Monkey River

Vun Wikipedia
Zur Navigation springen Zur Suche springen
De Monkey River
De Swasey Branch

De Monkey River is en Stroom in Belize, de in Monkey River Town in de Karibische See münnt.

De Stroom hett en Afströömrebeed von üm un bi 1200 km².

De Monkey River an sik is blots 14,5 Kilometer lang. He billt sik ut Bladen Branch un Swasey Branch. Tohoop mit’n Bladen Branch is he aver 107 Kilometer lang. De Borns doot to’n gröttsten Deel in’n Regenwoold von de Maya-Bargen liggen (to en groten Deel schuult as Cockscomb Basin Wildlife Sanctuary un Bladen Nature Reserve).

Verloop[ännern | Bornkood ännern]

De Stroom billt sik 14,5 Kilometer vör sien Münn ut twee Telgen: den Bladen Branch un den Swasey Branch.

Bladen Branch[ännern | Bornkood ännern]

De üm un bi 92 Kilometer lange Bladen Branch hett sien Born an’n Barg Doyle’s Delight bi 16° 30′ N, 88° 60′ W. Von dor flütt he toeerst en poor Kilometer na Süüdoosten un dreiht denn na Noordoosten. He nimmt von links Ramos Creek, Rockstone Creek, Quebrada de Oro un Richardson Creek op. In’n Noorden von’n Oort Medina Bank bi’n Richardson Peak dreiht de Stroom wedder na Süüdoosten. Bi de Öörd Trio un Bladen flütt de Bladen Branch denn ut’n Oorwoold rut. Bi Trio nimmt he ok den 45 Kilometer langen Trio Branch op.

De Snake Creek is en 17 Kilometer langen Waterloop, de sien Born an’n Barg Doyle’s Delight hett. Dat Water von’n Snake Creek verlüst sik in’t Karst, flütt aver ünnereerdsch na’n Bladen Branch.

Swasey Branch[ännern | Bornkood ännern]

De Swasey Branch heet in sien Böverloop Mare’s Nest Branch un hett sien Born bi 16° 41′ N, 88° 46′ W. Von dor flütt he ölven Kilometer na Noordoosten un dreiht denn na Süüdoosten. Von links doot hier de 16 Kilometer lange Mare’s Nest Left Hand Branch, de 14 Kilometer lange Middle Branch un de 19 Kilometer lange Cockscomb Branch inmünnen, de all dree ut dat Rebeed an’n Süüdhang von’n Victoria Peak kaamt. Von de Steed af an, an de von links de söven Kilometer lange Curassow Creek inmünnt, warrt de Stroom denn Swasey Branch nöömt. De Mare’s Nest Left is 27 Kilometer lang un de Swasey Branch 64 Kilometer. Tohoopnahmen is düsse Telg also von’n Born bet na dat Tohoopfleten in’n Monkey River 91 Kilometer lang.

De Swasey Branch billt von’n Double Fall Creek af an op en ganz Enn de Grenz von de Distrikte Stann Creek un Toledo. Dorbi dreiht he bilütten op en Süüdkurs.

He nimmt von links den Lagarto Creek un den Crique Arenalosa op un von rechts den Sapote Creek.

Op dat linke Över doot de Öörd Red Bank, Cowpen, San Isidro un Bella Vista liggen un op dat rechte Över Roseville un San Pablo.

Toletzt flütt he mit’n Bladen Branch to’n Monkey River tohoop.

Weblenken[ännern | Bornkood ännern]

Commons-logo.svg Monkey River. Mehr Biller, Videos oder Audiodateien to’t Thema gifft dat bi Wikimedia Commons.


Koordinaten:16° 22′ N, 88° 29′ W