisch-Topographische Samlungen zur genaueren Kentnis aller das Churfürstenthum Braunschweig-Lüneburg ausmachenden Provinzen. Meier, Bremen 1791, Sied 162
- ↑ Albrecht Friedrich Ludolph Lasius: Der französische Kayser-Staat unter der Regierung des Kaysers Napoleon des Großen, im Jahre 1812, Band 1. Kißling, Ossenbrügge 1813, Sied 106
- ↑ Curt Heinrich Conrad Friedrich Jansen: Statistisches Handbuch des Königreichs Hannover. Hannover 1824, Sied 432
- ↑ Friedrich Wilhelm Harseim, Carl Schlüter: Statistisches Handbuch für das Königreich Hannover. Schlütersche Hoffbookdruckeree, Hannover 1848, Sied 132
- ↑ Die Gemeinden und Gutsbezirke des Preussischen Staates und ihre Bevölkerung. Berlin 1873, Sied 158
- ↑ Gemeindelexikon für das Königreich Preußen. Auf Grund der Materialien der Volkszählung vom 1. Dezember 1885. Verlag des Königlichen statistischen Bureaus, Berlin 1888, Sied 172
- ↑ Gemeindelexikon für das Königreich Preußen. Auf Grund der Materialien der Volkszählung vom 1. Dezember 1905. Verlag des Königlichen statistischen Landesamtes, Berlin 1908, Sied 20
- ↑ Inwahnertallen op gemeindeverzeichnis.de
- ↑ a b c Inwahnertallen op verwaltungsgeschichte.de
Weblenken
[ännern | Bornkood ännern]
Ne’enkarken (Swonewebel). Mehr Biller, Videos oder Audiodateien to’t Thema gifft dat bi Wikimedia Commons.
- Websteed von de Heimatfrünn Ne’enkarken (hoochdüütsch)
Aschwarden | Beckdorp | Brundörp | Eggst | Harriersand | Hinnebeck | Leuchtenborg | Löhnhorst | Meyenborg | Ne’enkarken | Rade | Swonewebel