Harriersand

Vun Wikipedia
Zur Navigation springen Zur Suche springen
De Fähr Guntsiet

Harriersand is en Eiland in de Werser. Dat höört bi de Gemeen Swonewebel in’n Landkreis Oosterholt in Neddersassen. Harriersand is von Noorden na Süden üm un bi ölven Kilometer lang un hett op en Rebeed von 6 km² 75 Inwahners (Stand 30. Juni 2012)[1].

Güntsiet op de annere Sied von de Werser liggt de Stadt Braak. In’n Westen von Harriersand liggt de Hauptstroom, op de Oostsied de Rechte Blangenarm von de Werser. De Rechte Arm steiht siet 1985 ok ünner Naturschuul.

Historie[ännern | Bornkood ännern]

De Naam kummt von’n Oort Harrien op dat linke Över von de Werser, wat nu en Deel von Braak is. He kummt in dat Groothertöglich Ollnbörgsche Brandkassenregister von 1799 vör. To de Tied hett dat Rebeed noch ut söven Sannen bestahn: Groten Pater, Harriersand, Lütten Pater, Nunneneck, Ooster-Pater, Wester-Pater un Willemsplaat. Düsse Sannen sünd eerst mit de Werserkorrektur von 1924 bet 1932 to een Eiland tohoopföögt worrn. De rechte Arm von de Werser föhrt sietdem bi Leegwater kuum noch Water un verlannt jümmer mehr.

Harriersand is nich indiekt. De olen Hööv staht op Warften, de ne’eren Feernhüüs op Stelten. Fröher weer Harriersand en Domään un harr blots en poor Pächters as Inwahners. 1870 weren dat man söven Lüüd.

De eerste Brügg na’n fasten Wall is 1965 trech worrn. De Brügg is 70 Meter lang, liggt an de Süüdspitz von Harriersand un geiht na Rade.

In de Franzosentied von 1811 bet 1814 hett Harriersand to de Mairie Braak in’n Kanton Elsfleth höört. Dat Rebeed hett in disse Tied to dat Franzöösche Kaiserriek ünner Napoleon höört. Vörher un naher harr dat Rebeed to dat Hertogdom Ollnborg höört.

Dat Eiland is an’n 1. März 1974 bi de Gemeenreform in Neddersassen Deel von de Gemeen Swonewebel worrn. Dorbi is se von’n Landkreis Wersermasch na’n Landkreis Oosterholt wesselt. Dat weer vonwegen dat dat Eiland von dat rechte Över von de Werser lichter to recken weer. Vörher hett Harriersand to de Stadt Braak tohöört.

Religion[ännern | Bornkood ännern]

Harriersand is evangeelsch-reformeert präägt un höört to dat Kaspel von de Michaelskark in Ne’enkarken.

För de Kathoolschen is de St.-Ansgar-Kark in Swonewebel tostännig.

Weertschop un Infrastruktur[ännern | Bornkood ännern]

Weertschop[ännern | Bornkood ännern]

Harriersand weer fröher jümmer von de Bueree präägt. Dat Land weer kumplett Gröönland.

Vondaag speelt aver de Tourismus en grote Rull. Dat gifft en Campingplatz mit Restaurant, en Sandstrand to’n Baden un en groten Speelplatz. Dat gifft op Harriersand üm un bi 150 Wekenennhüüs.

Op Harriersand liggt ok de Warksteed för Galjoonsfigurn von Birgit un Claus Hartmann.

Verkehr[ännern | Bornkood ännern]

De Hüüs op Harriersand doot all an de Westkant liggen un sünd över de Inselstraat verbunnen. De löppt von’n Hoff op de Willemsplaat ganz in’n Noorden bet na de Süüdspitz. Dor geiht de Brügg över den rechten Werserarm un över de Fährplaat na Rade.

Över de Werser föhrt de Fähr Guntsiet na Braak. Disse Fähr is blots för Footgängers un Radfohrers to bruken.

Panorama von Harriersand mit de Oceana von de Fohrgastsellschop Hal över in’n Vörgrund
Panorama von Harriersand mit de Oceana von de Fohrgastsellschop Hal över in’n Vörgrund

Literatur[ännern | Bornkood ännern]

  • Rolf Schmidt, Peter Roloff: Harriersand. Insel im Strom. Isensee Verlag Oldenburg 2006, ISBN 3-89995-317-7
  • Detlef Addicks: Die Geschichte des Harriersandes und seiner Bewohner. Leben und Arbeiten auf einer Insel im Überflutungsgebiet. Sülvsverlag, Swonewebel 2006

Footnoten[ännern | Bornkood ännern]

  1. http://www.schwanewede.de/unsere-gemeinde/daten-und-fakten/

Weblenken[ännern | Bornkood ännern]

Commons-logo.svg Harriersand. Mehr Biller, Videos oder Audiodateien to’t Thema gifft dat bi Wikimedia Commons.


Koordinaten:53° 18′ N, 8° 30′ O